Media nümayəndələri Heydər Əliyevin və Həsən bəy Zərdabinin məzarını ziyarət ediblər

Milli Mətbuatın 135-ci il dönümü ilə əlaqədar olaraq Mətbuat Şurasının, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun üzvləri, yazılı və elektron medianın rəhbərləri Fəxri Xiyabanı ziyarət edib. SİA-nın məlumatına görə, media rəhbərləri ilk öncə Azərbaycan xalqının ümummilli lideri Heydər Əliyevin xatirəsini ehtiramla anıb, ulu öndərin məzarı önünə əklil qoyublar. Görkəmli oftalmoloq alim, akademik Zərifə xanım Əliyevanın da xatirəsini yad edib, məzarı üzərinə gül dəstəsi düzüblər. Daha sonra mətbuat nümayəndələri Milli Mətbuatın banisi Həsən Bəy Zərdabinin məzarını ziyarət edib önünə əklil qoyublar. Həsən bəy Zərdabinin həyat və yaradıcılığı barədə danışan Mətbuat Şurasının sədri Əflatun Amaşov Azərbaycan milli mətbuatının əsasını qoyan "Əkinçi" qəzetinin keçdiyi böyük tarixi yol haqqında ətraflı məlumat verib. "Azərbaycan" qəzetinin baş redaktoru, Milli Məclisin üzvü Bəxtiyar Sadıqov Azərbaycan mətbuatının bu 135 ildə şərəfli yol keçdiyini qeyd edib. Onun sözlərinə görə, Həsən Bəy Zərdabi maddi sıxıntılara baxmayaraq bu cür tarixi əhəmiyyət daşıyan "Əkinçi" qəzetinin nəşrinə nail oldu. Zərdabinin nəşr etdirdiyi "Əkinçi" qəzetinin tarixindən, qəzetin nəşri zamanı onun qarşısına çıxan çətinliklərdən danışan B.Sadıqov Həsən bəy Zərdabinin redaktor, naşir, darvinist alim kimi səmərəli fəaliyyətindən, jurnalist fədakarlığından, hökumət dairələrinin onu və ailəsini incitməyinə baxmayaraq gördüyü işlərdən danışıb. Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli Azərbaycanda 1993-cü ildən bəri media sahəsində həyata keçirilən dövlət siyasətinin mahiyyətcə mətbuatın saflığının qorunmasına, jurnalistikamızın mütərəqqi ənənələrinin bərqərar olmasına yönəldiyini qeyd edib . "Əkinçi" qəzetinin milli mətbuat tarixində rolu barədə danışan Vüqar Səfərli qeyd edib ki, bu gün Azərbaycan mətbuatı inkişaf mərhələsindədir və mətbuatın inkişafına dövlət dəstəyi günü-gündən artır.

Səs.- 2010.- 23 iyul.- S. 6.