Azərbaycanda turizmin inkişafı:
potensiallar, problemlər, perspektivlər
Xəbər verdiyimiz kimi, Prezident İlham Əliyev “Azərbaycan
Respublikasında 2011-ci ilin “Turizm ili” elan edilməsi ilə
bağlı Tədbirlər Planı”nın təsdiq
olunması haqqında Sərəncam imzalayıb. Sərəncamla
“Azərbaycan Respublikasında 2011-ci ilin “Turizm ili” elan edilməsi
ilə bağlı Tədbirlər Planı” təsdiq edilib.
Turizmin inkişafı iqtisadi siyasətin əsas prioritetlərindən birinə
çevrildi
“Tədbirlər Planı”nda Azərbaycanda turizm sahəsində
fəaliyyət göstərən orta və kiçik
sahibkarlara güzəştli kreditlər ayrılması, turizm
məqsədilə səfər edənlərə biletlərin
güzəştli qiymətlərlə satılması nəzərdə
tutulur.
Plana əsasən, ölkədə turizmin
inkişafı ilə bağlı müxtəlif mədəni
tədbirlər çərçivəsində aztəminatlı
ailələrin, dövlət himayəsində olan əlil və
kimsəsiz uşaqların Azərbaycanın müxtəlif
yerlərinə xüsusi səyahətləri, turist
axını çox olan rayonlarda iyul-sentyabr aylarında “Bu Vətən
bizimdir” adlı turist düşərgələri təşkil
olunacaq, Azərbaycanla qonşu Gürcüstan arasında
mövcud turist axınını nəzərə alaraq
Bakı-Tbilisi-Bakı dəmir yolu marşrutu üzrə
ixtisaslaşdırılmış turist qatarları xəttə
buraxılacaq.
Planda ölkədə turizmin inkişafı məqsədilə
qanunvericiliyə dəyişikliklərin edilməsi də nəzərdə
tutulur. Belə ki, Mədəniyyət və Turizm və Ədliyyə
nazirlikləri qarşıdakı iki ay ərzində “Turizm
haqqında” qanunun yeni layihəsini parlamentə təqdim etməlidir.
Turizm məqsədilə Azərbaycana səfər edən
şəxslərin sayının artırılması
üçün onlara viza verilməsi sadələşdiriləcək,
Dövlət Miqrasiya Xidməti, Xarici İşlər və Mədəniyyət
və Turizm nazirlikləri bununla bağlı təkliflər
hazırlamalıdır.
Bundan başqa, beynəlxalq və yerli hava, dəniz və
dəmiryol daşımalarında turist qruplarına xüsusi
tarif qiymətlərinin tətbiq edilməsinə dair təkliflərin
hazırlanması nəzərdə tutulur.
Tədbirlər planında nəzərdə tutulan ən
maraqlı yeniliklərdən biri turizm sahəsində fəaliyyət
göstərən orta və kiçik sahibkarlara dəstək
göstərilməsi məqsədilə təyinatlı və
güzəştli kreditlərin ayrılmasıdır. Bu
iş İqtisadi İnkişaf və Mədəniyyət və
Turizm nazirliklərinə həvalə olunub. Adıçəkilən
nazirliklər turizm sənayesinin inkişafı
üçün iqtisadi mühitin
yaxşılaşdırılması və investisiyaların cəlb
olunmasına dair təkliflər hazırlamalıdır.
Plana əsasən Azərbaycan Turizm İnstitutunun nəzdində
Bakı Turizm Peşə Məktəbi yaradılacaq, Azərbaycan
üçün prioritet sayılan ölkələrdə
milli turizmin təbliği üçün tədbirlər
görüləcək, həmçinin, həmin ölkələrdən
Azərbaycana info-turlar təşkil olunacaq. Sənəddən
məlum olur ki, Azərbaycan üçün prioritet ölkələr
Avropa Birliyi ölkələri, ABŞ, Yaponiya, Kanada, Rusiya və
Fars körfəzi ölkələri sayılır.
Plandakı təbliğat-təşviqat tədbirləri
arasında ən maraqlısı Azərbaycanda turizm və mədəniyyət
obyektlərinin, gəzməli-görməli yerlərin telefon məlumat
xidmətinin yaradılmasıdır.
