Yeni Azərbaycan Partiyası günü-gündən güclənir

Aydın Hüseynov: "Yeni Azərbaycan Partiyasının əsas amalı hər bir Azərbaycan vətəndaşının yaxşı yaşaması, onun sabahı, təhlükəsizliyinə xidmət etməkdir"

“Yeni Azərbaycan Partiyası ölkəmizdə siyasi böhrana, vətəndaş müharibəsinə, separatçılıq meyillərinə, dövlət çevrilişi cəhdlərinə, iqtisadi tənəzzülə son qoymaqla yanaşı, dövlətçiliyimizin dinamik inkişaf relsləri üzərində yüksək səviyyədə tərəqqisinə nail oldu. Partiyanın yaradıldığı mürəkkəb dövrü təsəvvür etsək, görərik ki, bir tərəfdən Ermənistanın təcavüzü, digər tərəfdən isə, qeyri-demokratik yolla hakimiyyətə gəlmiş yarıtmaz siyasətçilərin fəaliyyəti Azərbaycanda çox ağır, dözülməz vəziyyət yaratmışdı.

Azərbaycan dövlətçiliyi yox olmaq təhlükəsi ilə üzləşmişdi" deyən - Yeni Azərbaycan Partiyasının Siyasi Şurasının üzvü, YAP Qaradağ rayon təşkilatının sədri Aydın Hüseynov məhz 1993-cü ildə xalqın təkidli tələbi ilə hakimiyyətə qayıdan Ulu Öndər Heydər Əliyevin ölkəmizi düşdüyü ağır vəziyyətdən xilas etdiyini bildirib. Bu baxımdan da, 1993-2003-cü illərin Azərbaycan tarixində dirçəliş illəri kimi daxil olduğunu, iqtisadi sahədə yaşanan tənəzzülün aradan qaldırıldığını, siyasi proseslərdə müsbət məcrada inkişafın müşahidə olunduğunu bildirən A.Hüseynov bütün bunların müqabilində, bu gün Yeni Azərbaycan Partiyasının güclü, böyük nüfuza malik partiya kimi regionda və beynəlxalq arenada nüfuz sahibinə çevrildiyini vurğuladı. "Bu reallıq bütün səviyyələrdə, xüsusilə, Prezident İlham Əliyev tərəfindən bəyan edilir. Çünki Yeni Azərbaycan Partiyası güclü bir siyasi təşkilatdır və Azərbaycan ictimai-siyasi həyatında müstəsna rola malikdir. Heç bir siyasi qüvvə Yeni Azərbaycan Partiyası ilə rəqabət aparmaq iqtidarında deyil".

Ölkəmizdə iqtisadi, siyasi və sosial sahələrdə görülən işlərdən, bunun müqabilində mövcud reallıqlardan bəhs edən təşkilat sədri demokratik islahatların həyata keçirilməsi bəşəri dairələrin bərqərar olması istiqamətində də, mühüm addımların atıldığını diqqətə çatdırdı. Qeyd etdi ki, hər bir dövlətin demokratik cəhətdən yüksəlişində seçki prosesinin digər zəruri prinsiplər qədər əhəmiyyəti böyükdür. Bu baxımdan da, ötən il noyabr ayının 7-də keçirilən parlament seçkilərinin Azərbaycan dövlətinin siyasi həyatında olduqca mühüm rol oynadığını bildirən A.Hüseynov hər bir seçki prosesinin cəmiyyətin irəliyə doğru inkişafının mühüm göstəricisi, demokratiyanın, insan haqlarının qorunmasının, cəmiyyətdə baş verən iqtisadi, siyasi və sosial dəyişiklikərin göstəricisi olduğunu söyləyib. "Bir məqamı da qeyd edək ki, bu gün ölkədə və regionda YAP-la rəqabət apara biləcək ikinci bir partiya mövcud deyil. Çünki günü-gündən YAP üzvlərinin sayının artması, onu göstərir ki, xalqımızın bu partiyanın fəaliyyətinə, yüksək ali prinsiplərinə inamı sonsuzdur".

