Azərbaycan multikulturalizm siyasətini dünya ictimaiyyətinə təqdim edir

Mehriban Əliyeva: “Qəbələ IV Beynəlxalq Musiqi Festivalı xalqlar arasında qarşılıqlı anlaşma və dostluğun möhkəmləndirilməsi işinə xidmət edir”

Müasir dövrümüzdə Azərbaycan beynəlxalq əhəmiyyətli tədbirlərin keçirildiyi məkana çevrilib. Bu dövlətin həyata keçirdiyi mədəniyyət siyasətinin əsasında formalaşıb. Bakıda keçirilən “Eurovision” Mahnı Müsabiqəsi ölkəmizin təbliği baxımından əhmiyyətli tədbirlər sırasındadır. Paytaxtımızda təşkil olunan “Eurovision-2012” mahnı yarışması təkcə xalqımızın zəngin mədəniyyətinin, yurdumuzun gözəl təbiətinin, turizm potensialının təbliği üçün geniş imkanlar açmaq baxımından deyil, həmçinin, qısa müddət ərzində əldə etdiyi yüksək inkişaf səviyyəsini, demək olar ki, bütün dünyaya nümayiş etdirmək baxımından böyük əhəmiyyətə malik oldu. Təkcə Avropada deyil, bütün dünyanın mədəni hissəsinin diqqət mərkəzində olan mahnı yarışmasının yüksək səviyyədə keçirilməsi, Azərbaycan Prezidenti İlham Əliyevin, müsabiqənin Təşkilat Komitəsinin sədri Mehriban xanım Əliyevanın böyük səyləri nəticəsində reallaşdı.

Azərbaycan milli dəyərlərini, tarixi zənginliyini dünya ictimaiyyətinə təqdim edən təkcə “Eurovision” musiqi yarışması deyil. Belə ki, bu yaxınlarda Şəkidə keçirilən “İpək Yolu” Beynəlxalq Musiqi Festivalı da Azərbaycan milli mədəniyyətinin təbliği baxımından önəmli olan hadisəyə çevrildi. Eyni zamanda, Üzeyir Hacıbəyli, Mstislav Rostropoviç adına Beynəlxalq Musiqi festivalları da nəinki Bakıya, həm də Azərbaycanın regionlarına dünyanın ən nüfuzlu musiqi ustaları və həvəskarlarının böyük axınına səbəb oldu. Ölkənin ictimai-mədəni həyatında nüfuzlu, dünya miqyaslı layihələr ardıcıl olaraq həyata keçirilir. Qısa bir müddət ərzində dünyanın müxtəlif ölkələrində Azərbaycan mədəniyyəti günləri keçirildi. Onu da vurğulamaq vacib məqamlardandır ki, İtaliya, Ukrayna, Qazaxıstan və Türkiyə kimi ölkələrdə təşkil olunan Azərbaycan Mədəniyyət Günləri dövlətimizin xarici siyasətində mühüm yer tutan ölkələrdir. Onu da qeyd edim ki, İtaliya, Qazaxıstan və Türkiyədə Azərbaycan Mədəniyyəti Günləri ilk dəfə olaraq keçirilirdi.

Azərbaycan Prezidenti İlham Əliyevin imzaladığı sərəncamlarla dünyaşöhrətli ədəbiyyat xadimlərinin, böyük söz ustadlarının yubiley tədbirlərinə start verilib. Nizami Gəncəvinin 870, Mirzə Ələkbər Sabirin 150, Mirzə Fətəli Axundzadənin 200, Xurşidbanu Natəvanın 180, Əhməd Cavadın 120, Hüseyn Cavidin 130, Məmməd Səid Ordubadinin 140, Mirvarid Dilbazinin 100, Xəlil Rza Ulutürkün 80 illik yubileyləri keçirilir. TÜRKSOY təşkilatı 2012-ci ili bütün türk dünyasında “Axundzadə ili” elan edilib.

Beynəlxalq əhəmiyyətli tədbirlərin ölkə daxilində, eləcə də, xarici ölkələrdə təşkilində Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın həyata keçirdiyi layihələri xüsusi olaraq vurğulamaq vacibdir. Bu yaxınlarda Mehriban xanım Əliyevanın təşəbbüsü və dəstəyi ilə İtaliyada keçirilən Mədəniyyət Günləri Azərbaycan üçün əhəmiyyət kəsb edə bilən rəmzi sonluqla - Roma şəhərinin “Villa Borghese” parkında dahi Azərbaycan şairi və mütəfəkkiri Nizami Gəncəvinin abidəsinin ucaldılması ilə yekunlaşması milli dəyərlərimizə, ədəbiyyatımıza töhfə oldu.

