Şəhidlər ölməzdir

Türkiyənin "İstanbul Beynəlxalq Qardaşlıq və Yardımlaşma Dərnəyi"nin Azərbaycandakı nümayəndəliyinin və Azərbaycan Respublikası 20 Yanvar Fondunun 20 Yanvar şəhidlərinin ailələri ilə görüşü, onlara yardımlar göstərilməsi artıq ənənə halını almışdır. 1994-cü ildən bu günədək hər il nümayəndəlik 20 Yanvar hüzn günü ərəfəsində Yanvar şəhidlərinin ailələrinə ərzaq yardımı göstərir, azacıq da olsa onların dərdinə şərik olmağa çalışır.

Azərbaycan Respublikası Gəncliyə Yardım Fondunun konfrans zalında təşkil olunmuş anım mərasimini fondun prezidenti Ahmet Tecim açaraq 20 Yanvar şəhidlərinin tariximizdəki yeri və Azərbaycan xalqının azadlıq mübarizəsi tarixində onların xidmətləri barədə danışdı. O dedi: "Hər bir xalqın tarixində azad və müstəqil yaşamaq üçün dönüm nöqtəsi hesab olunan tarixlər və bu azadlıq, müstəqillik uğrunda öz şirin canlarından keçmiş qəhrəman övladları olmuşdur. Belə qəhrəmanlar heç zaman unudulmur. 20 Yanvar şəhidləri də Azərbaycan xalqının yaddaşında azadlıq mücahidləri kimi daim yaşayacaqdır.

Bu gün biz də onların xatirəsini yad etməyə toplaşmışıq. Sevimli Peyğəmbərimiz buyurmuşdur: "Vətəni sevmək imandandır". Vətən yolunda şəhid olanları ölü sanmaq olmaz, onlar diridirlər. Özlərini Vətənin azadlığı uğurunda fəda etmiş 20 Yanvar şəhidləri kimi. 20 Yanvar tariximizdə önəmli, ehtiramla yad olunan bir gündür".

Nazirlər Kabineti Aparatının qaçqınların, məcburi köçkünlərin problemləri, miqrasiya və beynəlxalq təşkilatlarla iş şöbəsinin müdiri Qurban Sadıqov artıq ənənə halını almış bu tədbirin əhəmiyyətindən söz açdı: "Bu il 20 Yanvar faciəsinin 19-cu ildönümü tamam olur. 1994-cü ildən başlayaraq hər il bu münasibətlə tədbirlər keçirilir. Ümummilli liderimiz Heydər Əliyev 20 Yanvar faciəsinin bütün dünyada tanıdılmasına, şəhidlərin xatirəsinin əziz tutulmasına, diqqətlə yanaşır, bununla bağlı sərəncamlar imzalayırdı. Prezident İlham Əliyev də bu ənənəni davam etdirir. Ölkə başçısının sərəncamı ilə şəhidlər xiyabanının yenidən qurulması, qaçqın və məcburi köçkünlərə, şəhid ailələrinə dövlət qayğısının artırılması bunu bir daha təsdiqləyir. 20 Yanvar Azərbaycanın azadlığı uğrunda mübarizə tariximizdə mühüm hadisədir".

Türkiyə Respublikasının Azərbaycandakı fövqəladə və səlahiyyətli səfiri Hülusi Kılıç 19 il əvvəl baş vermiş qanlı terrorun görüntülərini o zaman türkiyədə televiziya vasitəsilə izlədiyini və bu hadisənin bütün türk xalqını hiddətə gətirdiyini dedi və həmin günün tarixi əhəmiyyətindən söz açdı: "O gün Azərbaycan öz birliyini nümayiş etdirdi, birlik olan yerdə güc olar. Şəhidlik uca bir zirvədir və hər kəsə nəsib olmaz. 20 Yanvar şəhidləri öz ölümləri ilə cənnət qapılarını üzlərinə açdılar. Bir millət, iki dövlət kimi biz hər zaman kədərimizi, sevincimizi bölməyə hazır olmalıyıq. Şəhidlərin ruhu şad olsun!".

Millət vəkilləri Novruz Aslanov, Fuad Muradov Azərbaycan dövlətinin qurulmasında mühüm rol oynayan 20 Yanvar faciəsinin əhəmiyyətindən danışdılar, dünyanın gözü qarşısında günahsız insanları sovet imperiyasının qoşunları tərəfindən qətlə yetirilməsi və günahkarların cəzalandırılmaması fatklarına münasibətlərini bildirdilər, bir daha belə faciələrin yaşanmaması üçün tariximizi unutmamağa çağırdılar: "Şəhidlərin ruhu o zaman şad olacaq ki, torpaqlarımızı azad edək. Bunun üçün hər kəs çalışmalıdır".

Şair Məmməd Aslanın çıxışı daha kövrək, daha duyğulu oldu: "O gün ağlayan təkcə insanlar deyildi, qərənfillər də torpağın köksünə sıxılaraq göz yaşı tökürdü. "Ağla, qərənfil, ağla" şeiri də o gün yazıldı. Qoy o gün bir də yaşanmasın!"— deyən şair yüz illərdən bəri türk və ümumən müsəlman dünyasına qarşı tuşlanmış bu müsibətlərin təkrarlanmaması üçün tariximizi unutmamağa səslədi.

Gəncliyə Yardım Fondunun prezidenti Ahmet Tecim tədbirə yekun vuraraq dedi: "Şəhidlik müqəddəs bir zirvədir. Şəhidlər bizim bu günümüz üçün, azad, müstəqil yaşamamağımız üçün şirin canlarından keçiblər, onların ailələrinə xüsusi qayğı göstərmək hər birimizin borcudur".

Görüşün sonunda Azərbaycan Respublikası Beynəlxalq Humanitar Yardım üzrə Respublika Komissiyası, Türkiyənin "İstanbul Beynəlxalq Qardaşlıq və Yardımlaşma Dərnəyi"nin, Azərbaycan nümayəndəliyinin və Azərbaycan Respublikası 20 Yanvar Fondunun təşəbbüsü və dəstəyi ilə 163 şəhid ailəsinə ərzaq-qida yardımı paylandı.

Zümrüd QURBANQIZI,

Respublika.- 2009.- 20 yanvar.- S. 6.