Biz hər an hazır olmalıyıq ki, öz doğma torpaqlarımızı istənilən yolla işğalçılardan azad edək

Son dörd ildə iqtisadi artım baxımından dünyada birinci yeri tutan Azərbaycan Dağlıq Qarabağ problemi istisna olmaqla qarşısında duran bütün məsələləri müvəffəqiyyətlə həll etmişdir. Ölkəmiz bu problemi də həll etməyə qadirdir. 2008-ci ildə bu istiqamətdə aparılan siyasət Azərbaycana böyük dividendlər qazandırmışdır. Keçən il noyabrın 2-də Rusiya Federasiyasının paytaxtında qəbul edilmiş Bəyannamə Dağlıq Qarabağ probleminin çözülməsində ən dəyərli sənədlərdən biri kimi qiymətləndirilməlidir. Münaqişənin dinc yolla aradan qaldırılması, Dağlıq Qarabağın tərəf kimi tanınmaması və bəzi digər müddəalar ədalətin bərpa edilməsinə təminat yaradır ki, bu da ölkəmizin xeyrinədir.

Dağlıq Qarabağ problemini ölkənin başlıca prioriteti hesab edən və bunun həlli üçün səmərəli fəaliyyət göstərən Azərbaycan Prezidenti İlham Əliyev Dünya Azərbaycanlılarının Həmrəyliyi Günü və Yeni il münasibətilə Azərbaycan xalqına təbrikində bu məsələyə geniş yer ayıraraq demişdir: "Bildiyiniz kimi, bu istiqamətdə böyük işlər görülübdür. 2008-ci ildə ordu quruculuğu üçün lazımi tədbirlər görülübdür. Bizim bütün hərbi xərclərimiz 2 milyard dollara çatıbdır və 2009-cu ildə bu rəqəm daha da artacaqdır. Biz bunu edirik, bunu etməliyik, çünki biz müharibə şəraitində yaşayırıq, müharibə hələ bitməyibdir. Müharibənin birinci mərhələsi başa çatıb və biz hər an hazır olmalıyıq ki, öz doğma torpaqlarımızı istənilən yolla işğalçılardan azad edək. 2008-ci ildə keçirilən hərbi parad bizim hərbi gücümüzü hamıya göstərdi".

Dövlətimizin başçısı 2008-ci ildə də Ermənistan-Azərbaycan, Dağlıq Qarabağ münaqişəsinin ədalətli həlli üçün və eyni zamanda Azərbaycanın ərazi bütövlüyü çərçivəsində çözülməsi üçün səy göstərib. Görülən işlərin, səmərəli fəaliyyətin nəticəsidir ki, keçən il Birləşmiş Millətlər Təşkilatının Baş Məclisində Azərbaycanın işğal altında qalan torpaqlarında vəziyyətlə bağlı çox önəmli qətnamə qəbul edilmişdir. Bizim üçün yaxşı haldır ki, qətnamə dünya dövlətlərini təmsil edənlərin böyük səs çoxluğu ilə qəbul edilib. Fərəh hissi ilə demək lazımdır ki, bu, bir tərəfdən ölkəmizin beynəlxalq arenada artan gücünü və hörmətini göstərir, digər tərəfdən ona dəlalət edir ki, haqq-ədalət öz yerini tutmalıdır.

Azərbaycan rəhbərliyinin geniş və məqsədyönlü fəaliyyətinin fərəhli nəticəsidir ki, indi bütün dünya ictimaiyyəti Azərbaycanın haqq işini dəstəkləyir və tam əminlik var ki, Ermənistan-Azərbaycan, Dağlıq Qarabağ münaqişəsi ölkəmizin ərazi bütövlüyü çərçivəsində həll olunacaqdır. Başqa yol yoxdur, ölkəmiz öz torpaqlarını güzəştə getməyəcəkdir.

Azərbaycan Prezidenti İlham Əliyev səfərdə olduğu bütün ölkələrdəki yüksək səviyyəli görüşlərdə və beynəlxalq tribunalarda bu fikri dəfələrlə vurğulamışdır. Xalqımıza Yeni il təbrikində dövlət rəhbərimiz bu barədə danışarkən qətiyyətlə demişdir: "Azərbaycan dövləti və Azərbaycan xalqı heç vaxt Dağlıq Qarabağa müstəqillik verməyəcəkdir. Dağlıq Qarabağ əzəli Azərbaycan torpağıdır və biz Azərbaycanın ərazi bütövlüyünün bərpa olunması üçün bütün səyləri göstərəcəyik. Həm siyasi, həm diplomatik və lazım gələrsə hərbi üsullardan da istifadə etmək olar. Bu haqq bizdə var. Beynəlxalq hüquq bunu təmin edir".

Azərbaycanın Ermənistan üzərində hərbi, siyasi və iqtisadi sahələrdə üstünlüyü şəksizdir. Ordumuz güclü arsenala malikdir. Hərbi xərclərimizin 2 milyard dollara yüksəldilməsi bu üstünlüyün möhkəm qarantıdır. Orduda kadr potensialı yaradılmış, zabitlərin peşəkarlığı, əsgərlərin döyüş qabiliyyəti xeyli artırılmış, yüksək səviyyəyə çatdırılmışdır. Nizami hərbi hissələrimiz hər an torpaqlarımızı təcavüzkarlardan azad etməyə qadirdir. Ancaq ölkəmiz Dağlıq Qarabağ probleminin sülh yolu ilə həll edilməsinə üstünlük verir. Prezident İlham Əliyev dəfələrlə bildirmişdir ki, Azərbaycan öz torpaqlarını dinc vasitələrlə azad etmək istəyir, yenidən silah işlədilməsinə, qan tökülməsinə razı deyil. Ancaq bunun ardınca bəyan edib ki, son variant kimi hərbi əməliyyatlara əl atılması istisna deyil.

Qeyd etdiyimiz kimi, Azərbaycan bütün vasitələrdən istifadə etməklə işğal altında qalan qədim ata-baba torpaqlarını işğaldan qurtarmaq əzmindədir. Ermənistanın danışıqları pozması və mümkün qədər uzatması problemin həllinin müəyyən müddət yubadılmasına xidmət edir.

Azərbaycan torpaqlarının işğalı ermənilərə səadət gətirməmiş, əksinə, onları dünyaya vandal, etibarsız və qul xislətli bir xalq kimi tanıtmışdır. Havadarlarının və xaricdəki lobbilərinin məkrli niyyətlərinin qurbanına çevrilən Ermənistan tezliklə təcavüz siyasətindən əl çəkməli, qonşu dövlətlərlə normal münasibətlər yaratmağa çalışmalı, qloballaşan dünyada özünütəcriddən xilas olmalıdır. Başqa yol yoxdur və təcavüz niyyətindən əl çəkməmək Ermənistanı dibi görünməyən uçuruma aparır. Atalar deyib ki, zərərli yolun yarısından qayıtmaqda xeyirdir.

İlyasov Vəli

Respublika.- 2009.- 9 yanvar.- S. 1.