Lənkəranda çay bayramı keçirildi

Göyşaban dairəsində salınmış xalq sənətkarlığı şəhərciyi bayramsayağı bəzədilmişdi. Şəhərciyin girəcəyində iri samovar və armudu stəkan qoyulmuşdur. Yaşıl çay kolları, limon ağacları meydana xüsusi yaraşıq verirdi. Lənkəranda istehsal olunan çay məhsullarından nümunələr, cürbəcür şirniyyatlar, mürəbbələr stolların üstünə düzülmüşdü.

Ağ xalat geyinmiş çayçılar tədbir iştirakçılarını samovar çayına dəvət edirdilər. Bir qədər aralıda sacların üstündə lavaş bişirilirdi. Beynəlxalq kulinariya müsabiqələrinin qalibi, dünya şöhrətli aşpaz Şahhüseyn Kərimov çəkisi 107 kiloqram olan iri ərzuman küftəsini hazırlayırdı.

Lənkəran və onun simvollarından biri olan yaşıl çay haqqında şən mahnılar ətrafa yayılırdı. Milli geyimli qızların rəqsləri, "Nənələr" ansamblının ifa etdiyi folklor nümunələri hamıda bayram əhval-ruhiyyəsi yaradırdı.

Respublikamızda ilk dəfə olaraq Lənkəranda çay bayramı keçirilirdi. Tədbirə rayonun əmək adamları, çay-becərənlər, ziyalılar, ictimaiyyətin nümayəndələri dəvət olunmuşdular.

Lənkəran Şəhər İcra Hakimiyyətinin başçısı Süleyman Mikayılov, Milli Məclisin üzvü Rüfət Quliyev, rayonun hüquq-mühafizə orqanlarının rəhbərləri, qonaqlar "Lənkərançay", "Lənkərançay-1", "Lənkərançay-5" və "Lənkəran Onur" MMC-lərin hazırladığı məhsulların nümunələrinə baxdılar.

Bayram mərasimini Qafqaz çay assosiasiyasının prezidenti, kənd təsərrüfatı elmləri doktoru, professor Fərman Quliyev açaraq çayçılığın tarixi barədə məlumat verdi. Lənkəranda yaşıl çayın 1896-cı ildən əkildiyini, Lənkəran çayının dəfələrlə dünya sərgilərində qızıl medala layiq görüldüyünü, bu yaxınlarda Tbilisi şəhərində beynəlxalq çay festivalının keçirildiyini məmnunluqla qeyd etdi. Çayı strateji ərzaq məhsulu kimi dəyərləndirən alim ölkəmizdə çayçılığın inkişafına göstərilən qayğıdan söhbət açdı.

Lənkəran Şəhər İcra Hakimiyyətinin başçısı Süleyman Mikayılov tədbirin keçirilməsində ağsaqqalların, ziyalıların, sadə zəhmət adamlarının rolunu yüksək qiymətləndirdi. İcra başçısı Azərbaycan Prezidenti cənab İlham Əliyevin aqrar sahənin inkişafına xüsusi qayğı göstərdiyini, son illər Lənkəranda çayçılığın inkişafı sahəsində ardıcıl tədbirlərin həyata keçirildiyini bildirdi və tədbir iştirakçılarına ən xoş, səmimi arzularını çatdırdı.

Sonra aşpaz Şahhüseyn Kərimovun bişirdiyi ərzuman küftəsi tədbir iştirakçılarına təqdim olundu. Ən yaxşı çayçı müsabiqəsinin qaliblərini şəhər icra hakimiyyətinin başçısı qiymətli hədiyyələrlə mükafatlandırdı.

Həsənov Ə.

Respublika.- 2008.- 30 dekabr.- S.11.