“2 Fevral Gənclər Günü ulu öndər Heydər Əliyevin gənclərimizə hədiyyəsidir”

“SƏS” qəzetinin redaksiyasında gənclər gününə həsr olunmuş növbəti dəyirmi masa keçirildi

(Əvvəli ötən sayımızda)

Ənənəvi olaraq müxtəlif mövzular ətrafında dəyirmi masalar təşkil edən “SƏS” qəzeti budəfəki dəyirmi masanın mövzusunu da 2 Fevral Gənclər Gününə həsr etdi. Dəyirmi masada dövlət qurumlarının əməkdaşları, siyasi partiyaların gənclər birliklərinin rəhbərləri, QHT nümayəndələri, Azərbaycan Respublikası Ailə, Qadın və Uşaq Problemləri üzrə Dövlət Komitəsinin sektor müdiri Vəsilə Möhsümova, Azərbaycan Respublikasının İnsan Hüquqları üzrə Müvəkil (Ombudsman) Aparatının Hüquqi Maarifləndirmə Sektorunun baş məsləhətçisi Rəşid Rumzadə və böyük məsləhətçisi Faiq Ağayev, Yeni Azərbaycan Partiyasının Qaradağ rayon təşkilatının gənclər birliyinin sədr müavini Elçin Çobanov, Azad Respublikaçılar Partiyasının gənclər birliyinin sədri İlqar Abbasov, Azərbaycan Demokrat Partiyasının sədr müavini Vüsal Əliyev, Vəhdət Partiyasının gənclər birliyinin sədr müavini Tural Zayıdoğlu, Ana Vətən Partiyasının Gənc Anavətənçilər Assambleyasının sədri Fərid Mustafazadə və Demokratik İslahatlar Partiyasının gənclər birliyinin sədri Ramin Hacılı iştirak edirdilər.

Dəyirmi masanı giriş sözü ilə açan “SƏS” qəzetinin əməkdaşı bildirdi ki, hər il fevralın 2-si ölkədə gənclər günü kimi qeyd olunur. Bu bayramın gənclərə ümummilli liderimiz Heydər Əliyevin hədiyyəsi olduğunu söyləyən qəzetin əməkdaşı onu da qeyd etdi ki, ulu öndərimiz gəncliyimizi hər mənada güclü görmək istəyirdi və bunun üçün əlindən gələni edirdi: “Gənclik bir millətin yaşaması və inkişafı üçün təməl daşıdır. Bunun möhkəm olması isə yetişən nəslin sağlam təfəkküründən, düşünmə qabiliyyəti və inadkarlığından asılıdır. Səbəbsiz deyil ki, bütün dövrlərdə millətinin adını tarixə yazan da elə sağlam gənc qüvvələr olub. Bunu bilən ümummilli liderimiz Heydər Əliyev də belə qüvvələri yaratmaq arzusunda idi. Elə ona görə də, 1994-cü ilin iyulunda Gənclər və İdman Nazirliyi yaratdı və xalqının gənclərini bir araya topladı. 1996-cı il fevralın 2-də isə ilk dəfə müstəqil dövlətin gənclər forumu keçirildi və elə həmin günü Azərbaycanın tarixinə gənclər günü kimi yazdı”.

GƏNCLƏR ARASINDA BÖYÜK MAARİFLƏNDİRMƏ İŞİNİN APARILMASINA EHTİYAC VAR

Rəşid Rumzadə:

- Ali məktəb tələbələrinin problemlərinin həllini hər zaman ön planda saxlamışıq. Qeyd edim ki, Ombudsman Aparatının əməkdaşı olaraq fəaliyyətimin əsas hissəsini gənclərlə iş təşkil edir. Aparatın Gəncədə, Cəlilabadda, Qubada və Şəkidə yerləşən dörd regional mərkəzi fəaliyyət göstərir. Həmin mərkəzlər regionlar üzrə onlara daxil olan müraciətləri dərhal araşdırır və onları təmin edir. Orada çalışan insanlar da gənclərdən ibarətdir. Ötən ilin dekabr ayında gənclərimizin narkomaniya və digər pis vərdişlərdən çəkinməsi məqsədilə treninqlər təşkil etdik. Təbii ki, bu sahədə problemlər var. Əsas məsələ isə odur ki, bütün dövlət strukturları və gənclər təşkilatları səylərini birləşdirərək, mövcud problemlərin həllinə töhfə verməlidirlər. Belə olarsa, gənclərin zərərli vərdişlərdən tamamilə çəkinməsinə nail olmuş olarıq. Hamımız başa düşməliyik ki, gənclər arasında böyük maarifləndirmə işinin aparılmasına ehtiyac var. Nəzərə almaq lazımdır ki, bu günün gəncləri gələcəyin ailə başçılarıdır. Gələcək ailələrin də sağlam təməl əsasının formalaşması üçün bu addımın atılması olduqca vacibdir.

