IV Qəbələ Beynəlxalq Musiqi Festivalına start verildi

Son illər Heydər Əliyev Fondunun Prezidenti, YUNESKO və İSESCO-nun xoşməramlı səfiri, millət vəkili Mehriban xanım Əliyevanın təşəbbüsü və rəhbərliyi ilə həyata keçirilən çoxsaylı mədəniyyət layihələri mədəni irsimizin, milli incəsənətimizin inkişafına böyük töhfələr verməkdədir. Bu layihələr milli mədəniyyətimizin, o cümlədən, musiqi sənətimizin dünyada təbliğində müstəsna rol oynayır, mədəniyyətlərin qarşılıqlı təmasına, Şərqlə Qərbin qovşağında yerləşən Azərbaycanın mədəniyyətlərarası dialoq məkanı kimi tanınmasına mühüm zəmin yaradır.

Son illər Heydər Əliyev Fondunun Prezidenti, YUNESKO və İSESCO-nun xoşməramlı səfiri, millət vəkili Mehriban xanım Əliyevanın təşəbbüsü və rəhbərliyi ilə həyata keçirilən çoxsaylı mədəniyyət layihələri mədəni irsimizin, milli incəsənətimizin inkişafına böyük töhfələr verməkdədir. Bu layihələr milli mədəniyyətimizin, o cümlədən, musiqi sənətimizin dünyada təbliğində müstəsna rol oynayır, mədəniyyətlərin qarşılıqlı təmasına, Şərqlə Qərbin qovşağında yerləşən Azərbaycanın mədəniyyətlərarası dialoq məkanı kimi tanınmasına mühüm zəmin yaradır. YUNESKO tərəfindən bəşər mədəniyyətinin incisi elan edilən Azərbaycan muğamına həsr olunan "Muğam aləmi" beynəlxalq festivalları böyük maraqla qarşılanaraq, sənət aləmində geniş əks-səda doğurub.

Heydər Əliyev Fondunun musiqi sənəti sahəsində daha bir möhtəşəm beynəlxalq layihəsi 2009-cu ildən ənənəvi olaraq təşkil edilən Qəbələ Beynəlxalq Musiqi Festivalıdır. Dünyanın bir çox nüfuzlu sənətkarlarının, tanınmış musiqi kollektivlərinin iştirak etdiyi festival Azərbaycan və dünya musiqisi incilərinin səsləndiyi, musiqi görüşlərinin, müxtəlif tədbirlərin keçirildiyi əsil sənət bayramıdır.

İyulun 24-də Heydər Əliyev Fondunun təşəbbüsü və rəhbərliyi ilə IV Qəbələ Beynəlxalq Musiqi Festivalına start verildi. Qəbələ şəhərində 5 avqust tarixində keçiriləcək musiqi bayramında Azərbaycandan və xarici ölkələrdən görkəmli musiqiçilər, bədii kollektivlər, solistlər, dirijorlar iştirak edirlər. Festivala Böyük Britaniya, Rusiya, ABŞ, İtaliya, Sloveniya, İsveçrə, Fransa və Polşadan dünya şöhrətli dirijorlar, musiqiçilər və kollektivlər - London Filarmonik Orkestri, Yuri Başmet və "Moskva solistləri" kamera orkestri, "Tartini" kvarteti, Şarl Dütua, Boris Berezovski, Sergey Krılov, Dmitri Yablonski, Klaudio Vandelli, Qriqori Kovalevski, Françeska Patane, Marco Kinqari, Andrey Yaroşinski, Aleksandr Çaykovski, Michal Nesteroviç, Lisa de la Salle, Moyka Zlobko və başqalarının iştirakı nəzərdə tutulub.

Festival çərçivəsində Ü.Hacıbəyli adına Azərbaycan Dövlət Simfonik Orkestri, Dövlət Xor Kapellası, Bakı Musiqi Akademiyasının Kamera Orkestri, xalq artistləri Fərhad Bədəlbəyli, Rauf Abdullayev, Murad Adıgözəlzadə, Murad Hüseynov, Yeganə Axundova, Əvəz Abdullayev, Mənsum İbrahimov, Şükür Səmədov, əməkdar incəsənət xadimləri Fəxrəddin Kərimov, Azad Əliyev, Yalçın Adıgözəlov, əməkdar müəllim Tofiq Aslanov, əməkdar artistlər Gülnaz İsmayılova, Elçin Həşimov, Elnur Əhmədov, Sahib Paşazadə, Gülşən Ənnağıyeva, beynəlxalq müsabiqə laureatları Əyyub Quliyev, Fuad İbrahimov, Yusif Eyvazov, Adil Axundov, Azər Rzazadə, Fəridə Məmmədova, Səbinə Əsədova, istedadlı gənc solistlər, muğam ifaçıları və başqaları da maraqlı proqramlar əsasında çıxış edəcəklər.

ZÜMRÜD

Səs.- 2012.-25 iyul.- S.12.