Vətənə sipər oğullar

Mavi Xəzərin nəğməli sahilləri ilə Qaradağ rayonuna yollanırıq. Hansı səmtə, hansı yana baxırsansa geniş quruculuq və abadlıq işləri diqqəti cəlb edir. Bu isə ilk növbədə ölkə rəhbərinin regionların sosial-iqtisadi inkişafına göstərdiyi qayğı və diqqətin bariz nümunəsidir. İş saatı yeni başlasa da rayonun hərbi komissarlığına doğru axışan insanların ardı-arası kəsilmirdi. Həmişəki kimi rayonun müharibə və əmək veteranları, pedaqoji kollektivlərin üzvləri ictimaiyyətin nümayəndələri hərbi xidmətə yola salınma mərasimində yüksək əhval-ruhiyyə ilə iştirak edirdilər. Burada çoxsaylı insanların sevincinə biz də qoşuluruq.

Qürur hissi geçiririk ki, qaradağlı gənclər, sabahın əsgərləri Cənubi Qafqazda lider dövlətə çevrilən müstəqil Azərbaycanın ərazi bütövlüyünü qoruyacaq, hərbi anda sadiq qalacaqlar.

Hərbi komissarlığın həyətinə daxil olarkən "Azərbaycanın Milli qəhrəmanları", "Ordun varsa, yurdun var", "Heydər Əliyev unudulmaz lider" və digər fotostend və yazılar diqqəti cəlb edir.

Şübhəsiz ki, belə təbliğat vasitələri gənclərin hərbi vətənpərvərlik tərbiyəsinin yüksəldilməsində müstəsna rol oynayır.

Burada biz ilk öncə bir qrup qaçqın və məcburi köçkünlərlə görüşüb söhbət etdik. İşğal altında qalmış torpaqlarımızdan nankor erməni daşnaklarının zaman-zaman türk xalqlarına qarşı düşmənçilik mövqeyində dayandıqlarından söhbət açdıq. Yurd eşqi ilə alışıb-yanan insanların yaralı yerinə toxunduq. Onlar əminliklə dedilər ki, biz bütün ümidimizi qüdrətli Azərbaycan ordusuna, bu gün əsgəri xidmətə yola düşən Koroğlu, Nəbi, Cavanşir qeyrətli balalarımıza, Vətənə sipər oğullara bağlamışıq. Əmin ola bilərik ki, onlar xidmət dövründə hərbi texnikanın sirlərinə mükəmməl yiyələnəcək, torpaqlarımızın keşiyində ayıq-sayıq dayanacaq, üçrəngli bayrağımızı həmişə başları üzərində qürurla dalğalandıracaqlar.

Həmişəki kimi hərbi xidmətə yola düşən gənclər öz doğmaları ilə xatirə şəkilləri çəkdirir. Müharibə veteranları onlara tövsiyə edirlər ki, xidmət dövründə ataların şanlı döyüş ənənələrini layaqətlə qoruyub saxlasınlar.

Budur, ortaya ani bir sükut çökür. Danışıq üçün söz rayonun hərbi komissarı polkovnik-leytenant Möhübbət Balayevə verilir. O, ilk öncə yolasalma mərasimində iştirak edən bütün insanları salamlayır, sonra isə sevincini onlarla yarı bölərək deyir:

—Əziz balalar, Vətən sizin kimi cəsur, şahin oğullarla fəxr edir. Siz yaxşı bilirsiniz ki, Şuşamız, Kəlbəcərimiz, Qarabağımız və digər bölgələrimiz ermənilər tərəfindən işğal olunmuşdur. Torpaqlarımızın düşməndən azad edilməsi üçün Prezident İlham Əliyev tərəfindən məqsədyönlü iş aparılır. Hər biriniz hərbi xidmət dövründə ayıq-sayıq olmalı, ermənilərdən qisas almağa hazır olmalısınız.

Hərbi xidmətə yola-salma mərasimində Elmar Səidov ürək sözlərini ifadə edərək dedi:

—İftixar hissi keçirirəm ki, mən bu gündən Azərbaycan əsgəri kimi şərəfli ad daşıyıram. Vətənə, xalqa sədaqətli olmaq hər birimizin müqəddəs borcudur. Əmin ola bilərsiniz ki, bizə göstərilən etimadı öz əməlimizlə doğruldaraq, xidməti borcumuzu şərəflə yerinə yetirəcək və gələcəkdə müstəqil Azərbaycanın çiçəklənməsi naminə əlimizdən gələn hər şeyi edəcəyik.

Əsgər atası Rəşadət Muradovun çıxışı hamıda xoş ovqat yaratdı. O vurğuladı ki, bu günü həyatımın ən gözəl yadda qalan anı hesab edirəm. Çünki oğlum Ceyhun bu gün ordu sıralarına yollanır. Gün o gün olsun ki, onlar Laçından, Qubadlıdan, doğma Qarabağımızdan müjdə xəbəri gətirsinlər...

Təntənəli mərasim başa catır. Gənclərdən Məftun Mustafayev, Şahin Yusifov və başqaları musiqi sədaları altında, valideynlərin xeyir-duası ilə əsgəri xidmətə yollanırlar.

Qədir ASLAN,

Respublika.- 2009.- 29 yanvar.- S.6.