YAP Nəsimi rayon təşkilatında Zərifə xanım Əliyevanın xatirəsi anıldı

Dünən Yeni Azərbaycan Partiyasının (YAP) Nəsimi rayon təşkilatının konfrans zalında görkəmli oftalmoloq-alim, akademik Zərifə xanım Əliyevanın xatirə günü ilə əlaqədar tədbir keçirildi. Budəfəki tədbir Azərbaycan Tibb Univerisitetinin oftalmologiya ixtisası üzrə təhsil alan sonuncu kurs tələbələrinin iştirakı ilə yazı müsabiqəsinin qaliblərinin mükafatlandırma mərasimi idi.

Tədbiri giriş sözü ilə açan YAP Nəsimi rayon təşkilatının sədri, millət vəkili Məlahət İbrahimqızı qeyd etdi ki, 1985-ci ilin bu bahar günündə dünyasını dəyişən, işıqlı amalların, nəcib duyğuların təcəssüm tapdığı bir ömür yaşayan Zərifə xanımın parlaq xatirəsi hər il anılır. O, qədirbilən xalqımızın qəlbində əbədi yaşayır: "Akademik Zərifə Əliyevanın alim kimi qazandığı böyük uğurlar Azərbaycan tibb elminin tarixində ayrıca bir mərhələ təşkil edir. Zərifə xanım Əliyeva Azərbaycan Dövlət Tibb Universitetini bitirəndən sonra Moskva Həkimləri Təkmilləşdirmə İnstitutunda təhsil alıb. 1949-cu ildə Azərbaycan Elmi-Tədqiqat Həkimləri Təkmilləşdirmə İnstitutunda elmi işçi kimi əmək fəaliyyətinə başlayıb və bütün ömrünü oftalmologiyaya həsr edib. 1983-cü ildə Azərbaycan Elmlər Akademiyasının həqiqi üzvü seçilib".

M.İbrahimqızı vurğuladı ki, Zərifə xanım qeyri-adi bir ana idi və övladlarına olan münasibət də xüsusi idi. Belə münasibətin bənzərini tapmaq çətindir: "O, uşaqları sanki Ulu Tanrı tərəfindən bəxş olunan bir nur payı kimi qəbul edirdi. O özünə rəhm etmirdi, analıq borcunu yerinə yetirməkdə də özünə rəhmi gəlmirdi. Hərdən analar uşaqlarına olan məhəbbətdə elə yüksək dərəcələrə çatırlar ki, bununla hamını heyrətə gətirirlər. Zərifə xanım belə analardan idi".

YAP Nəsimi rayon təşkilatının sədr müavini, səhiyyə nazirinin müavini Elsevər Ağayev çıxış edərək, bildirdi ki, Zərifə xanım Əliyeva müasir, müstəqil Azərbaycan dövlətinin memarı və qurucusu, bütün mənalı ömrünü Vətəninin və xalqının tərəqqisinə həsr etmiş dahi şəxsiyyətin, ümummilli lider Heydər Əliyevin vəfalı ömür-gün yoldaşı, sədaqətli dostu və etibarlı silahdaşı olub. O, ulu öndərimizə mənəvi dayaq, arxa olub: "Zərifə xanım yeganə akademik olub ki, göz xəstəliklərinin müalicəsi ilə əlaqədar zavodlarda, fabriklərdə, müəssisələrdə xüsusi laboratoriyaları var idi. Fəhlələri müalicə edib, çox insanlara şəfa veribdir".

Nazir müavini onu da vurğuladı ki, bütün həyatı boyu ona pənah gətirənlərin gözlərinə şəfa verən Zərifə Əliyevanın alim kimi xidmətlərində bir məqam diqqəti xüsusilə çəkir: "O, malyariya və traxomaya qarşı fədakarlıqla mübarizə aparan atası Əziz Əliyevin yolunu uğurla davam etdirib, oftalmologiya elminə çox böyük töhfələr verib. Zərifə Əliyeva gözün zədələnməsinin öyrənilməsi və profilaktikası sahəsindəki bir sıra orijinal kəşflərinə görə SSRİ Tibb Elmləri Akademiyasının akademik M.İ.Averbax adına mükafatına layiq görülüb. O, keçmiş SSRİ-də bu mükafatı alan ilk qadın alim idi".

Çıxış edən YAP Nəsimi rayonu üzrə Azərbaycan Tibb Universitetinin ilk ərazi təşkilatının sədri Sabir Əliyev bildirdi ki, Qədim Naxçıvanın Şərur rayonunun Şahtaxtı kəndində dünyaya göz açan Zərifə xanım çox zəngin və mənalı ömür yolu keçib. Zərifə xanım görkəmli ictimai və dövlət xadimi, xalqımızın böyük oğlu Əziz Əliyevin ailəsində dünyaya göz açıb. Atasının ömür yolu onun üçün əsil həyat məktəbi olub: "Akademik Zərifə Əliyeva həm də görkəmli ictimai xadim idi. O, keçmiş SSRİ Sülhü Müdafiə Komitəsinin üzvü, Azərbaycan Sülhü Müdafiə Komitəsi sədrinin müavini, Ümumittifaq "Bilik" Cəmiyyəti İdarə Heyətinin, Ümumittifaq Oftalmoloqlar Elmi Cəmiyyəti Rəyasət Heyətinin üzvü olub, "Əməkdar elm xadimi" fəxri adına layiq görülüb. Zərifə xanımın fəxri adları, elmi titulları, mükafatları olduqca çoxdur. Bu adların hər biri qürur, iftixar mənbəyidir. Amma bu adlar sırasında ən şərəflisi Ana adıdır. Zərifə xanım ümummilli liderimiz Heydər Əliyevin siyasi xəttinin layiqli davamçısı, artıq dünya siyasətində öz nüfuzu ilə seçilən, praqmatik fəaliyyəti ilə Azərbaycanı bölgənin lider dövlətinə çevirən Prezidentimiz İlham Əliyevin anasıdır".

Sonda qaliblər-Güllü İbadova - Nərmin Əliyeva, Anar Abdullayev mükafatlandırıldı.

Bunun davamı olaraq, Hemotologiya və Qanköçürmə İnstitutunda təşkilat qanvermə aksiyası keçirdi. "Canımız bir - qanımız bir" adlı bu aksiyanın əsas məqsədi leykozlu uşaqlara və süd vəzi xərçəngindən əziyyət çəkən imkansız qadınlara kömək etməkdən ibarətdir. Bu aksiyada 40-dan artıq fəal partiya üzvü könüllü sürətdə iştirak edərək, leykozlu uşaqlar və süd vəzi xərçəngindən əziyyət çəkən imkansız qadınlar üçün qan verdi. Qanvermə aksiyasına Türkiyəli Qadınların İş Birliyi Dərnəyi də qoşulub.

SEVİNC NƏZƏROVA

Səs.- 2010.- 28 aprel.- S. 7.