Qəhramanlıq salnaməsi

20 Yanvar Azərbaycan xalqının tarixinə qanla yazılmış səhifələrdən biridir. O müdhiş gecə tariximizə təkcə faciə kimi yox, həm də mübarizlik, qəhrəmanlıq günü kimi daxil oldu. Faciədən bizi 19 il ayırır. Xalqımızın milli azadlıq tarixində müstəsna yer tutan, müstəqillik uğrunda imperiyaya qarşı qeyri-bərabər döyüşə atılaraq 1990-cı ilin 20 Yanvar gecəsində həlak olan insanların xatirəsi Azərbaycan Kooperasiya Universitetində də yad edildi.

Anım mərasimində universitetin rektoru Eldar Zülfüqarovun geniş məruzəsi dinlənildi. Natiq vurğuladı ki, xalqımız ötən əsrin 90-cı illərində milli azadlıq mübarizəsinə qalxaraq öz kimliyini bir daha sübut etdi, imperiya buxovlarından qurtulmaq yolunda qəti bir addım atdı. Doğrudur, həmin mücadilədə imperiyanın öncədən planlaşdırdığı qırğın nəticəsində çoxlu sayda itkilərimiz oldu, amma xalqımız sınmadı, əyilmədi, öz tarixinə şanlı səhifələr həkk etdi. 1990-cı il yanvarın 20-nə keçən gecə amansız güllələrdən 113 nəfər günahsız insan qurban getdi, xeyli sayda insan yaralandı.

Azərbaycanın informasiya blokadasına alındığı bir şəraitdə baş vermiş həqiqətləri operativ surətdə dünya ictimaiyyətinə çatdırmaq zərurəti yaranmışdı.

Dəhşətli faciəyə kəskin etiraz olaraq 1990-cı il yanvarın 21-də Azərbaycanın Moskvadakı daimi nümayəndəliyində mətbuat konfransı keçirən ümummilli öndərimiz Heydər Əliyev hadisəyə operativ qiymət verən ilk vətənpərvər ictimai-siyasi xadimlərdən idi. Bu qətiyyətli mövqe respublikamızın informasiya blokadasına alındığı ağır günlərdə totalitar rejimə ən ağır və sarsıdıcı zərbə oldu.

Heydər Əliyev çıxışında kommunist rejiminin gerçək simasını açmış, xalqımızın suveren hüquqlarına qəsd olunduğunu bildirmiş, SSRİ rəhbərliyini, totalitar rejimin "repressiya maşını"nı işə salan ermənipərəst, satqın Mixail Qorbaçovu bu hadisəyə görə heç nədən çəkinmədən bütün dünyada rüsvay etmişdir.

Eldar Zülfüqarov sözünə davam edərək bildirdi ki, 20 Yanvar hadisələrinin əsl qiymətinin verilməsi istiqamətində yalnız 1994-cü ildə ciddi addımlar atıldı. Azərbaycan Respublikasının Prezidenti Heydər Əliyevin 5 yanvar 1994-cü il tarixli fərmanı ilə Milli Məclisə 20 Yanvar hadisələrinə tam siyasi hüquqi qiymət verilməsi tövsiyə olundu. Milli Məclisin bir neçə gün davam edən iclasında Yanvar faciəsinin əsl səbəbləri açıqlandı, günahkarlar aşkar edildi, 1990-cı il yanvarın 20-də törədilmiş faciəli hadisələrə siyasi hüquqi qiymət verildi.

Heç nə yaddan çıxmır, heç nə unudulmur. Tarix yaddaşları silkələyib oyadan 20 Yanvar faciəsini, müstəqillik sevən xalqımızın nəyə qadir olduğunu heç vaxt öz səhifələrindən silməyəcəkdir. Haqq-ədalət uğrunda canlarından keçmiş şəhidlərin parlaq xatirəsi qəlbimizdə daim yaşayacaqdır. Bizim borcumuz isə o qanlı olaylarda qurban gedənlərin qaldırdıqları bayrağı başımız üstündə daha da uca tutmaqdır.

Anım mərasimində universitetin təlim-tərbiyə işləri üzrə prorektoru İlham Vəliyev, dekan Vilayət Əliyev çıxış edərək vurğuladılar ki, qanlı 20 Yanvar faciəsi Azərbaycanın azadlıq mübarizəsi tarixinin həm faciəli, həm də şanlı səhifələrindən biridir. Son yüzilliklərin ağrı-acısını çiynində daşıyan Azərbaycan xalqı 1990-cı ilin 20 Yanvarında çətin sınağa çəkildi. Arzusunu məşələ çevirən yüzlərlə, minlərlə azadlıq mücahidi tarixin bir göz qırpımı olan o qanlı Yanvar günlərini yaşadı.

20 Yanvar faciəsi qurbanlarının xatirəsinə həsr olunmuş anım mərasimində tələbələrin ifasında ədəbi-bədii kompozisiya nümayiş etdirildi.

Qədir ASLAN

Respublika.- 2009.- 22 yanvar.- S. 5.