27 Sentyabr Beynəlxalq Turizm
Günüdür
Bu gün Beynəlxalq Turizm Günü kimi qeyd olunur.
1980-ci ildən Birləşmiş Millətlər Beynəlxalq
Turizm Təşkilatı 27 sentyabrı Beynəlxalq Turizm
Günü kimi qeyd edir. Bu tarix 1970-ci ildə BMBTT-nin Nizamnaməsinin
qəbul olunduğu gündür. Bu nizamnamənin qəbulu
qlobal turizmdə dönüş hesab edilir. Bu günün məqsədi
beynəlxalq aləmdə turizm haqda məlumatlanmanı
artırmaq və bunun sosial, mədəni, siyasi və iqtisadi tərəflərini
dünya miqyasında nümayiş etdirməkdir. Bildiyimiz kimi,
hər il Beynəlxalq Turizm Günü müxtəlif
şüarlar altında həyata keçirilir. Bu il
Ümumdünya Turizm Günü turizmin beynəlxalq həmrəylik
və qarşılıqlı hörmətin möhkəmləndirilməsindəki
mühüm rolunu vurğulayan “Turizm - mədəniyyətləri
birləşdirən bənd” şüarı altında
keçirilir.
Bu yeni mədəniyyətlərlə öz təcrübəndə
tanış olmaq ən yaxşı yoldur məqsədini
daşıyır. Bu il Ümumdünya Turizm Günü Misirdə
keçiriləcək. Misirin ev sahibliyi edəcək rəsmi
tədbir Asvan şəhərindəki Nil çayının
ağızındakı Nubya çölündə tikilən
Cataract hoteldə reallaşdırılacaq. Bu tədbir beynəlxalq
cəmiyyət arasında turizmin əhəmiyyətinə və
ictimai, mədəni, siyasi və iqtisadi dəyərlərinə
dair şüur yaratma məqsədi daşıyır. Turizm
müsafirlə onu qəbul edən ölkə
arasındakı möcüzəli bir rabitə vasitəsi
olaraq xarkterizə olunur. O, dialoqun və
qarşılıqlı əlaqələrin
yaradılmasına kömək edir. Müxtəlif mədəniyyətləri
təmsil edən insanlar arasında belə əlaqələrin
mövcudluğu dözümlülüyün əsasına
çevrilir. Müasir dövrümüz də dinc
yanaşı yaşamaq uğrunda mübarizə aparan
dünyada turizm körpülərin qurulmasına və
sülhün möhkəmlənməsinə səbəb ola
bilər. Turizmin inkişaf prosesi qlobal həmrəyliyin
formalaşmasına töhfələrini verir. BMT-nin Baş
Assambleyasında təsdiq edilmiş ekoloji baxımdan təhlükəsiz
və məsuliyyətli turizmin bu rəhbər prinsipləri
zamanla yoxlanılmış turizm və sülh, insan haqları
və qarşılıqlı anlaşma arasındakı əlaqəyə
əsaslanır. Ümumdünya Turizm Günü turizmin
bütün dünyanın əmin-amanlığı
üçün əhəmiyyəti barədə
düşünməyə imkan yaradır.
Dünya ölkələrində qeyd olunduğu kimi, hər
il Azərbaycanda da 27-sentyabr Ümumdünya Turizm Günü
kimi qeyd olunur. Həmin gün təşkil olunan tədbirlər
çəriçivəsində, həmçinin, hər il
müxtəlif mövzularda - turizm sahəsində mövcud
problemlər və onların həlli yollarının müzakirəsi,
turizm sahəsində xidmət səviyyəsinin
yaxşılaşdırılması, turizm infrastrukturunun
yaradılması və s. mövzusunda turizm konfransları da
keçirilir.
Ölkədə baş verən
sıçrayışların nəticəsidir ki, bu gün
Azərbaycana dünyanın müxtəlif ökələrindən
olan nümayəndələr turist kimi səfər edirlər.
Ölkə başçısının Azərbaycanda turizm
sahəsinə ayırdığı diqqət Azərbaycanın
beynəlxalq arenada öz turizm potensialını nümayiş
etdirməyə şərait yaradır. Bunun müqabilində
Azərbaycana gələn turistlərin axını artır.
