Sahibkarlar dövlətimizin iqtisadi siyasətini dəstəkləyirlər

"Strateji xəttimiz - sərbəst iqtisadiyyat, özəlləşdirmə və sosial inkişaf yoludur" tezisinin müəllifi olan ümummilli liderimiz Heydər Əliyev əslində Azərbaycanın gələcək uzunmüddətli strategiyasını müəyyənləşdirmişdir. Demokratik həyat tərzinin diktə etdiyi reallıq, bazar iqtisadiyyatının fundamental prinsipləri - xüsusi mülkiyyətə, sahibkarlıq fəaliyyətinə yaranan şərait və bu kimi vacib məsələlər həmişə diqqət mərkəzində olmuşdur.

Sahibkarlarımızın güzəştli kreditlə təmin olunması, onların fəaliyyətinə qanunsuz müdaxilələrin qarşısının alınması, özəl sektorun inkişafına mane olan süni problemlərin həlli istiqamətində dövlət tərəfindən atılan addımlar bunlara bariz nümunədir. Hamımız yaxşı xatırlayırıq ki, 2004-cü ilin fevralında Bakı Biznes Mərkəzində yerli sahibkarlarla görüşən dövlət başçısı İlham Əliyev onları narahat edən məsələləri diqqətlə dinləmiş, sahibkarları dəstəklədiyini, iş adamlarına gələcəkdə də lazımi kömək göstərəcəyini bildirmişdir.

Bundan əlavə, sahibkarlığın hüquqi bazasının sistem halına gətirilməsini təmin edən qanunlar, bir sıra mühüm normativ sənədlər də qəbul edilmişdir. Sahibkarlığa vergi yükünün azadılması, bu sistemin xeyli dərəcədə sadələşdirilməsi, ölkədə özəl sektorun inkişafına yaradılan mühüm amillərdən biridir. Bunlar, ölkəmizin Ümumdünya Ticarət Təşkilatına daxil olmaq şansını artırmışdır.

Azərbaycanın bu gün beynəlxalq aləmdə mövqeyinin möhkəmlənməsi, xarici siyasət sahəsində bölgədə lider dövlətə çevrilməsi, heç şübhəsiz ki, uğurla aparılan daxili və xarici siyasətin, iqtisadi əsaslara söykənən amillərin nəticəsidir. Respublikamızın dünyada nüfuzu və xüsusi çəkisi davamlı olaraq artır. Ölkəmiz Qərbə, Avropaya geniş inteqrasiya strategiyasını özünün ən mühüm siyasi xətti hesab etmişdir.

Corc Vaşinqtonun belə bir sözü var: "Demə Amerika mənim üçün nə edib, söylə, sən Amerika üçün nə etmisən?" Bəziləri elə düşünürlər ki, iş adamı yalnız pul qazanmaq, var-dövlət yığmaqla məşğul olur. Əsla belə deyildir. Bu günkü iqtisadiyyatımızın inkişafında və dirçəlməsində, ölkə büdcəsinin artırılmasında iş adamlarının çox böyük rolu vardır. Bir məqamı da xatırlamaq yerinə düşərdi. İstərdik ki, Azərbaycanın iş adamları ölkəmizdə olduğu kimi, onun xaricində, ayrı-ayrı dövlətlərdə də öz bizneslərini yaratsınlar, işləsinlər, sahibkarlıq fəaliyyəti ilə məşğul olsunlar. Dünya praktikasında bunların əhəmiyyəti olduqca böyükdür.

Bu gün fəxrlə deyə bilərik ki, Heydər Əliyevin xalq, Vətən üçün etmək istədiklərini cənab İlham Əliyev uğurla davam etdirir. O bu kursu qətiyyətlə, layiqincə həyata keçirir və bu xəttin, ideoloji konsepsiyanın qorunub saxlanılması, güclənməsi üçün əlindən gələni edir. Bütün bu işlərdə, təbii ki, biz möhtərəm Prezidentimizə kömək, dayaq, arxa olmalıyıq. "Mən hər bir azərbaycanlının Prezidenti olacağam"-deyən ölkə rəhbəri verdiyi hər bir vədə layiqincə əməl edir. Bu gün iqtisadiyyatımızda baş verən inkişaf, maliyyə sabitliyi, dövlət büdcəsi gəlirlərinin artması, əhalimizin həyat səviyyəsinin yüksəlməsi və s. hər birimizi sevindirməyə bilməz.

"Medlayt" şirkəti olaraq öz işimizi zamanın tələbinə uyğun qurmuşuq. Əhalimizin sağlamlığı ilk növbədə ən vacib məsələdir. Çox təəssüf ki, ölkəmizə, hələ də saxta dərman preparatları gətirilir və onlar bazara asanlıqla yol tapırlar. Bütün bunlar insanlarımız üçün xoşagəlməyən fəsadlar törədir. Odur ki, şirkətimiz həmişə treninqlər keçirir, xüsusi kurslar təşkil edirik ki, insanlarımız ilk növbədə tibbi biliklərə yönəlsinlər, bu sahədə maariflənsinlər. Gənc əczaçılarımız əhaliyə satılan dərmanların mənşəyini, hansı ölkənin məhsulu olduğunu, o ölkənin kodunu bilməklə müəyyənləşdirə bilsinlər.

Səhiyyə sahəsində baş verən son yeniliklər - əhalinin sağlamlığına olan diqqət, qayğı, bu sistemin yenidən qurulması və buradakı köklü dəyişikliklər respublikamızda həyata keçirilən sosial siyasətin tərkib hissəsi kimi qiymətləndirilməlidir.

Cənab İlham Əliyev dövlət başçısı kimi ötən beş ildə ona göstərilən ümidləri ən yüksək səviyyədə doğrultdu və özünün qətiyyətli, proqmatik siyasətçi obrazını daha da gücləndirdi. Yüksək intellekti, işgüzarlığı, mütərəqqi idarəçilik prinsipləri, habelə, milli təəssübkeşliyi və adi davranış qaydaları ilə cəmiyyətdə böyük nüfuz qazandı. Ulu öndər Heydər Əliyev kimi siyasət dühasından bəhrələnən Prezident İlham Əliyev özünün yüksək keyfiyyətləri, dövlət idarəçilik bacarığı sayəsində ötən dövr ərzində siyasi varisliyə alternativsiz lider olduğunu bir daha təsdiq və sübut etdi.

Əsgərov Ə.

Respublika.- 2008.- 23 dekabr.- S.5.