Şabran - Azərbaycanın Əfsanələr Paytaxtı - 2011

Ölkəmizdə mədəniyyət müəssisələri şəbəkəsinin genişləndirilməsi, onların fəaliyyətlərinin əhəmiyyətli dərəcədə yeniləşdirilməsi və canlandırılması, milli mədəniyyətimizin inkişafı və təbliği istiqamətində mühüm addımlar atılır. Müasir mədəni-kütləvi tədbirlər milli dəyərlərimizlə, zəngin mədəni irsimizlə, Milli və dini adət - ənənələrimizlə əlaqələndirilir.

Milli-mənəvi dəyərlərimizə, xalqın əsrlərlə yaratdığı qeyri-maddi mədəni irsin qorunmasına, gələcək nəsillərə çatdırılmasına həmişə diqqət və qayğı ilə yanaşan Ümummilli Liderimiz Heydər Əliyevin siyasəti bu gün də uğurla davam etdirilir. Bu sahədə həyata keçirilən konseptual proqram və layihələrin davamı kimi Azərbaycan Respublikası Mədəniyyət və Turizm Nazirliyinin təsdiq etdiyi “2010-2014-cü illər üçün Xalq Yaradıcılığı Paytaxtları” Proqramına əsasən diyarşünaslıq, folklor və sənətkarlıq nominasiyaları üzrə ölkəmizin şəhər və rayonlarından daxil olmuş təkliflər, müvafiq namizəd şəhərlərin tarixi ənənələri, xalq yaradıcılığı subyektlərinin sayı, respublika və beynəlxalq tədbirlərdə iştirakı, mədəniyyət infrastrukturunun mövcud vəziyyəti və digər amillər nəzərə alınaraq qədim Şabran şəhəri 2011-ci il üçün “Azərbaycanın Əfsanələr Paytaxtı” elan edilmişdir. Layihənin həyata keçirilməsində məqsəd qədim və zəngin Azərbaycan qeyri-maddi mədəni irsinin müasir tələblərə cavab verə biləcək formada qorunması, bərpası və istifadəsini təşkil etməklə təbliğindən ibarətdir.

Şabranın 2011-ci il üçün Azərbaycanın Əfsanələr Paytaxtı seçilməsi ilə bağlı loqotip, müvafiq lövhələr, bayraqlar, suvenirlər hazırlanmış, təntənəli mərasim keçirilmişdir. Təsdiq olunmuş illik plana əsasən, müxtəlif genişmiqyaslı tədbirlərin-mərasimlərin, elmi-praktiki konfransların, konsert, müsabiqə, sərgi və digər mədəni tədbirlər təşkil edilmişdir. Keçirilən tədbirlərdə əsas diqqət ilk öncə tarixdə iz salmış şifahi xalq yaradıcılığı nümunələrinin, əsatir və əfsanələrin toplanıb təbliğ edilməsinə yönəldilmişdir.

“Əfsanələr Paytaxtı” elan edilmiş Şabranda rayon sənətkarlarının milli-mənəvi dəyərlərimizi özündə əks etdirən və yaşadan qədim sənət nümunələrindən ibarət tətbiqi sənət sərgisi təşkil edilmişdir. Milli alətlər, müxtəlif toxumalar, taxta üzərində oymalar, balıqqulağı və muncuqlardan hazırlanmış sənət əsərləri, yağlı boya ilə işlənmiş rəsm əsərləri, illüstrasiyalardakı millilik və rəngarənglik tamaşaçılar tərəfindən xüsusi maraqla qarşılanmışdır. Nümayiş etdirilən əsərlərin əsas mövzusunu tarixi keçmişimiz, təbiət lövhələri təşkil etmişdir. Xalçaçılıq nümunələrinə də sərgidə geniş yer ayrılmışdır. Şabran rayonunda toxunan xalçalar nəinki Azərbaycanda, xarici ölkələrdə də yaxşı tanınır.