2011-ci ilin Azərbaycan Prezidenti İlham Əliyevin Sərəncamı ilə
“Turizm ili “ elan edilməsi ölkədə turizmin daha da
inkişaf etdirilməsi və turizm fəaliyyəti
üçün əlverişli şəraitin
yaradılmasına səbəb olub. Ölkədə olan
potensialın zərurətinin nəzərə
alınması, turizm ehtiyatlarından səmərəli istifadə
olunmaqla zəngin coğrafi landşafta malik ölkəmizin təbiət
abidələrinin və eləcə də,
xalqımızın qədim mədəni-tarixi irsinin geniş
miqyasda tanıdılmasını təmin etmək məqsədi
ilə “Turizm ili” elan edilməsi ölkənin artan
gücünün bir daha ortaya çıxmasına səbəb
oldu. Dövlət başçısının Sərəncamı
ilə 2011-ci ilin “Turizm ili” elan edilməsi ilə bağlı
Tədbirlər Planının təsdiqi isə bu işin daha
da sürətlənməsi ilə nəticələndi. Turist
axını çox olan rayonlarda turist düşərgələrinin
təşkil edilməsi, turizm sahəsində fəaliyyət
göstərən orta və
kiçik sahibkarlara dəstək
məqsədi ilə təyinatlı və güzəştli
kreditlərin ayrılması bu sahədə nailiyyətlərin
əldə olunmasına səbəbdir. Qonşu ölkələrin
nümayəndələrinin iştirakı ilə “Sərhədyanı
turizmin inkişaf perspektivləri” mövzusunda beynəlxalq
konfransın keçirilməsi, Azərbaycanın diplomatik
nümayəndəlikləri və diasporları tərəfindən
ölkəmizin turizm potensialının xarici ölkələrdə
tanıdılması məqsədi ilə təbliğat-təşviqat
işinin gücləndirilməsi və s. Azərbaycanda turizm
sektorunu gücləndirib.
Ölkəmizin mövcud turizm potensialının beynəlxalq
aləmdə tanınması, turistlərin Azərbaycana
çoxsaylı səfərlərinin təşkili, turizmin
müxtəlif növlərinin inkişaf etdirilməsi,
hüquqi-normativ aktların qəbul edilməsi, müasir turizm
infrastrukturunun yaradılması sahəsində məqsədyönlü
işlər görülməkdədir. Hüquqi-normativ
aktların qəbul edilməsi çərçivəsində
“Azərbaycan Respublikasında turizmin inkişafına dair
2010-2014-cü illər üçün” Dövlət
Proqramının tələblərinə uyğun olaraq turizm
sahəsində beynəlxalq standartlara cavab verən mehmanxanalar
tikilmiş, ölkəyə bir sıra aparıcı beynəlxalq
investisiya şirkətləri cəlb olunmuş,
respublikamıza gələn turistlərin sayı ildən-ilə
artmışdır.
Azərbaycan islam dünyası ilə turizm sahələrində
çoxtərəfli əməkdaşlıq münasibətləri
yüksək səviyyədə inkişaf etdirir. Bu əməkdaşlıq
həm İslam Konfransı Təşkilatı, həm də
onun ixtisaslaşmış institutları olan İSESKO,
İRCİCA, SESRTCİC, İslam Texnologiyalar Universiteti və
s. təşkilatlar çərçivəsində həyata
keçirilir.
Respublikamızın turizm imkanlarını təbliğ
etmək məqsədi ilə bir sıra tədbirlər həyata
keçirilir. Son illərdə ölkəmizin turizm
imkanlarını əks etdirən reklam-çap məhsulları
hazırlanıb. “Turistlər üçün məlumat”
kitabçası, “Azərbaycan” açıqca dəsti, “Azərbaycanın
otelləri”, “Azərbaycanın tarixi və arxitektura abidələri”,
“Bakının teatr və muzeyləri” bukletləri, “Azərbaycan”
və “Bakı” fotoalbomları, “İpək Yolu”,
“Xalçaçılıq” kitabçaları, Azərbaycanın,
Şuşanın və Qarabağın turist xəritələri,
“Azərbaycana xoş gəlmisiniz” CD diski və DVD formatda 10-20
dəqiqəlik filmlər və s. Azərbaycanın turizm
imkanlarını nümayiş etdirən nümunələrdir.
Qeyd olunan nəşrlər, CD və DVD-lər Azərbaycan,
ingilis, alman, ərəb, yapon, və rus dillərində
hazırlanıb. Azərbaycanın beynəlxalq sərgilərdə
iştirakının coğrafiyası genişlənib. London,
Nyu-York, Moskva, Berlin, Pekin, Milan, Madrid, Dehli, Vyana, Mumbay,
İstanbul, Tokio, Əl-Küveyt, Dubay, Kiyev, Tbilisi, Bəhreyn,
Daşkənd və Mahaçkala şəhərlərində
keçirilən beynəlxalq turizm sərgilərində Azərbaycan
öz daxili potensialını nümayiş etdirir.
Azərbaycanın turizm potensialını dünyada
tanıtmaq məqsədi ilə sayt istifadəyə verilib.
Sayt, mütəmadi olaraq, yeniləşdirilir. Görülən
bu və ya digər işlərin nəticəsində ölkəmizə
gələn turistlərin sayının ildən-ilə
artması müşahidə olunur.
NƏZAKƏT ƏLƏDDİNQIZI
Səs .- 2011.- 27 sentyabr.- S. 11.