Azərbaycanda dini fanatizmə yer
yoxdur
Təhlükə getdikcə dinə meyilin
artmasında yox, onun bir çox hallarda siyasi-ideoloji
funksiyanı yerinə yetirməsindədir
Son vaxtlar Azərbaycanda
siyasi və ictimai sabitliyi pozmağa çalışan
qüvvələrin fəallaşdığı hiss olunur. Öncəki
cəhdlərdən (etnik, sosial, siyasi qarşıdurma yaratmaq)
bir nəticə əldə edə bilməyən xarici
qüvvələr indi də dini məsələləri ortaya
atıblar və cəmiyyətdə parçalanma yaratmaq
üçün ölkədəki əlaltılarına yeni
sifariş veriblər. Söhbət məlum xarici dairələrdən
aldığı tapşırıq əsasında kiçik
yaşlı şagirdlərin orta məktəblərə
çadrada gəlməsinə icazə verilməsini tələb
edən bir qrup radikal dindarın fəaliyyətindən gedir.
Azərbaycanda dini tolerantlıq hökm sürür və hansısa inancı seçdiyinə görə heç kimə problem yaradılmır. Əlbəttə, ölkədə dini dözümlülük və tolerantlıq ab-havasının saxlanılmasının təmin olunması olduqca vacib məsələdir. Bu amil dövlətçiliyimizin qorunmasında və inkişafında önəmli rol oynayır. Ancaq hansısa təriqətə bağlılıq, dövlət maraqlarından üstün tutulmamalıdır.
Dinin Azərbaycan tarixində rolu
Tarix və təcrübə göstərir ki, “İnkişaf etmiş ölkələr dini dövlət olduqları üçün deyil, dini dünyəvi fəaliyyətə qarışdırmadıqlarına görə inkişaf edib”- Mark Tven. Azərbaycan xalqı da tarix boyu dini, siyasi rejimlərin zəncirindən azad olan kimi, da bu yolu seçib və haqlı olduğu ortadadır.
Tarixə baxsaq, dünyada olduğu kimi, Azərbaycanda da dini ideologiya heç də həmişə tərəqqipərvər və sülhsevər olmayıb. Eramızdan öncə və yeni erada bu torpaqlarda müxtəlif dinlər və cərəyanların tərəfdarları arasında dəhşətli müharibələr baş verib. Nəticədə, milyonlarla günahsız insan məhv edilib.
VII əsrdən başlanan və ən azı 2 əsr davam edən dini müharibələr yüz minlərlə insanların həyatına son qoyub, şəhərlər və kəndlər darmadağın olub. Xilafətin Azərbaycanı işğal etmək və əhalinin zorla dinini dəyişdirmək planlarına qarşı xalq hərəkatı başlayıb və sonradan Babək Xürrəminin başçılığı ilə Azərbaycanın bütün ərazisi (1 milyon kvkm) işğalçılardan azad edilərək müstəqil dövlət yaradılıb, milli, dini ənənələr bərpa edilib.
Eyni proses XV əsrdən XVII əsrədək davam edən sünni-şiə müharibələrində də yaşanıb. İki qardaş xalqın dünyanın iki ən güclü imperiyasına sahib olduğu vaxt Avropa onları din faktorundan yararlanaraq, qarşılaşdırdı və parçaladı. Konkret olaraq, milyonlarla insanın qanına qəltan olmasına, şəhərlərin-kəndlərin darmadağın edilməsinə, əhalinin aclıqdan ölməsinə nədən olan Osmanlı-Səfəvi müharibələrinin gerçək səbəbi sünni-şiə ayırımı idi.
Bu müharibələrin Türkiyə və Azərbaycan türklərinə psixoloji təsiri bu günə qədər qalmaqdadır. Eyni zamanda, tariximizdə fərqli fikirli insanların təqib olunması və hətta edam olması faktları da vardır. Nəimi, Nəsimi kimi böyük dahilərin işgəncələrlə vəhşicəsinə qətlə yetirilməsində din (ya da din xadimləri) faktoru əsas olub.
Gəlin XX əsrin əvvəllərindəki və ortalalarındakı duruma baxaq. Azərbaycan xalqı aclıq, səfalət, mövhumat içində çapalayır və dünyadan xeyli geri qalırdı. Lakin bu millətin içində aydınlar, böyük mütəfəkkirlər var idi (onlar da Qərbdə və Rusiyada təhsil alanlar idi). Məhz onların böyük və gərgin əməyi nəticəsində xalqı xurafatdan bir qədər uzaqlaşdırmaq, təhsilə və mədəniyyətə cəlb etmək işi başladı.
ADR-in yaranması bu məsələləri dövlət səviyyəsində prioritet siyasətə çevirdi. Qısa müddətli hakimiyyəti dövründə ADR təhsil, elm, mədəniyyət sahəsində xeyli iş gördü. Böyük öndər Məmməd Əmin Rəsulzadə və ziyalı hökumət əvəzsiz və qeyri-mümkün işlər bacardılar.
