Azərbaycan 2008-ci ilin bir nömrəli islahatçı ölkəsi kimi tanınır

Prezident İlham Əliyev vurğulayıb ki, uğurlarımızın təməlində bizim siyasətimiz, düzgün xəttimiz və ölkəmizdə gedən müsbət prosseslər dayanır

2008-ci ildə xalqımız böyük uğurların, mühüm tarixi hadisələrin şahidi oldu. Yeni müəssisələr açıldı, iqtisadiyyat artdı, böyük, nəhəng infrastruktur layihələri həyata keçirildi. Azərbaycan inkişafının keyfiyyətcə yeni mərhələsini də uğurla başa vurdu. Hələ 2003-cü ildə Prezident seçkiləri ərəfəsində verilən vədlər, irəli sürülən konsepsiya və proqramlar həyatımızda öz real təsdiqini tapdı. Ölkəmizin daha da tərəqqisi və qüdrətlənməsi üçün həyati əhəmiyyətli möhkəm baza-siyasi, sosial-iqtisadi baza tam formalaşdı. Prezident İlham Əliyevin sədrliyi ilə Nazirlər Kabinetinin 2008-ci ildə sosial-iqtisadi inkişafın yekunlarına həsr olunmuş iclasındakı proqram xarakterli nitqində dövlətimizin başçısı son illər ərzində aparılan uğurlu iqtisadi islahatların 2008-ci ilin yekunlarında da özünü göstərdiyini, iqtisadiyyatın 21 faiz artdığını qeyd etdi: "Əgər dünyanın ən birinci, ən qabaqcıl maliyyə qurumu olan Dünya Bankı Azərbaycanı 2008-ci ilin yekunlarına görə ilin bir nömrəli islahatçı ölkəsi kimi tanıyırsa və bunu bəyan edirsə, bu, özü-özlüyündə göstərir ki, uğurlarımızın təməlində bizim siyasətimiz, düzgün xəttimiz və Azərbaycanda gedən müsbət proseslər dayanır".

Bütövlükdə 2008-ci il Azərbaycanın dinamik və hərtərəfli inkişafı baxımından çox uğurlu olub. Bu gün dünyada dərinləşən maliyyə böhranının təsiri nəticəsində hətta bir çox aparıcı ölkələrin iqtisadiyyatında yaranan durğunluğa baxmayaraq, Azərbaycan iqtisadiyyatı inkişaf etməkdədir. 2008-ci ildə ümumi daxili məhsulun real həcmi 2003-cü illə müqayisədə 2,6 dəfə artaraq, 38 milyard manat olmuş, o cümlədən qeyri-neft sektoru 1,8 dəfə, neft sektoru isə 4,1 dəfə artmışdır. Ümumi daxili məhsulda özəl sektorun payı 2008-ci ildə 84,5 faiz təşkil etmişdir. İl ərzində real artım 10,8 faiz, o cümlədən neft sektoru üzrə 7 faiz, qeyri-neft sektoru üzrə isə 15,7 faiz olmuşdur. Ümumi daxili məhsulun adambaşına düşən nominal həcmi 2003-cü ilə nisbətən 5 dəfə artaraq, 4.440 manat təşkil etmişdir.

Azərbaycan iqtisadiyyatı şaxəli şəkildə, davamlı tərəqqi yolundadır. Ötən il bu istiqamətdə çox mühüm addımlar atılıb. Ölkənin tərəqqisi, xalqın daha da yaxşı yaşaması naminə lazımi tədbirlər görülüb.

Bu baxımdan sosial məsələlərin həllinə yönələn addımlar xüsusilə təqdirəlayiqdir. Maaşların, pensiya və müavinətlərin artım tempi yüksəkdir və bu meyil davam etdirilir. Hazırda ölkədə orta aylıq əmək haqqı 268 manat təşkil edir ki, bu da ötən ilin müvafiq dövrünə nisbətən 24,2 faiz çoxdur. 2008-ci ildə əhalinin adambaşına düşən gəlirləri ötən illə müqayisədə 36,2 faiz artmışdır. Minimum aylıq əmək haqqı və əmək pensiyalarının baza hissəsi il ərzində artılaraq 75 manata çatdırılmışdır. Bunun nəticəsində təyin olunmuş aylıq pensiyaların orta məbləği ötən ilin müvafiq dövrü ilə müqayisədə 50 faizdən çox artaraq 96 manata çatmışdır.

Ölkəmizdə insanların rifah halının yaxşılaşdırılması istiqamətində atılan addımlar öz gözəl nəticələrini verir. Belə ki, ölkədə yoxsulluğun səviyyəsi 2003-cü ildəki 44,7 faizdən, 2008-ci ildə 13,2 faizə enib. Dövlətimizin başçısı iclasdakı nitqində bu məsələyə də toxunaraq bunu böyük nailiyyət kimi qiymətləndirib: "Ölkədə aparılan əsaslı, köklü iqtisadi islahatlar həm ölkənin iqtisadi potensialının möhkəmlənməsinə yönəlib, eyni zamanda və ilk növbədə, insanların rifah halının yaxşılaşmasında özünü göstərir".