Bundan başqa, planda tarixi abidələrin
abadlaşdırılması üçün işlərin
görülməsi, turizm və nümayiş obyektlərinə
gedən yolların abadlaşdırılması, təmiri,
yollarda xüsusi göstəricilərin və yol nişanlarının
qoyulması da nəzərdə tutulub.
Turzimin inkişafı üçün
potensial və bu sahədə
mövcud problemlər
Məlum olduğu kimi, 2011-ci il Azərbaycanda Turizm
İli elan olunub. Qeyri-neft sektorunun əsas prioritet istiqamətlərindən
biri kimi turizm sektoru önəmli hesab edilir. Hazırda xarici
ölkələrdən turistləri cəlb etmək
üçün müəyyən tədbirlər həyata
keçirilir. Eyni zamanda, xaricdə
Azərbaycanın turizm imkanları ilə
bağlı təbliğat
aparılır.
Ekspertlərin fikrincə, ölkəmizin böyük
turizm potensialı var və bundan səmərəli istifadə
etmək mümkündür. İqtisadi və Sosial
İnkişaf Mərkəzinin sədri Vüqar Bayramov bildirir
ki, turizmi inkişaf etdirmək üçün Azərbaycanın
geniş potensialı var: “Bu
potensialı imkana çevirmək və inkişaf etdirmək
istiqamətində hökumət tərəfindən
müvafiq infrastruktur işləri həyata keçirilərək,
rəqabət qabiliyyətli turizm biznesinin yaradılması təmin
olunmalıdır.
1999-cu ildə “Turizm haqqında” qanunun qəbulu ilə bu
sahədə dövlət siyasətinin əsas prioritetləri
və hədəflərinin müəyyən edilməsinə,
o cümlədən, turizm siyasətinin
mühüm sənədlərindən olan Azərbaycanda
turizmin inkişafına dair 2002-2005-ci illər və 2010-2014-cü illər
üçün turizmin
inkişafına dair Dövlət Proqramlarının təsdiq
olunmasına baxmayaraq, hələ
ki, turizm sektorunun inkişaf prosesi qonşu ölkələrlə
müqayisədə zəifdir”.
Qeyd edək ki, geniş imkanlar olsa da, ölkəyə
turistlərin marağı artsa da, yerli vətəndaşlar
daxildəki müalicəvi turizm xidmətlərindən
lazımi qədər yararlanmırlar. Bu məqsədlə
Rusiya, istirahət və əyləncə üçün isə
Türkiyənin turizm
bazarını seçirlər.
Müqayisə üçün bildirək ki, Türkiyə
2010-cu ildə turizmdən 21 milyard dollara yaxın gəlir əldə
edib. 2009-cu ildə ölkəyə 32 milyondan bir qədər
çox insan gəlibsə, ötən il bu rəqəm 33
milyonu keçib.
Son 2 ildə regionda turizmi inkişaf edən ölkələrin
siyahısına Gürcüstan da əlavə olunub. Hətta 2013-cü ildə
Gürcüstana gələn
turistlərin sayının ölkənin əhalisinin
sayını keçməsi planlaşdırırlıb.
İstirahət üçün Gürcüstana ən
çox Azərbaycan, Türkiyə və Ermənistan vətəndaşları
üz tutur.
Bu region ölkələrinin payına ümumilikdə 78
faiz turist düşür. Belə ki, Azərbaycandan 488 461,
Türkiyədən 485 137, Ermənistandan isə 479 377 turist,
Rusiyadan 158 421 nəfər
Gürcüstanda dincəlməyə üstünlük
verib.
Ümumilikdə, Azərbaycanın turizm sənayesinin rəqabət
apardığı coğrafiyada əsas yeri Rusiyanın Qara dəniz
və Şimali Qafqazdakı turizm müəssisələri,
Türkiyənin Aralıq dənizi sahilindəki turizm mərkəzləri
və Gürcüstanın Qara dəniz sahilləri tutur. Digər
alternativlər də mövcuddur. Bura Qazaxıstan, Birləşmiş
Ərəb Əmirliyi və İranı aid etmək olar. Belə
rəqabət mənzərəsində uğurlu nəticələrin
əldə olunması üçün uzunmüddətli və
dayanıqlı turizm siyasətinə ehtiyac var.
Azərbaycanı iri turizm ölkəsinə çevirmək üçün nə
etmək lazımdır?
