Son beş ildə qəbul olunmuş proqramlar və həyata keçirilən layihələr uğurla başa çatdırılmışdır

Bu gün dünyanı bürüyən iqtisadi böhran bir çox ölkələrin iqtisadiyyatına ağır zərbələr vursa da, Azərbaycanın dinamik inkişaf strategiyası və həyata keçirilən davamlı və düşünülmüş siyasət kursu yarana biləcək çətinliklərin qabaqlanmasına imkan vermişdir. Odur ki, Azərbaycanda həyata keçirilən bütün proqramlar və beynəlxalq əhəmiyyətli layihələr uğurla reallaşmışdır.

Artıq tarixə çevrilmiş 2008-ci il respublikamızın həyatında olduqca əlamətdar hadisələrlə yadda qalmış, həm siyasi, həm də iqtisadi cəhətdən uğurlu olmuşdur. Son dörd ildə ümumi daxili məhsulun artım dinamikasına görə dünyada birinci olan Azərbaycanda ötən il ərzində də hərtərəfli islahatlar aparılmış, özəl sektorun daha da çiçəklənməsi üçün təsirli addımlar atılmış, "Bir pəncərə" sisteminin tətbiqinə başlanılmış, dövlət investisiya xərcləri nəzərə çarpacaq dərəcədə artırılmış, infrastruktur sahələrin müasir tələblər səviyyəsinə qaldırılması üçün xeyli işlər görülmüş, yeni yollar, körpülər, yol keçidləri istifadəyə verilmişdir. Minlərlə işçi çalışan yeni istehsal müəssisələrinin istifadəyə verilməsi, kənd təsərrüfatı sahələrinə güzəştli kreditlərin ayrılması, kənd təsərrüfatının vergi güzəştlərinin daha beş il müddətinə uzadılması, regionların sosial iqtisadi inkişafı Dövlət Proqramının icrasının uğurla başa çatdırılması Azərbaycanın iqtisadi inkişafına əlavə təkan vermiş, əhalinin məşğulluq səviyyəsinin daha da yüksəlməsində özünü göstərmişdir.

Azərbaycanda liberal iqtisadi sistemin uğurla təşəkkül tapması və günbəgün genişlənməsi ölkədə yaradılan əlverişli investisiya mühitinin nəticəsidir. Təsadüfi deyil ki, Azərbaycan iqtisadiyyatında özəl sektorun xüsusi çəkisi artıq 85 faizə yüksəlmiş, 2008-ci ildə Dünya Bankı respublikamızı bir nömrəli islahatçı ölkə kimi elan etmişdir.

Bütün bunlar Azərbaycana olan marağı daha da arıtırmaqla bərabər, ölkəmizin beynəlxalq nüfuzuna da olduqca müsbət təsir göstərir, ayrı-ayrı sahələrə xarici sərmayə axınının güclənməsinə əlavə stimul verir. Əldə olunan iqtisadi nailiyyətlərin qorunub saxlanılması və davam etdirilməsi üçün Azərbaycan dövlətinin bundan sonra da öz siyasətinə sadiq qalacağını bildirən ölkə Prezidenti İlham Əliyev Dünya Azərbaycanlılarının Həmrəyliyi Günü və Yeni il münasibətilə xalqa müraciətində demişdir: "Azərbaycanda iqtisadiyyatın inkişafı üçün bütün lazımi tədbirlər görülür. Dövlət sahibkarlığın inkişafını dəstəkləyir və növbəti illərdə bu dəstək daha da böyük olacaqdır. Bunun nəticəsində bu gün Azərbaycan iqtisadiyyatının 85 faizi özəl sektorda formalaşır. Bu, böyük nailiyyətdir və onu göstərir ki, Azərbaycanda siyasi və iqtisadi islahatlar ölkəmizin hərtərəfli inkişafına xidmət edir və ölkəmizi gücləndirir. Biz bundan sonrakı illərdə də iqtisadi inkişafa böyük diqqət göstərəcəyik və əminəm ki, qarşıda duran bütün vəzifələrə nail olacağıq".

Özünün iqtisadi qüdrətinə və siyasi çəkisinə görə Cənubi Qafqaz regionunda lider ölkəyə çevrilən Azərbaycan artıq dünyanın enerji təhlükəsizliyində özünəməxsus yeri və zəngin potensialı ilə mühüm əhəmiyyət kəsb edir. Dövlət başçısının bildirdiyi kimi, bu bizə həm siyasi, həm iqtisadi dividendlər gətirir və yeni imkanlar açır. Ümummilli liderimiz Heydər Əliyev tərəfindən əsası qoyulmuş Bakı-Tbilisi-Ceyhan əsas ixrac neft kəməri uğurla fəaliyyət göstərir, ölkə iqtisadiyyatının güclənməsinə layiqli töhfələr verir. Artıq dünya ölkələri Azərbaycanın neft strategiyasının uğurlarından öyrənməyə, ölkəmizin bu sahədəki zəngin təcrübəsini bölüşməyə ehtiyac duyur. Ötən il Bakıda keçirilən Enerji Sammiti, aparılan geniş müzakirələr və qəbul edilən qərarlar bunun əyani təzahürüdür.

Ölkəmizin iqtisadi imkanları genişləndikcə sosial məsələlərin həllinə diqqət artırılır, xalqın rifahının yaxşılaşdırılması üçün daha təsirli addımlar atılır. Təsadüfi deyil ki, son beş il ərzində Azərbaycanda yoxsulluq şəraitində yaşayanların sayı üç dəfədən çox azalmış, bu göstərici 49 faizdən 16 faizə düşmüşdür. Əhalinin sosial müdafiəsini gücləndirmək məqsədilə minimum əmək haqqı və minimum pensiya 50 faiz artırılmış, ünvanlı dövlət sosial yardımlarının verilməsi genişləndirilmişdir.