Ümummilli lider Heydər Əliyevin müəyyənləşdirdiyi sosial-iqtisadi inkişaf strategiyasının uğurla davam etdirilməsi nəticəsində ölkəmiz son illərdə iqtisadi artım üzrə dünyada lider dövlətə çevrilmişdir. 2008-ci ildə də iqtisadiyyatın bütün sahələrində irimiqyaslı islahatların sistemli və düşünülmüş şəkildə davam etdirilməsi Azərbaycanı dünyanın ən islahatçı ölkəsi kimi tanıtmışdır.

Azərbaycan regionun və dünyanın böyük iqtisadi layihələrinin əsas tərəfdaşına çevrilmişdir. İclasda qeyd edildiyi kimi, Bakı-Tbilisi-Ceyhan, Bakı-Tbilisi-Ərzurum və Bakı-Tbilisi-Qars kimi nəhəng transmilli layihələr ölkəmizin siyasi və iqtisadi mövqelərini böyük dərəcədə möhkəmləndirmişdir. Enerji daşıyıcılarının nəqlinin şaxələndirilməsi istiqamətində də böyük işlər görülüb. Artıq Azərbaycan neftini və qazını dünya bazarlarına çıxaran 7 kəmər mövcuddur. Azərbaycan dost və tərəfdaş ölkələrin enerji təhlükəsizliyi məsələlərinin həllində böyük rol oynayır. Dövlətimizin başçısı bütün bunlara böyük önəm verildiyini bildirib və vurğulayıb ki, bölgədə enerji siyasəti baxımından Azərbaycanın əvəzolunmaz rolu vardır: "İki ay bundan əvvəl Bakıda keçirilmiş enerji sammiti bunu bir daha təsdiqlədi. Aparılan müzakirələr, sammitin nəticələri, qəbul edilmiş qərarlar bir daha onu göstərdi ki, bu bölgədə enerji məsələlərinin hansı istiqamətə yönəldilməsinə Azərbaycanın çox böyük təsiri vardır".

Azərbaycanın müstəqil dövlət olduğunu, müstəqil siyasət yeritdiyini və bu siyasətin Azərbaycanı son beş ildə böyük dərəcədə gücləndirdiyini xüsusi diqqətə yetirən cənab İlham Əliyev bildirib ki, həm iqtisadi, həm siyasi baxımdan bölgədəki rolumuzun artması Azərbaycanı çox yüksək pilləyə qaldırıb və bundan sonra da Azərbaycan xalqının iradəsi, milli maraqları, Azərbaycan dövlətinin milli maraqları, dövlətçilik prinsipləri bizim üçün əsas olacaqdır.

Prezident İlham Əliyev 2008-ci ildə Ermənistan-Azərbaycan, Dağlıq Qarabağ münaqişəsinin həlli işində əməli praktik nəticələr olmasa da, Azərbaycanın mövqeyinin daha da möhkəmləndiyini vurğulayıb. Belə ki, birgə bəyannamə Azərbaycan, Ermənistan prezidentləri tərəfindən imzalanmışdır. Bu o deməkdir ki, bu ölkələr münaqişənin tərəfləridir və münaqişənin heç bir başqa tərəfi yoxdur. Dövlətimizin başçısı bəyannamədə əksini tapan bütün fikirlərin tam təhlilini verərək bildirib ki, bu bəyannamə, əslində, Azərbaycanın mövqeyini əks etdirir.

Bu gün siyasi, iqtisadi və hərbi üstünlük Azərbaycan tərəfindədir. Biz bu üstünlükdən istifadə edirik və gələcəkdə də edəcəyik. Odur ki, ölkəmiz sülh yolunu əsas tutmasına baxmayaraq, istənilən anda öz torpaqlarını digər vasitələrlə də azad etmək iqtidarındadır.

Cənab İlham Əliyev nitqində 2008-ci ilin yekunlarının Azərbaycanda aparılan siyasətin təntənəsi olduğunu vurğulayıb. Dövlət başçısı bəyan edib ki, 2009-cu ildə də bütün nəzərdə tutulmuş vəzifələr icra edilməli və həmişə olduğu kimi, ilk növbədə diqqət mərkəzində Azərbaycan vətəndaşları olmalıdırlar: "Onların rifah halı, təhlükəsizliyi, yaxşı yaşaması bizim hamımızın borcudur".

Ş.ƏLİZADƏ,

Respublika.- 2009.- 18 yanvar.- S. 1.