Şabran “Azərbaycanın Əfsanələr Paytaxtı-2011” elan edilməsi ilə əlaqədar rayonun idarə və təşkilatlarında, həmçinin, ayrı-ayrı bölgələrində bayram tədbirləri keçirilmişdir. Rayon Tarix- Diyarşünaslıq Muzeyində bayram münasibətilə açıq qapı günü keçirilmiş, muzeyə gələn qonaqlara qeyri-maddi mədəni irsimiz olan folklor, sənətkarlıq, milli adət-ənənələr barədə məlumat verilmişdir. Muzeydə, həmçinin, ümumrayon ziyalılarının elmi-nəzəri konfransı keçirilmiş, konfrans iştirakçıları üçün Şabranın keçmişini əks etdirən zəngin eksponat fondu nümayiş etdirilmişdir.

Muzeydə keçirilən digər tədbir “Ümummilli Liderimiz Heydər Əliyev Şabranda” adlı elmi-praktiki konfrans və eyniadlı fotosərgi də tamaşaçılar tərəfindən maraqla qarşılanmışdır.

Şabranın 2300 illik yubileyi ilə əlaqədar rayonda bir sıra tədbirlər həyata keçirilmişdir. Bu münasibətlə xatirə kitabı işlənib hazırlanaraq nəşr edilməsi nəzərdə tutulmuşdur. Rayondan kənarda yaşayan elm adamları və yaradıcı ziyalılarla görüşlər keçirilmiş, Tarix-Diyarşünaslıq Muzeyində onların həyat və fəaliyyətindən bəhs edən guşə yaradılmışdır. Yubiley münasibəti ilə görkəmli incəsənət ustalarının iştirakı ilə geniş konsert təşkil edilmiş, “Rayonumuzun tarixini öyrənək” mövzusunda dəyirmi masa, inşa-yazı müsabiqələri və sual-cavab gecələri keçirilmişdir.

Ana dilinin inkişaf etdirilib qorunmasında əvəzsiz rolu olan yazıçı, akademik Mirzə İbrahimovun 100 illik yubileyi təntənə ilə qeyd edilmişdir. Xalq yazıçısının ailə üzvlərinin, “Ulduz” jurnalının baş redaktoru E.Hüseynbəylinin də iştirak etdiyi tədbirdə yazıçının həyat və yaradıcılığı barədə geniş məlumat verilmiş, Şabran şəhər Mədəniyyət Sarayının bədii özfəaliyyət kollektivlərinin ifasında yazıçının qızı bəstəkar Sevda İbrahimovanın atasının sözlərinə bəstələdiyi mahnılar səsləndirilmiş, “Həyat” pyesindən bir hissə və yazıçının “Azad” hekayəsi əsasında səhnələşdirilmiş parça nümayiş etdirilmişdir.

Son illər respublikamızın hər yerində olduğu kimi, Şabran rayonunda da aparılan quruculuq işləri nəticəsində Şabran şəhəri inkişaf edərək, yeni görkəm almış, tarixi abidələr abadlaşdırılmış, mədəniyyət müəssisələri bərpa edilmiş, yenidən əsaslı şəkildə inşa edilərək xalqın istifadəsinə verilmişdir. Ulu Öndərin adını daşıyan “Heydər Əliyev Muzeyi”, “Uşaq Yaradıcılıq Mərkəzi”, Tarix-Diyarşünaslıq Muzeyinin ərazisində yaradılmışdır. Şabran şəhər Mədəniyyət Sarayı da əsaslı təmir edilərək, istifadəyə verilmişdir. Çox sevindirici haldır ki, bu müəssisələrin açılışında Azərbaycan Respublikasının Prezidenti cənab İlham Əliyev iştirak etmişdir.

Şabran şəhər Mədəniyyət və İstirahət Parkında abadlıq və yenidənqurma işləri başa çatmış, park əhalinin istirahət yerinə çevrilmişdir.

Ölkəmiz öz maddi və mənəvi zənginliyi baxımından həm də canlı, açıq səma altında etnoqrafik muzeydir, mükəmməl maddi-mədəniyyət ocağıdır. Bu zənginliyin gələcək nəsillərə çatdırılması üçün mühafizə etmək isə hər birimizin borcudur. Şabran rayonu ərazisində yerləşən “Şabran” və “Çıraqqala” tarixi abidələrinin də qorunması, abadlaşdırılması istiqamətində müəyyən işlər görülmüşdür. Bu tarixi abidələrlə bağlı əfsanə və rəvayətlər toplanaraq Aydın Tağıyevin “Uzaqlardan gələn karvan” kitabında çap olunmuşdur.

Zümrüd

Səs.- 2011.-14 dekabr.- S. 12