V.Bayramovun fikrincə, turistlər səfər etdikləri
ölkələrdə əsasən təhlükəsizlik,
gigiyena, keyfiyyətli xidmət, cəlbedici yerlər, qiymətlər və s. bu kimi amillərə diqqət
verirlər: “Sözügedən amillərdən birinin
olmaması nəticə etibarilə yüksək keyfiyyətli
turizm məhsulunun ortaya çıxmasına maneəçilik
yaradır.
Turizm Nazirliyinin məlumatına görə, hazırda
ölkədə 140 turizm şirkəti, 10 Turizm İnformasiya
Mərkəzi və 57 mehmanxana fəaliyyət göstərir.
Statistika Komitəsi isə 2009-cu ildə mehmanxana və
mehmanxana tipli müəssisələrin sayının 452
olduğunu bildirir”.
Yeri gəlmişkən, Statistika Komitəsindən
bildirirlər ki, 2004-cü ildə turizm müəssisələrinin
sayı 58, 2005-ci ildə 81, 2006-cı ildə 96, 2007-ci ildə
117, 2008-ci ildə 123, 2009-cu ilə 124 olub. 2004-cü illə
müqayisədə turizm müəssisələrinin
sayı artsa da, təklif edilən turizm məhsullarının
çeşidi dünya standartlarından geri qalmaqdadır.
Şirkətlər hələ də dünya turizm
bazarında öz potensialını tam reallaşdıra bilməyiblər.
Son rəqəmlərə əsaslansaq Azərbaycana gələn
xarici turistlərin sayı ildə orta hesabla 10% artır. Əgər
2002-ci ildə Azərbaycana 428 min xarici turist səfər edibsə,
artıq 2007-ci və 2008-ci illərdə bu göstərici 1
milyonu üstələyib. 2009-cu ildə qəbul edilmiş və
göndərilmiş turistlərin ümümu sayı 59 700 nəfər
olub. Ondan 17 min nəfəri qəbul edilib, 42 min nəfəri
göndərilib.
Beynəlxalq turist daşımalarına gəlincə, Azərbaycana
gələn xarici və xarici ölkələrə gedən
Azərbaycan vətəndaşlarının sayı 4 mln
193 min nəfər olub. Ortada
olan təxmini hesablamalara görə, bir turistdən cəmi
600-700 dollar qazanılır.
V.Bayramov turizm sahəsində fəaliyyət göstərən
sahibkarların ən böyük problemlərindən biri kimi
turizm günlərinin sayının azlığını
önə çəkir: “Turizm şirkətləri ancaq 2-3 ay
işləyirlər. Təhlillər göstərir ki,
qış turizminin hələ də inkişaf etməməsinin
səbəbi iş adamlarının qış turizm mərkəzlərini
yaratmaqda maraqlı olmamasıdır.
Sahibkarlar ilboyu büdcə xərclərinin
hamısını bir fəslin- yayın üstünə salırlar. Elə
qiymətlərin yüksəkliyinin bir səbəbi də bundan qaynaqlanır. Belə ki, 11
iqlim qurşağının 9-nun ölkəmizdə mövcud
olmasına baxmayaraq bu amil il boyu turizmin inkişafına o qədər
də imkan vermir. Belə ki, ölkədə qış turizmi hələ də
inkişaf etməyib” .
Ekspert ölkədə
turizmin inkişafı üçün dünya səviyyəsində
öndə gedən ölkələrin təcrübəsindən
istifadəni vacib sayır: “Buna da
dünya səviyyəsində öndə gedən
ölkələrin təcrübəsindən istifadə etməklə
nail olmaq olar. Eyni zamanda, sahə üzrə professional
reklamçılar yetişdirib onların əməyindən faydalanmaq
mümkündür.
Araşdırmalar göstərir ki, Azərbaycan
üçün turizmdə ən böyük bazar Rusiya və
digər keçmiş SSRİ respublikaları ola bilər.
Çünki Türkiyəyə gedən turistlərin 70 faizi
ruslar və ukraynalılardır. Dünyanın bütün
ölkələrində rus turistləri kütləvilik təşkil
edir. Cənub ölkələrindən isə turistlər əsasən
qış turizminə üstünlük verirlər. Azərbaycanda
bu sahədən də gəlir götürmək
üçün böyük imkanlar var.
Elçin Bayramlı
Səs.-2011.- 23 iyul.-S .11.