”AtaBank” 15 illiyini qeyd etdi

20 noyabrda "Excelsior Hotel Baku" otelinin "Afurja" zalında "AtaBank" ASC-nin 15 illik yubileyinə həsr olunmuş konfrans keçirildi. Tədbirin əvvəlində "AtaBank"ın ötən illər ərzində fəaliyyətini geniş əks etdirən sənədli xronika nümayiş etdirildi. "AtaBank" ASC idarə heyəti sədrinin müavini Müseyib Əliyev ümummilli liderimiz Heydər Əliyevin başqa sahələrlə yanaşı, bankların inkişafına göstərdiyi diqqət və qayğıdan danışdı. Bildirdi ki, 1993-cü ilin noyabrından fəaliyyətə başlayan "AtaBank" bu gün Azərbaycanın ən böyük kommersiya banklarından birinə çevrilmişdir.

Korporativ və fərdi müştərilərə tam xidmətlər kompleksini təqdim edən "AtaBank" yüksək texnologiyalı universal bank sayılır. "AtaBank"ın filial şəbəkəsi də genişləndirilmişdir. Cari ildə bankın "Səbail", "Nizami", "Xəzər" filialları fəaliyyətə başlamış və bununla da bankın xidmət şəbəkəsinin sayı 20-yə çatmışdır. Bu xidmət bölmələrinin 10-u regionlarda yerləşir.

Son bir il ərzində "AtaBank"ın bankomat şəbəkəsi daha da genişləndirilərək sayı 24-dən 46-ya çatdırılmışdır. Fəaliyyət göstərən bankomatların 13-ü regionlarda yerləşir. Bank tərəfindən bu günədək ümumilikdə 273 ədəd POS terminal quraşdırılmışdır.

"AtaBank"ın xarici əlaqələri daha da inkişaf etdirilmişdir. İsveçrənin "Credit Suisse", Rusiyanın "VneşTorqBank" və "RusslavBank", BƏƏ-nin "Mashreq" banklarında müxbir hesabı açılmışdır. Hazırda bankın Avstriya, İsveçrə, Türkiyə, Rusiya, Ukrayna və s. ölkələrdə də müxbir hesabı mövcuddur.

"AtaBank" keyfiyyətli idarəetmə sisteminin müasir standartlara uyğunluğunun təmin edilməsi məqsədilə, sertifikatlaşdırma işlərini müvəffəqiyyətlə başa çatdıraraq "Burcan Veritas" şirkəti tərəfindən 03 aprel 2007-ci il tarixli, 210667 nömrəli bütün növ bank xidmətlərini əhatə edən "İSO 9001 : 2000" sertifikatı ilə təltif edilmişdir və cari ilin aprel ayında təkrar audit keçirilərək sertifikat qüvvədə saxlanılmışdır.

2008-ci ilin sonuna kimi "AtaBank" yeni "Məlumat Mərkəzi"ni müştərilərə təqdim etmək ərəfəsindədir. Buradan müştəri nəinki bank və məhsullar haqqında məlumat ala biləcək, hətta öz hesabı haqqında da informasiya almaq imkanına malik olacaqdır.

Regionlarda kiçik və orta sahibkarlığın maliyyələşdirilməsi "AtaBank"ın mühüm strateji məqsədlərindən biridir. Müəyyən etibar qazanmış "AtaBank" hazırda "Sahibkarlığa Kömək Milli Fondu" Dövlət Proqramı üzrə əsas operatorlardan biri hesab olunur. SKMF-nin xətti ilə verilmiş kreditlərin ümumi həcmi 12.0 milyon manata yaxındır. Bank tərəfindən verilmiş ipoteka kreditlərinin sayı 88 ədəd təşkil edir və ümumilikdə 3.6 milyon manatı keçmişdir.

2008-ci il oktyabr ayının yekunlarına görə "AtaBank"ın depozit portfeli 2,4 faiz və ya 1,8 milyon manat artaraq 76,5 milyon manat olmuşdur. Qeyd edək ki, 2008-ci ilin əvvəlinə bu göstərici 74,6 milyon manat təşkil edirdi. Son 1 il ərzində fiziki şəxslərin müddətli depozitləri 46,5 faiz və ya 16,3 milyon manat artaraq 51,4 milyon manat təşkil etmişdir.

"AtaBank"ın xalis mənfəəti də on ay ərzində kifayət qədər artmışdır. 2008-ci il ərzində bankın ümumi gəlirləri ilin əvvəlinə nisbətən 7,6 milyon manat və ya 62 faiz artaraq 19,9 milyon manatı keçmişdir. Qeyd edək ki, 01.11.2008-ci il tarixinə bankın aktivlərinin gəlirlilik dərəcəsi (ROA) 4,91 faiz, kapitalın gəlirlilik səviyyəsi isə 44,05 faiz təşkil edir. Keçən ilin müvafiq dövrünə bu göstəricilər 3,58 faiz və 27,5 faiz təşkil edirdi.

2008-ci il ərzində bankın nizamnamə kapitalı 3,5 milyon manat artırılaraq 15,0 milyon manata çatdırılmışdır. Noyabr ayının əvvəlinə bankın məcmu kapitalı 20,1 milyon manatı keçmişdir.

2009-cu ildə "AtaBank"ın maliyyə göstəricilərinin artımı və institusional inkişafının daha da uğurla davam etdirilməsi planlaşdırılır. Belə ki, bank 2009-cu ildə xidmət şəbəkəsini genişləndirməyi, əməkdaşların professional səviyyəsini daha da təkmilləşdirməyi, yeni xidmətlər və məhsullar tətbiq etməyi, beynəlxalq kredit və depozit reytinqini almağı və s. məqsədləri qarşısına qoymuşdur.

Tədbir belə bir inamla yekunlaşdı ki, bank Azərbaycanın parlaq gələcəyi və iqtisadi inkişafı naminə bundan sonra da inamla fəaliyyət göstərəcək.

Vəliyev M.

Respublika.- 2008.- 21 noyabr.- S.6.