Bunun sayəsində Azərbaycan dünyada monolit xalqa, milli dilə, mədəniyyətə malik bir ölkə kimi qəbul edildi. Məhz buna görə biz, SSRİ tərkibinə Rusiya tərkibində muxtar qurum kimi deyil, müttəfiq respublika kimi daxil olduq.
Sovet hakimiyyəti qurulduqdan sonra isə, mövhumata, cəhalətə qarşı mübarizə gücləndi. Təhsil kütləvi xarakter aldı və hətta qocalar belə məktəblərə cəlb olundu. Ötən yüzillikdə Azərbaycan xalqı dünya elminə, mədəniyyətinə böyük dahilər, alimlər, sənətkarlar verdi. Burada sovet ideologiyasının çox böyük və önəmli təsirinin olduğunu etiraf etmək lazımdır.
Göründüyü kimi, cəmi 30 ili (1918-1950) nəzərdən keçirsək, fərq müqayisə olunmazdır. Qısa bir zamanda xalqımız nə qədər böyük inkişaf yol keçdi. Ulu Öndər Heydər Əliyevin respublikaya rəhbərliyi dövründə isə, elm, təhsil və mədəniyyət sahəsində işlər daha böyük vüsət aldı.
Müstəqilliyimizi bərpa etdikdən sonra isə, çox təəssüf ki, tendensiya əks iqtiqamətdə inkişaf etməyə başladı. Son illərdə Azərbaycanda yenidən təhsilin, elmin, mədəniyyətin yenidən sürətlin inkişafı müşahidə olunur ki, bu da, deyəsən, bəzi qüvvələri narahat edir.
Dini boşluğu kimlər
doldurdu?
Sovet dövründə
hakim olan ateist ideologiyasının iflasından sonra mənəvi
boşluq yaranmışdı. Bir çox dini təriqətlər
(onların içində təhlükəli olanları da var)
bu boşluğu doldurmaq üçün ölkəmizə
“hücuma keçdilər”. Vəhabilər, nurçular,
süleymançılar və digərləri müxtəlif
şirnikləndirici və aldadıcı yolarla ətraflarına
daha çox kütlə cəlb etməyə
çalışırlar.
Belə təriqətlərin
əsas məqsədi isə heç də Tanrı haqda bilik
yaymaq deyil, yalnızca öz təlimlərini cəmiyyətin
mümkün qədər çox hissəsinə yaymaqdan və
kütlələri öz nəzarətlərində saxlamaqdan
ibarətdir.
Bununla onların tabe
olduğu siyasi-ideoloji mərkəzlər onların vasitəsilə
cəmiyyətdə parçalanma və qarşıdurmalar yaratmağa
cəhd edirlər. Belə dini icmaların arxasında xarici
dövlətlərin kəşfiyyat orqanların dayanması
faktları da vardır.
Azərbaycan xalqı 70
il sovet hakimiyyəti dövründə ateizm təbliğatının
təsiri altında yaşayıb. Təbii ki, bu, bəzi
insanların təfəkküründə və
ideologiyasında öz izini və təsirini buraxıb. Lakin
indi insanlarımız dini qaydalar və müasir həyatın
tələblərini uyğunlaşdıraraq öz həyatlarını
düzgün yaşamağa çalışırlar.
Dini fəaliyyət
üçün ölkədə heç bir maneə olmasa
da, dini maariflənmənin aşağı olması səbəbindən
müəyyən problemlər də yaranır. Belə ki, bəzi
insanlar din haqqında səhv mülahizələr
yürüdür və dinin tələblərini öz təriqətlərinə
uyğun şəkildə izah edirlər. Bu, həm dinə, həm
də dövlətimizin məqsədlərinə zidd olan bir məsələdir.
Ölkəmizdə yaradılmış tolerant mühitdən bəzi qüvvələr yararlanmağa çalışır, xalqı mövhumat qaranlığına sürükləmək istəyirlər. Bir çox hallarda din xadimləri insanları yanlış yönləndirir. Məsələn, deyilir ki, qurban bayramında ət alıb paylamaq olmaz, Tanrı bunu qəbul etmir, gərək mütləq diri heyvan alıb, onun qanını tökəsən, yəni başını kəsəsən. Əsas məsələ qan tökməkdi sanki.
Amma dinin mahiyyəti başqalarına zərər vurmaq deyil, Tanrını və bütün canlıları sevməkdir. Azərbaycan xalqı tarix boyu bu prinsiplə yaşayıb və öz tolerantlığı ilə dünyada tanınıb.
