İlham Əliyev: Biz öz siyasətimizlə, addımlarımızla və praktiki işlərimizlə islam aləminin bir birinə daha da yaxın olmasına çalışırıq

Müsəlman ölkələrinin həmrəyliyi, birliyi çox böyük strateji əhəmiyyət daşıyır. Müstəqil Azərbaycan dövlətini İslam dünyası ilə birgə tariximiz, mədəniyyətimiz və mənəviyyatımız birləşdirir. Təsadüfi deyil ki, Azərbaycan İslam Konfransı Təşkilatının ən önəmli üzvlərindəndir və bu nüfuzlu beynəlxalq qurumun daha da möhkəmlənməsinə öz layiqli töhfəsini verir. Bakının 2009-cu il üçün İslam mədəniyyətinin paytaxtı elan edilməsi də bunun əyani təsdiqidir. "Bakı-İslam mədəniyyətinin paytaxtı-2009" mədəniyyət ilinin təntənəli açılış mərasimindəki nitqində Prezident İlham Əliyev ölkəmizin İKT çərçivəsində fəal rol oynadığını önə çəkərək deyib: "Biz öz siyasətimizlə, addımlarımızla və praktik işlərimizlə İslam aləminin bir-birinə daha da yaxın olmasına çalışırıq, İslam həmrəyliyinin daha da möhkəm olmasına çalışırıq. Buna böyük ehtiyac var. Biz bir-birimizi dəstəkləməliyik, həm siyasi sahədə, həm də iqtisadi sahədə daha da sıx əməkdaşlıq etməliyik".

Son illər Azərbaycan dünyaya daha sürətlə inteqrasiya edir, öz siyasi və iqtisadi gücünü artırır. Təqdirəlayiq haldır ki, ümumdünya maliyyə və iqtisadi böhranı aparıcı dövlətlərə belə ciddi ziyan vurduğu halda, Azərbaycan bu tənəzzüldən kənarda qala və əksinə, inkişafını davam etdirə bilmişdir. Dünyanın ən iri və nüfuzlu maliyyə qurmlarından olan, Dünya Bankı və Beynəlxalq Valyuta Fondu Azərbaycanı ən islahatçı ölkə elan etməsi də təsadüfi deyildir.

Son beş ildə həyata keçirilən köklü iqtisadi və siyasi islahatlar Azərbaycanın gücünü daha da artırıb. Hazırda ölkəmiz dünyada baş verən hadisələrə təsir imkanlarına malikdir.

İndi bütün beynəlxalq qurumlar, dünya dövlətləri üçün ölkəmiz həm də birgəyaşayışa və tolerantlığa nümunə kimi tanınır. Dövlətimizin başçısının hazırkı qloballaşma dövründə beynəlxalq siyasi, iqtisadi, sosial maraqların ortaq məxrəcini tapması və xalqımızın milli mənafeyinə uyğun fəaliyyət proqramı nəticəsində Azərbaycan paytaxtı müxtəlif beynəlxalq tədbirlər keçirilən mühüm regional mərkəzə çevrilib. Dövlətimizin Avrasiya və digər iqtisadi məkanlara sürətlə inteqrasiyası, bunun da nəticəsində istər aparıcı, istərsə də inkişaf etməkdə olan ölkələrin nümayəndələrinin Azərbaycana səfərləri informasiya blokadasının dağılmasına səbəb olub. Qərb dünyası birmənalı şəkiidə Azərbaycanın bütün millətlərin, xalqların, irqlərin birgə yaşayışı və tolerantlıq üçün hər bir dövlətə örnək olmasını təsdiq eləyir.

Azərbaycanın İslam dünyasındakı daim artan nüfuzunun və İslam mədəniyyətinin inkişafında zəngin mədəni irsinin qorunmasındakı rolunun nəticəsidir ki, 2007-ci il noyabrın 21-23-də Liviyanın paytaxtı Tripolidə keçirilmiş V İslam konfransında qəbul edilmiş qətnaməyə əsasən Bakı şəhəri 2009-cu il üçün "İslam mədəniyyətinin paytaxtı" elan olunmuşdur. Sonuncu din olan İslamın real mahiyyətini bəşəriyyətə əməli və praktiki nümunələrlə təqdim etmək qloballaşan dünyada ümumbəşəri əhəmiyyət daşıyır. Müsəlmanların müqəddəs kitabı Qurani-Kərim insanlara elm və təhsili inkişaf etdirməyi, iqtisadi əlaqələr yaratmağı, bir-birini sevməyi, birgəyaşayışı buyurur, hər cür zorakılığı, təcavüzü rədd edir. İslam vicdan azadlığını və tolerantlığı təqdir edir.

"Bakı-İslam mədəniyyətinin paytaxtı-2009" mədəniyyət ilinin açılış mərasimindəki nitqində Prezident İlham Əliyev bu vacib məsələyə xüsusi toxunub: "İslam qardaşlıq dinidir, tolerantlıq, dözümlülük dinidir. Dünyada bizim müqəddəs dinimiz olduğu kimi təqdim edilməlidir. Bütün İslam dünyasının özünü təqdim etməsi üçün atılan addımlar mədəniyyət sahəsində də özünü büruzə verməlidir. Çünki İslam dünyasının çox zəngin tarixi, çox zəngin mədəniyyəti vardır. Bizim mədəniyyətlərimiz dünya birliyinə olduğu kimi təqdim edilməlidir".