“Səs” qəzetinin əməkdaşı:

- Bölgələrdə yaşayan gənc ailələrlə paytaxtdakı gənc ailələr arasında əlaqələrin qurulması üçün hansı tədbirləri həyata keçirirsiniz?

AZƏRBAYCAN GƏNCİ OLARAQ VƏTƏNPƏRVƏRLİK HİSSİMİZİ QABARTMAĞA ÇALIŞMALIYIQ

Vəsilə Möhsümova:

- 2006-cı ildən etibarən bu sahə ilə əlaqədar intensiv tədbirlər həyata keçiririk. Tədbir keçirmək xatirinə 5-10 nəfəri bir yerə yığaraq, bunu mətbuatda işıqlandırmırıq. İş prinsipimiz bundan tamamilə uzaqdır. Dövlət Gənclər Proqramında nəzərdə tutulduğu qaydada gənclərin zərərli vərdişlərdən uzaqlaşdırılması, maarifləndirilməsi, öz hüquqlarını bilməsi, xüsusilə də, gənclərin hərbi vətənpərvərlik hissinin yüksəldilməsi məqsədilə çoxsaylı tədbirlər keçiririk. Bu cür tədbirlər ölkənin bütün regionlarında keçirilir, gənclərə maarifləndirici bukletlər, braşuralar paylanılır. Gənclərə hərbi vətənpərvərlik hissinin aşılanması üçün qaçqın və məcburi köçkün məktəblərindən birini pilot məktəbi elan etmişik. Orada ardıcıl olaraq treninqlər keçiririk. Regionlarda yaşayan gənc ailələrimizlə paytaxt ailələri arasında müəyyən fərqlərin olması təbiidir. Əgər kimsə bunun olmadığını iddia edirsə, bu, mümkün deyil. Əvvəla, şəhər insanının psixologiyası, düşüncə tərzi fərqli olur. Bölgələrdə elə kəndlərimiz var ki, qızlarımız orada internet klublara gedə bilməz. Həmin ərazinin insanları əxlaq və etik normaları baxımından buna yaxşı baxmırlar. Bu cür problemlərin də aradan qaldırılması üçün öncə düşüncələrdə dəyişikliklərə yol açmalıyıq. Ümumiyyətlə, yeni bir şey yarananda insanlarımız ona qarşı dirəniş göstərirlər. Düşüncələrdə dəyişikliklərə mərhələ-mərhələ nail olmalıyıq. Azərbaycan gənci olaraq, arzum budur ki, hansı sahədə işləməyindən asılı olmayaraq, hər bir gənc vətənpərvər olsun. Özünə qiymət verməyənə başqa heç kim qiymət verməz.

Avropa Birliyini yaradan Fransa dövlətidir. Lakin AB-nin konstitusiyasını Fransa dövləti rəsmən qəbul etmir. Çünki qəbul edərsə, bu, onun öz konstitusiyasından üstün olmalıdır. Millət özünə dəyər verdiyinə görə bu addımı atmır. Hər hansı bir beynəlxalq təşkilata üzv olmaq olar. Amma bu, o demək deyil ki, öz milli dəyərlərini qlobal dəyərlərə qurban verməlisən. Təbii ki, hər bir millətin içində nankorlar var. Azərbaycan gənci olaraq vətənpərvərlik hissimizi qabartmağa çalışmalıyıq. Unutmamalıyıq ki, bizim Dağlıq Qarabağ kimi ağır problemimiz, əsirlikdə olan oğul və qızlarımız, düşmən tapdağında qəbiristanlığımız var. Hər hansı azərbaycanlı gənc xaricdə ən yüksək təhsil ala və işlə təmin oluna bilər. Ancaq həmin gənc istər Azərbaycanda, istərsə də onun hüdudlarından kənarda olarkən öz milli dəyərlərini unutmamalıdır. Görkəmli azərbaycanlı Əhmədbəy Ağaoğlunun qızı Türkiyənin ilk qadın vəkilidir. Bilirsiniz ki, vəkillik sənəti Türkiyədə ən yüksək peşələrdən biridir. Bu cür faktları çox sadalamaq olar.

