Sığorta-pensiya sisteminin dinamik inkişafı üçün tədbirlər görülür

Azərbaycanda sığorta-pensiya sistemində həyata keçirilən islahatların növbəti mərhələsini müəyyənləşdirən "2009-2015-ci illərdə Azərbaycan Respublikasında sığorta-pensiya sisteminin inkişafına dair Dövlət Proqramı" pensiya təminatında sığorta prinsiplərinin gücləndirilməsini və tədricən yığım komponentinin tətbiqinə keçidi nəzərdə tutmaqla pensiya islahatlarının daha da dərinləşdirilməsini, aparılan islahatlar nəticəsində qurulmuş yeni sığorta-pensiya sisteminin dayanıqlı və dinamik inkişafına nail olunmasını, bu zəmində vətəndaşların pensiya təminatının daha da təkmilləşdirilməsini özündə ehtiva edir. Dövlət Sosial Müdafiə Fondu İctimaiyyətlə əlaqələr sektorunun məlumatına görə Prezident İlham Əliyevin 30 dekabr 2008-ci il tarixli sərəncamı ilə təsdiq edilmiş Dövlət Proqramında yer alan əsas vəzifələr sırasına sığorta-pensiya sisteminin fəaliyyətində sığorta prinsiplərinin gücləndirilməsi və qeyri-sığorta xarakterli ödəmələrin tənzimlənməsi mexanizmlərinin təkmilləşdirilməsi, vətəndaşların 2006-cı il yanvarın 1-dən əvvəlki dövrdə qazanılmış pensiya hüquqlarının yeni əmək pensiyaları sisteminə daha sıx inteqrasiyasının təmin edilməsi, məcburi dövlət sosial sığortasının təkmilləşdirilməsi və könüllü pensiya sığortasının inkişaf etdirilməsi, əmək pensiyalarının yığım komponentinin fəallaşdırılması və qeyri-dövlət pensiya institutlarının formalaşdırılması və inkişaf etdirilməsi, bütövlükdə sığorta-pensiya sisteminin cari ödəmə qabiliyyətinin, habelə orta və uzunmüddətli maliyyə dayanıqlığının təmin edilməsi, sığorta-pensiya sisteminin fəaliyyətində müasir informasiya-kommunikasiya texnologiyalarının geniş tətbiqinə nail olunması, idarəetmənin tam avtomatlaşdırılması və fərdi uçot sisteminin əhatəli inkişafının təmin olunması daxildir.

Dövlət Proqramına uyğun olaraq 2009-2015-ci illərdə sığorta-pensiya sisteminin inkişafı sığorta-pensiya sisteminin fəaliyyətinin aktual modellər əsasında təkmilləşdirilməsi, məcburi dövlət sosial sığortası sahəsində fəaliyyətin, həmçinin əmək pensiyası təminatının təkmilləşdirilməsi, dövlət sosial sığorta sistemində fərdi uçotun inkişafı, sığorta-pensiya sistemində yığım komponentinin tətbiqi istiqamətlərində işlər görüləcək. Proqrama əsasən sığorta-pensiya sisteminin aktual təhlilinə əsaslanmaqla sistemin orta və uzun-müddətli inkişafı üzrə tədqiqatların təşkili, sığorta-pensiya sisteminin perspektiv inkişafının aktuar modelləşdirmə əsasında proqnozlaşdırılmasının təmin edilməsi həyata keçiriləcək. Bundan başqa, bütün sığorta olunanlar üzrə ödənilən sosial sığorta haqları ilə pensiya və müavinətlər arasında əlaqənin gücləndirilməsinə dair, işləyənlərin sosial müdafiəsinin və gələcək pensiya təminatı hüquqlarının qorunması məqsədi ilə qeyri-leqal əmək münasibətlərinin rəsmiləşdirilməsi ilə bağlı və əməkhaqlarının süni surətdə aşağı məbləğlərdə müəyyənləşdirilməsi hallarının qarşısının alınması üzrə qanunvericilikdə dəyişikliklərin edilməsi barədə müvafiq təkliflər hazırlanacaq.

Proqramda məcburi dövlət sosial sığorta haqları sahəsinə də xüsusi diqqət göstərilib. Belə ki, sənəd əsasən məcburi dövlət sosial sığorta haqları hesabına ödənilən müavinətlərin hesablanması və verilməsində sığorta prinsiplərinin tətbiqinə dair təkliflər hazırlanacaq, məcburi dövlət sosial sığorta haqları hesabına ödənilən müavinətlərin təyin olunması və uçotunun avtomatlaşdırılması reallaşdırılacaq.

Onu da qeyd edək ki, Dövlət Proqramından irəli gələn vəzifələrin icra müddətləri konkretləşdirilib və bu sənəd "2008-2015-ci illərdə yoxsulluğun azaldılması və davamlı inkişaf Dövlət Proqramı"nda müəyyən olunmuş strateji məqsədlərin əldə olunmasına öz töhfəsini verəcək.

Mustafa KAMAL

Respublika.- 2009.- 16 yanvar.- S. 4.