Heydər Əliyev Fondunun layihələri sırasında Milli İncəsənət Muzeyində təşkil edilən “Fransanın inciləri” sərgisi də diqqəti çəkən tədbir kimi əhəmiyyətli oldu. Qeyd etmək istərdim ki, belə bir zəngin eksponatlı nadir sərgi Fransanın da təcrübəsində ilk dəfə məhz Bakıda nümayiş etdirildi. Ölkəmizin tarixi və mədəniyyətinin Roma şəhərində layiqincə təqdim edilməsi üçün Roma Sivilizasiyası Muzeyində “Azərbaycan - Odlar Yurdu İpək Yolunda” adlı sərgi təşkil edilmişdir. Bu sərgi üç ay müddətinə nəzərdə tutulsa da, çoxsaylı tamaşaçıların və Roma şəhər meriyasının arzusu nəzərə alınaraq daha iki ay uzadılmışdır.

Bütün bunlar Azərbaycan dövlətinin sülhsevər olduğunu və multikulturalizm siyasətini dünya ictimaiyyətinə təqdim edir. Azərbaycan mədəniyyətinin inkişafı, təbliği, dünya müstəvisində daha əhəmiyyətli yer tutması, eyni zamanda, yeni-yeni yaradıcılıq nümunələrinin meydana çıxması, mədəni irsimizin qorunması istiqamətində genişmiqyaslı işlər görülməkdədir. Heydər Əliyev Fondunun təşkilatçılığı ilə Azərbaycanda növbəti möhtəşəm incəsənət bayramı - Qəbələ IV Beynəlxalq Musiqi Festivalı öz işinə başlayıb. Artıq dördüncü dəfə Azərbaycanda baş tutan festival mədəni irsimizin, milli incəsənətimizin inkişafına böyük töhfələrini verməkdədir. Bu layihələr milli mədəniyyətimizin, o cümlədən, musiqi sənətimizin dünyada təbliğində müstəsna rol oynayır, mədəniyyətlərin qarşılıqlı təmasına, Şərqlə Qərbin qovşağında yerləşən Azərbaycanın mədəniyyətlərarası dialoq məkanı kimi tanınmasına mühüm zəmin yaradır. Dünya miqyasında mədəniyyət layihəsi olaraq geniş əks-səda doğurub. Festivalda Böyük Britaniya, Rusiya, ABŞ, İtaliya, Sloveniya, İsveçrə, Fransa, Polşadan və digər dövlətlərdən dünya şöhrətli musiqiçilər iştirak edirlər. Təbii ki, Mehriban xanım Əliyevanın təşəbbüsü və rəhbərliyi ilə həyata keçirilən çoxsaylı mədəniyyət layihələri mədəni irsimizin, milli incəsənətimizin inkişafına böyük töhfələr verməkdədir.

Mehriban xanım Əliyeva Qəbələ IV Beynəlxalq Musiqi Festivalının açılış mərasimində qeyd edib ki, qədim zamanlardan tolerantlıq ənənələrinin qorunub saxlandığı müxtəlif xalq və dinlərin nümayəndələrinin əsrlər boyu sülh içində yaşadığı, mədəniyyət və sivilizasiyalararası təbliği və inkişafına daim öz töhfəsini verən Azərbaycan son illər musiqi və incəsənət festivallarının, konfrans və sərgilərinin keçirildiyi məkan kimi tanınır. Fərəhləndirici haldır ki, müxtəlif mədəniyyətlərin qarşılıqlı zənginləşməsinə səbəb olan bu tədbirlər ildən-ilə daha böyük vüsət alır.

Mehriban xanım 2009-cu ildən Azərbaycanın gözəl guşələrindən biri olan Qəbələdə Beynəlxalq Musiqi Festivalının keçirilməsi ilə milli musiqi mədəniyyəti tarixində yeni ənənənin təməlinin qoyulduğunu diqqətə çatdırıb: “Beynəlxalq mədəni əlaqələrinin genişləndirilməsi, zəngin musiqi mədəniyyətimizin dünya ictimaiyyətinə çatdırılması, xalqlar arasında qarşılıqlı anlaşma və dostluğun möhkəmləndirilməsi işinə xidmət edən bu festival gözəl bir ənənəyə çevrilərək, öz beynəlxalq nüfuzunu ildən-ilə artırır. İnanıram ki, hər il olduğu kimi, bir çox dünya şöhrətli musiqi xadimlərinin iştirakı ilə keçirilən builki festival da unudulmaz musiqi bayramına çevriləcək və musiqi mədəniyyəti tariximizdə mənalı səhifələrdən biri kimi qalacaq”.

Azərbaycanın ev sahibliyi etdiyi festival - Qəbələ IV Beynəlxalq Musiqi Festivalı bu dəfə də milliyyətindən, dinindən və siyasi baxışlarından asılı olmayaraq, bütün musiqisevər insanları Qəbələyə - gözəl məkana cəmləşdirib.

Nəzakət ƏLƏDDİNQIZI

Səs.- 2012.-26 iyul.-S.3.