Azərbaycana əsən cənub
küləkləri
Son vaxtlar ölkədə dini əldə bayraq edib dövlətə, xalqa qarşı xaricdən idarə olunan qüvvələr fəallaşıb. Bu proseslərin, konkret olaraq, İrandan qaynaqlandığına heç kimin şübhəsi yoxdur. Düzdür, bu məsələdə (ölkədə radikal dindarlığın və mövhumatın güclənməsində) bəzi qonşu ölkələrin və Qərb dairələrinin də böyük rolu var, amma ən böyük payın Tehrana aid olduğu şübhəsizdir.
Bu
yaxınlarda hicab məsələsi ilə bağlı bəzi
dindarların etiraz aksiyaları xarici dairələr tərəfindən
təşkil olunmuş, maliyyələşdirilib və dəstəklənib.
Nardaranda səsləndirilmiş şüarlar məsələnin
mahiyyətini aydın dərk etməyə yardım edir. Məlum olur ki, kobud desək,
dava “din davası deyil, dən davasıdır”.
Yadınızdadırsa, hicab
məsələsi ilə bağlı iranlı ayətullah
Nasir Məkarim Şirazi də eyni mövqedən
çıxış etmişdi. O da Azərbaycanda orta məktəblərdə
hicaba qoyulan qadağaya qarşı çıxaraq, əhalini
bu qərara qarşı müqavimət göstərməyə
çağırmışdı.
Deyəsən, Azərbaycanın
sürətlə hərbi, iqtisadi cəhətdən möhkəmlənməsi,
siyasi nüfuzunun artırması, regionda söz sahibinə
çevrilməsi Tehranı yaman narahat edir. ETTELAAT-ın əl
buyruqçularının əsas məqsədi Azərbaycanı
sivil, demokratik inkişaf yolundan döndərmək, şəriət
qanunlarını tətbiq etmək, bəzi digər ölkələr
kimi Azərbaycanda dindar, teokratik cəmiyyət qurmaq, ölkəmizi
qeyri-stabillik nümunəsinə çevirməkdir.
Onlar dini ekstremizm fəaliyyətindən
çəkinmir, açıq radikal çıxışlar
edir, özlərinə tərəfdar toplamağa
çalışır, dindar, mömin pərdəsi
altında dünyagörüşü hələ tam
formalaşmamış gənclərdən, sıravi vətəndaşlardan
sui-istifadə edir, onları dövlətə qarşı
yönəltmək istəyirlər.
Təəssüf ki, XX
qloballaşma əsrində, elm və texnikanın inkişaf
etdiyi müasir dövrdə bəzi yerli və xarici qüvvələr
hələ də müxtəlif vasitələrdən, o
cümlədən, din amilindən istifadə etməklə
ölkəmizi dini cəhalətə sürükləməyə
çalışırlar. Bu yolda “Səhər”
“telekanalizasiya”nın, çoxsaylı qəzet-jurnal və
internet saytının, həmçinin, “verbovka” olunmuş din
xadimlərinin xidmətlərindən yararlanmağa
çalışırlar.
İranın bəzi din
xadimləri burunlarını başqa dövlətlərin
işləri soxmazdan öncə, öz ölkələrindəki
durumu nəzərdən keçirsələr, yaxşı
olar. Hər 8 saatda bir günahsız insanın
asıldığı, 35 milyonluq türkə qarşı
bütün mənalarda repressiya edildiyi, qadınların
kölə halına salındığı, AİDS xəstəliyinə
görə dünyada liderlik edən, müsəlman
qardaşlarını soyqırıma məruz qoyan xristian erməniləri
qardaş seçən və hər cür dəstək
göstərən dövlət öncə öz problemlərini
həll etsin, sonra kiməsə nəyisə irad tutsun.
Azərbaycan monolit dövlət,
vahid xalq, tolerant cəmiyyət modelini seçib və bu yoldan
dönməyəcəyini ortaya qoyub. Azərbaycanda xalq və
dövlət arasında qırılmaz bağlar var ki, bunu
heç bir daxili və xarici qüvvə qoparmaq iqtidarında
deyil.
Azərbaycan hüquqi,
demokratik inkişaf yolu ilə sürətlə irəliləyin
ölkədir və hər hansı dini qrupların, onların
xarici havadarlarının sabitliyi pozmaq, əhali arasında
çaxnaşma yaratmaq, din adından istifadə edib öz bəd
niyyətlərini həyata keçirmək cəhdləri
heç bir səmərə verməyəcək.
Beləliklə, Azərbaycanda
daxili qarşıdurmalar törətmək istəyən bəzi
xarici dairələrin növbəti əməli də
dindarların hisslərindən istifadə etmək üzərində
qurulmuşdu. Lakin həm dövlət, həm cəmiyyət
bu məsələdə təmkinli davrandı və növbəti
təxribat projesi də baş tutmadı.
Elçin Bayramlı
Səs.- 2011.- 3 fevral.- S. 12.