Magistratura pilləsinə qəbul qaydalarında müəyyən
dəyişikliklər edilmişdir
Dünən Tələbə
Qəbulu üzrə Dövlət Komissiyasında (TQDK) mətbuat
konfransı keçirildi. Konfransı giriş sözü ilə
TQDK-nın sədr müavini Namiq Babayev açdı və
bildirdi ki, "Magistr" jurnalının 1-ci sayı
çapdan çıxmışdır. Jurnalın bu
sayında 2009/2010-cu tədris ili üçün ali məktəblərin
magistratura pilləsinə qəbul qaydaları dərc
olunmuşdur. Həmçinin magistratura pilləsinə
hazırlaşan bakalavrlara kömək məqsədilə nəinki
təfəkkürün yoxlanması üzrə qəbul
proqramı, həmin proqram əsasında izahlı test
nümunələri, xarici dillər və informatika üzrə
qəbul imtahanı proqramları da təqdim olunmuşdur.
TQDK qəbul
imtahanının məzmununun və qiymətləndirmə
mexanizminin təkminləşdirilməsi istiqamətində həyata
keçirdiyi tədbirlərin davamlı olaraq magistratura pilləsinə
qəbul qaydalarında müəyyən dəyişikliklər
etmişdir. Belə ki, 2009/2010-cu tədris ilindən ali məktəblərin
magistratura pilləsinə qəbul imtahanlarının iki mərhələdə
keçirilməsi nəzərdə tutulur. İmtahanların
birinci mərhələsinin təxminən aprel ayının
sonunda, ikinci mərhələsini isə iyun ayının
sonunda keçirilməsi nəzərdə tutulur. Birinci mərhələdə
bakalavrların məntiqi təfəkkürü, xarici dil və
informatikadan bilik səviyyəsi test üsulu ilə yoxlanılacaq.
İkinci mərhələdə isə ixtisas üzrə
biliklərin yoxlanılması aparılacaqdır. Müsabiqə
iki mərhələnin ümumi balı əsasında həyata
keçiriləcəkdir.
Yeni qaydalara əsasən,
magistraturaya qəbul zamanı aparılan ixtisaslar qəbul
proqramları üzrə qruplaşdırılır. Müəyyən
proqramlar daxil olan ixtisaslar seçən bakalavrlar ixtisas üzrə
test tapşırıqlarının əvəzinə təqdim
edilmiş suallara yazılı şəkildə cavab verməlidirlər.
Xarici dil kimi Azərbaycan bölməsinin bakalavrlarına
ingilis, alman, fransız və ya rus dilini, rus bölməsinin
bakalavrlarına isə ingilis, alman və ya fransız dilini
seçmək imkanı verilir. Tədrisi ingilis dilində olan
ixtisaslara sənəd verən bakalavrlar xarici dil kimi yalnız
ingilis dilini seçə bilərlər.
Qeyd edək ki, ötən
ildən magistratura pilləsinə qəbul zamanı 473 yer
boş qalmışdır. Belə ki, həmin boş qalan yerlərə
TQDK müsabiqə keçirir. Müsabiqədə iştirak
etmək istəyən bakalavrlar yanvar ayının 7-dən-16-na
kimi keçiriləcək sənəd qəbulunda iştirak
edə bilərlər. Sənəd qəbulu yanvar
ayının 16-da başa çatacaq.
Hüseynova G.
Respublika.- 2009.- 7 yanvar.- S. 3.