Rus Mərkəzi xalqlarımızın daha da yaxşılaşmasına xidmət edəcək

Son vaxtlar Azərbaycanla Rusiya arasında əlaqələr getdikcə intensivləşir. Azərbaycan Respublikasının Prezidenti İlham Əliyevin Rusiya Federasiyasına rəsmi səfəri, iki ölkə prezidentlərinin görüşləri, müzakirə olunan məsələlər ölkələrimiz, xalqlarımız arasında hərtərəfli əlaqələrin bundan sonra da inkişaf etdirilməsinə xidmət edir.

Bakı Dövlət Universitetində təşkil olunmuş Rus Mərkəzinin açılış mərasimində çıxış edənlər bu və ya digər məsələlər barədə ətraflı danışmışlar. Tədbiri universitetin rektoru, akademik Abel Məhərrəmov açaraq fəaliyyətə başlayan mərkəzin əhəmiyyətindən danışdı. Qeyd etdi ki, rus mədəniyyəti və dilinin populyarlaşdırılması və qorunması məqsədilə Rusiya Federasiyası prezidentinin 21 iyun 2007-ci il tarixli sərəncamı ilə təsis edilən "Rus dünyası" fondu rus mərkəzləri şəbəkəsinin yaradılması üzrə layihələr həyata keçirir. "Rus dünyası" fondu bu mərkəzlərin açılış proqramları, kitabxana, o cümlədən ensiklopediyalar, soraq nəşrləri, rus dili lüğətləri, bədii tədris, uşaq ədəbiyyatı və s. rus kinematoqrafiyasının klassikası, audio kitablar, tədris-metodik vəsaitləri kimi multimedia nəşrləri, rus dili tədris proqramları ilə təmin etməyi nəzərdə tutur. Fond həmçinin mərkəzin istifadəçilərini Rusiyanın mərkəzi kütləvi informasiya vasitələrinin elektron versiyalarına pulsuz çıxışını təmin edir. Belə bir mərkəzin ilk dəfə Bakı Dövlət Universitetində açılması sevindirici haldır. Mərkəz tələbələrimiz üçün Rusiyaya açılan bir pəncərədir.

Sonra söz "Rus dünyası" fondu idarə heyətinin icraçı direktoru Vyaçeslav Nikonova verildi. O, fondun məram və məqsədindən, bundan sonra nəzərdə tutulan layihələrdən danışdı: "Rus dili dünyanın ən çox işlənən dillərindən biridir və bu gün dünyanın bir çox yerlərində bu dildən istifadə olunur. SSRİ-nin süqutundan sonra ittifaqa daxil olan müttəfiq respublikalarda bu dilə münasibət dəyişdi. İndi yenidən rus dilinə maraq artmaqdadır. "Rus dünyası" fondu rus dilinin populyarlaşdırılması və qorunması missiyasını öz üzərinə götürmüşdür. Rus mərkəzləri də buna xidmət edir. Bakı Dövlət Universitetində açılan mərkəz tələbələrə Rusiya tarixi, mədəniyyəti, ədəbiyyatı ilə yaxından tanış olmağa imkan yaradacaqdır. Bu, həm də Azərbaycan-Rusiya əlaqələrinin inkişafına töhfələr verəcəkdir. Bugünədək Belçika, Yaponiya, ABŞ, Tacikistan, Qırğızıstan, Qazaxıstan və Ermənistanda belə mərkəzlər açılmışdır. Ümumiyyətlə, 50-dən artıq belə mərkəzin yaradılması barədə razılıq alınmışdır. Biz Azərbaycanda ilk dəfə açılan Rus Mərkəzinin inkişafına kömək edəcəyik".

Rusiyanın Azərbaycandakı fövqəladə səfiri Vasili İstratov ölkəmizdə olduğu iki il müddətində tarixi və mədəni əlaqələri olan xalqlarımızın yaxınlaşması istiqamətində görülmüş işlərdən danışdı və yeni açılan Rus Mərkəzinin Azərbaycanın ən nüfuzlu və qocaman təhsil müəssisələrindən biri olan BDU-da açılmasından məmnun qaldığını dedi.

Sonda Bakı Dövlət Universiteti adından üzərində Azərbaycan və Rusiya prezidentlərinin portreti işlənilmiş tablo Rus mərkəzinə hədiyyə edildi.

Qurbanqızı Z.

Respublika.- 2008.- 29 noyabr.- S.4.