Tarix ən böyük təcrübə bazasıdır. İslam ölkələrinin tarixində müsəlman dövlət başçılarının və sərkərdələrinin insanpərvərliyi, ədaləti barədə kifayət qədər sənədlər vardır. Təsadüfi deyil ki, elə İslam şəhəri paytaxt elan olunur ki, o, həm öz ölkəsi səviyyəsində mühüm tarixi keçmişə malik, həm də İslam və bəşər mədəniyyətinə elm, incəsənət, ədəbiyyat sahəsində dəyərli töhfələr vermiş olsun. Bundan başqa, həmin şəhərdə müasir tələblərə cavab verən elmi-tədqiqat, arxeoloji təhsil mərkəzləri, fərdi və kollektiv mədəni tədbirlər təşkil edə biləcək müvafiq qurumlar fəaliyyət göstərməlidir. Digər daha mühüm tələb isə həmin məkandakı mövcüd cəmiyyətin qan damarında min illər boyu axan insan sevgisi, bundan irəli gələn birgəyaşayışı, dini tolerantlığı həyat norması kimi qəbul etməsi vacibdir. Bütün yuxarıda qeyd edilənlər Bakıda mövcuddur, ona görə də şəhər İslam paytaxtı elan olunmuşdur. Bundan başqa, Azərbaycan İslam Konfransı Təşkilatının ən fəal üzvlərindən biridir. Müstəqillik yaşının cəmi 17 olmasına baxmayaraq dövlətimiz rəhbərinin başçılığı və səmərəli aktiv fəaliyyəti ilə İslam ölkələrinin həmrəyliyinə və birliyinə öz zəruri töhfəsini verməkdədir. Ölkə Prezidenti İlham Əliyev bu tədbirdə çıxışı zamanı demişdir: "...Son illər Azərbaycanda çoxsaylı tədbirlər keçirilmişdir, xarici işlər nazirlərinin toplantısı, mədəniyyət və turizm nazirlərinin toplantısı. Növbəti illərdə daha da çox tədbirlər keçiriləcəkdir".

Göründüyü kimi, bu mühüm tədbir tarixi xatırlatmaq üçün keçirilmir. Əsas məqsəd cəmiyyətlərin tarixi mədəni təcrübə bünövrəsi üzərində islam sivilizasiyasının dəyərlərinə əsaslanan bəşəri toplumların bugününü və gələcəyini yaratmaq və yaşatmaqdır. Qurani-Kərim buyurur ki, biz insanlardan millətlər və xalqlar yaratdıq ki, bir-birinizi yaxşı tanıyasınız. Beləliklə, Yaradan həm insanların bir kökə bağlı olmalarını bildirməklə yanaşı, həm də onların birgəyaşayışına, milli-mədəni dəyərlərinin mövcudluğuna və inkişafına da işarə edir, bu isə öz növbəsində dünyada sülh və sabitliyə nail olmağa çağırır.

Dünyada siyasi sabitliyə, əmin-amanlığa nail olmaqda, millətlərin, xalqların, dövlətlərin qarşılıqlı səmərəli iqtisadi, siyasi, sosial əlaqəlar şəraitində yaşamasında İslam sivilizasiyasının son dərəcə böyük əhəmiyyəti vardır. Ərəb, Asiya və Afrika regionlarındakı sivilizasiyaları İslam mədəniyyəti paytaxtları vasitəsilə bir araya gətirməyin məqsədi keçmişi, bugünü və gələcəyi birləşdirməklə irqi və irsi mənsubiyyətinə, mədəniyyət köklərinə və digər xüsusiyyətlərinə görə fərqlənən insanların anlaşmasına, birgəyaşayışına, əlaqələrinin qarşılıqlı zənginləşməsinə, müharibələrin, yanlış konsepsiyaların qarşısının alınmasına nail olmaqdır. İslam sivilizasiyasının qapıları hər kəsə, hər bir xalqa, millətə açıqdır. Bu paytaxtların elan olunması bütün dünyada baş verən dağıdıcı xaosun, çaşqınlığın, gələcəyə ümidsizliyin qarşısını almağa xidmət edir. Dövlət başçısı İlham Əliyev çıxışında bu tədbirin mühüm beynəlxalq əhəmiyyətini dəqiqliyilə açıqlayıb: "Bütün bu təşəbbüslər bir məqsəd güdür: dünyada sülh bərqərar olsun, təhlükəsizlik təmin olunsun, dünyada müharibələr olmasın və sivilizasiyalar arasında aparılan dialoq daha da möhkəm olsun və yaxşı nəticələr versin".

İslam Konfransı Təşkilatı baş katibinin müavini Atta Əlmənnan da bu tədbirin sivilizasiyaların yaratdığı tarixi və mədəni təməl üzərində əmin-amanlıq, sülh, birgəyaşayış körpüsü olacağı arzusundan bəhs etmişdir. O, Azərbaycanın işğal olunmuş əraziləri barədə fikir söyləmiş və qeyd etmişdir ki, "... bütün müsəlman ümməti" ölkənin ədalətli mövqeyini dəstəkləyir və "qanunsuz olaraq zəbt edilmiş torpaqlarının tam azad edilməsinə qədər" arxasında dayanır.

Bakının regional islam paytaxtı elan olunması bir daha Azərbaycanın qüdrətinin artmasını, beynəlxalq mərkəzə çevrilməsini, millətimizin imzasının imzalar içində seçilməsini sübut edir.

Ataş CƏBRAYILOV.

Respublika.- 2009.- 1 mart.- S. 1.