Azərbaycanın artan maliyyə imkanları ölkə təhsilinin inkişafına, səhiyyə sahəsinin mövcud tələbata uyğunlaşdırılmasına və müasirləşməsinə yönəldilir, yeni məktəblər, tibb ocaqları inşa edilir. Təqdirəlayiq haldır ki, bu işlər ölkənin bütün regionlarını əhatə edir, paytaxtla yanaşı, ucqar yaşayış məntəqələri də inkişaf edir. Son beş ildə respublikamızda 1600 yeni məktəb binası inşa olunmuş, ən müasir avadanlıqlarla təchiz edilmiş səhiyyə ocaqları istifadəyə verilmişdir. Bu, insanlara göstərilən səhiyyə xidmətlərinin keyfiyyətinin yüksəldilməsi ilə yanaşı, tibb sahəsində çalışan mütəxəssislərin müasir təcrübəyə yiyələnmələri üçün olduqca əhəmiyyətlidir. Artıq bölgələrdə yaşayan insanların müayinə və müalicə üçün paytaxta gəlməsinə o qədər də ehtiyac yoxdur.

Qazanılan uğurlarla yanaşı, Azərbaycanın həllini gözləyən ağrılı problemi də mövcuddur. Belə ki, Ermənistan-Azərbaycan, Dağlıq Qarabağ münaqişəsi öz ədalətli həllini tapmayınca, ölkəmizin ərazi bütövlüyü bərpa olunmayınca regionda dayanıqlı sabitlikdən danışmaq mümkün deyil. Azərbaycanın işğal olunmuş ərazilərinin geri qaytarılması üçün lazım gələrsə, hərbi gücümüzdən də istifadə ediləcəyini bildirən dövlət başçısı hələlik diplomatik səylərə və danışıqlar prosesinə üstünlük verildiyini önə çəkib: "Amma bununla bərabər, bu məsələnin həlli üçün, Ermənistan-Azərbaycan, Dağlıq Qarabağ münaqişəsinin ədalətli, Azərbaycanın ərazi bütövlüyü çərçivəsində həlli üçün biz öz səylərimizi göstəririk. 2008-ci ildə Birləşmiş Millətlər Təşkilatının Baş Məclisində Azərbaycanın işğal altında qalan torpaqlarında vəziyyətlə bağlı çox önəmli qətnamə qəbul edilmişdir. Baxmayaraq ki, BMT Təhlükəsizlik Şurasının beş daimi üzvündən üçü Minsk qrupunun həmsədrləri bu qətnamənin əleyhinə çıxmışdı, qətnamə böyük səs çoxluğu ilə qəbul edilmişdir. Bir tərəfdən bu, Azərbaycanın gücünü göstərir, Azərbaycanın artan nüfuzunu göstərir, digər tərəfdən, onu göstərir ki, haqq-ədalət öz yerini tutmalıdır". Məhz bütün bu amillər Azərbaycanın artan iqtisadi potensialı, hərbi gücü, beynəlxalq nüfuzu və ən başlıcası dövlət başçısının qəti iradəsi Ermənistan rəhbərliyini və ictimaiyyətini reallıqla barışmağa meyilləndirir. Ancaq qonşu ölkənin müstəqil siyasət yürüdə bilməməsi, xalqın iradəsinin əksinə olan siyasi kurs tutması onları regional əməkdaşlıqdan və müasir dünyaya inteqrasiyadan məhrum edir. Bütün bunlar isə son nəticədə özünütəcrid siyasəti yürüdən Ermənistanın Azərbaycanın haqlı mövqeyi ilə razılaşacağını, işğalçılıq siyasətindən əl çəkəcəyini deməyə əsas verir.

Azərbaycanın son beş il ərzində əldə etdiyi möhtəşəm nailiyyətlər ölkə Prezidenti İlham Əliyevin ardıcıl və məqsədyönlü siyasi kursundan güc alır. Xalqın rifahının yüksəldilməsini, ölkənin iqtisadi qüdrətinin möhkəmləndirilməsini, beynəlxalq nüfuzunun artırılmasını dövlət siyasətinin prioritetinə çevirən dövlət rəhbəri yerlərdə olur, sadə insanlarla birbaşa ünsiyyətə üstünlük verir, əhalinin qayğıları ilə şəxsən maraqlanır. Məhz xalqa olan məhəbbətin və bağlılığın nəticəsidir ki, 2003-cü ildə olduğu kimi, ötən il keçirilən prezident seçkilərində də xalq öz iradəsini azad şəkildə ifadə edərək bir daha cənab İlham Əliyevə yüksək etimad göstərdi. Bu baxımdan növbəti beş il ərzində Azərbaycanın hərtərəfli inkişafının daha da genişlənəcəyinə, xalqın həyat səviyyəsinin daha da yaxşılaşacağına olan dərin ictimai inam və əminlik əsaslı və möhkəm köklərə söykənir. Son beş ildə keçilən yol, atılan uğurlu addımlar, qazanılan qələbələr məhz bu strateji siyasi kursun davam etdirilməsi zərurətini bir daha təsdiq edir, xalqın xoşbəxt gələcəyə olan sarsılmaz inamını daha da möhkəmləndirir.

Məmmədli B.

Respublika.- 2009.- 7 yanvar.- S.1-2.