“Səs” qəzetinin əməkdaşı:

- Hər bir fərdin və qurumun istənilən məsələyə münasibəti fərqli olur. Maraqlıdır, sizin təmsil olunduğunuz siyasi təşkilatın gənclər siyasətinin məğzini nə təşkil edir?

Elçin Çobanov:

- YAP-ın gənclər siyasətinin əsas məğzi ondan ibarətdir ki, gənclər daha çox aktiv siyasi həyata qoşulsunlar. Dünyəvilik, azad vətəndaş cəmiyyətinin və demokratiyanın inkişafı prosesində gənclər ön sıraya çəkilsin. Bu istəyimizə nail oluruq. Hətta ötən il ölkəmizdə keçirilən bələdiyyə seçkilərinə Qaradağ rayonundan 33 nəfər gənc namizədliyini irəli sürmüşdü. Çox sevindirici haldır ki, bunlardan 27-si artıq bələdiyyə orqanlarının üzvüdür. Gənclərin seçkili orqanda iştirak etməsi üçün etimad qazanmaları xalqın onlara olan inamından qaynaqlanır.

Vüsal Əliyev:

- ADP-nin gənclər birliyi olaraq, çalışırıq ki, Dağlıq Qarabağ münaqişəsinin ədalətli həllində gənclərin rolundan istifadə edək. Digər tərəfdən, onların potensialından istifadə edərək, ölkəmizdə demokratiyanın inkişafına töhfə verməyə çalışırıq. Münaqişənin həllində isə demokratiyanın inkişafı mühüm amillərdəndir.

ERMƏNİSTANDA İNSAN HÜQUQ VƏ AZADLIQLARI, DEMOKRATİYA KAĞIZ ÜZƏRİNDƏDİR

Vəsilə Möhsümova:

- Ümumiyyətlə, ideal demokratiya dünyanın heç bir ölkəsində yoxdur. Bu anlayış antiyunan fəlsəfəsindən irəli gələn bir məsələdir. Bu gün demokratiya ilə dünyaya örnək olduğu bildirilən ABŞ-da bir nəfərdə olsun qadın prezident olmayıb. Tam səmimi bildirirəm ki, Azərbaycanda insan hüquqları, söz, fikir azadlığı pozulmur. Tənqidlə təhqirin qarışdırılması insan hüquqlarının pozulması demək deyil. Azərbaycanda kifayət qədər demokratiya var, insan hüquqlarının müdafiəsi üçün xüsusi qurumlar, Ombudsman Aparatı yaradılıb. Ölkəmizdə insan hüquqlarının pozulması haqqında deyilən fikirlər ədalətsizlikdir. Üstəlik, Ermənistanla müqayisə etsək, bu cür fikirləri səsləndirmək tamamilə yolverilməzdir. Ermənistanda insan hüquq və azadlıqları, demokratiya kağız üzərindədir. Ermənilərin yaşayış tərzi, həyat səviyyəsi ilə bizim vəziyyətimiz müqayisə olunmayacaq dərəcədə fərqlidir. Bu faktların arxasında duran əsas amil də dövlətin hansı formada idarə olunmasıdır.

Ramin Hacılı:

- Azərbaycanın özünü görmək istədiyi yer Avropadır. Bu istiqamətdə ölkəmizin görəcəyi iş mədəni, hüquqi və təhsil sahələrinin inkişafından keçir. Qarabağ münaqişəsinin həlli peşəkar Azərbaycan zabitləri və diplomatlarından asılıdır ki, bunun da əsasını təhsil təşkil edir. Ölkəmizdə demokratiyanın inkişafına tam nail olmaq üçün ayrı-ayrı məmurların özbaşınalığına son qoyulmalıdır. Təmsil olunduğum DİP-in yürütdüyü siyasətinin əsas məqsədi məhz mədəni, hüquqi və təhsil sahələrində olan problemlərin aradan qaldırılmasıdır. Partiyamız hüququn aliliyinə böyük əhəmiyyət verir. Hər yerdə bu amil çox vacibdir.

KÜBRA ƏLİYARLI,

SEVİNC NƏZƏROVA

Səs.- 2010.- 30 yanvar.- S.