Azərbaycanın bugünü kimi sabahı da aydın və işıqlıdır

"Dövlətimizin artan gücü və qüdrəti onun dünya siyasətindəki yerini, beynəlxalq arenadakı nüfuzunu da əhəmiyyətli dərəcədə yüksəldib" deyən YAP Siyasi Şurasının üzvü Azərbaycanın xarici siyasəti ilə superdövlətlərin belə hesablaşmaqdan başqa seçim imkanlarının olmadığını diqqətə çatdırdı. Vurğuladı ki, bu gün qüdrətli, müstəqil Azərbaycan dövlətinin bütün sahələrdə təhlükəsizliyi təmin edilir. "Bütün bunlar isə Azərbaycan xalqının rahat yaşamasını, onun qarşılaşdığı problemlərin həllinə yönəlmiş addımların bundan sonra da atılmasını təmin etmək üçündür. YAP-ın əsas amalı hər bir Azərbaycan vətəndaşının yaxşı yaşaması, onun sabahı, təhlükəsizliyinə xidmət edir. Belə amalla, əqidə ilə yaşayan partiyanın isə həmişə böyük uğurlar əldə etməsi yüksək zirvələr fəth etməsi çox asandır". A.Hüseynov bir məqamı da vurğulayıb ki, bugünkü reallıq Ulu Öndər Heydər Əliyev ideyalarının, Onun istək və arzularının tam şəkildə həyata keçirildiyini üzərində ehtiva edir. "Çünki qətiyyətlə qeyd etmək olar ki, Azərbaycan bundan sonra ölkə Prezidenti İlham Əliyevin rəhbərliyi ilə daha böyük uğurlara imza atacaq, daha uca zirvələri fəth edəcək" deyən A.Hüseynov Azərbaycanın bugünü kimi sabahının da aydın və işıqlı olacağına əmin olduğunu vurğuladı.

Ulu Öndər Heydər Əliyev tərəfindən müəyyənləşdirilmiş inkişaf strategiyası nəticəsində ölkəmiz Cənubi Qafqaz regionunun lider dövlətinə çevrilib

"Ulu Öndərimiz Heydər Əliyev tərəfindən müəyyənləşdirilən siyasət nəticəsində ölkəmizdə siyasi sabitlik tam təmin olunub, iqtisadi yüksəliş isə insanların rifahının daha da yüksəlməsinə xidmət edir. Birmənalı olaraq, qeyd edilməlidir ki, Ümummilli Liderimiz Heydər Əliyev tərəfindən müəyyənləşdirilmiş inkişaf strategiyası nəticəsində ölkəmiz Cənubi Qafqaz regionunun lider dövlətinə çevrilib və bu mövqeyini neçə illərdir qoruyub saxlamaqdadır. Bu gün ölkəmizdə mövcud olan sabitlik, güclü iqtisadiyyat gələcək inkişaf trayektoriyasının əsasını təşkil edir. Ulu Öndər Heydər Əliyev tərəfindən əsası qoyulan bu siyasi kurs Prezident İlham Əliyev tərəfindən uğurla davam etdirilir. Bu gün Azərbaycan dünyanın bir çox ölkələri ilə ikitərəfli əlaqələrə malikdir və bu əlaqələr nəticəsində də dünyanın çoxsaylı dövlətləri ölkəmizin biznes mühitində özünə yer edib. Bu bir faktdır ki, Azərbaycan, nəinki yerləşdiyi Cənubi Qafqaz regionunda, hətta bir sıra yaxın ölkələri də nəzərə alsaq, böyük bir coğrafiyada xarici sərmayələrə açıq və təminat verəcək yeganə dövlətdir" deyən A.Hüseynov Azərbaycanda demokratik prinsiplərə də sadiqlik nümayiş etdirildiyini, ölkə daxilində aparılan siyasi islahatlar nəticəsində Azərbaycanda Avropa standartlarına uyğun olan siyasi institutların, təsisatlar yarandığını dilə gətirdi.

Tapdıq Qurbanlı

Səs.- 2011.- 13 yanvar.- S. 6.