İstiqlal günü

 

(28 May Respublikamızın Müstəqillik Günüdür)

 

Bu gün, Vətən oğlu, güldü növrağın,

Əlvan libasını geydi gülzarın.

Ucaldı baş üstə üçrəng bayrağın,

Yetişdi sonuna hər intizarın.

 

Çatdıq azadlığın təntənəsinə,

İmzamız imzalar içinə düşdü.

Səsimizi qatdıq bəşər səsinə,

Yurdumuz səadət mülkünə düşdü.

 

Üzlər sevinc tapdı, baxışlar fərəh,

Bayram ruhundadır açılan güllər.

Çaylar tək məcraya sığışmır ürək,

Bu gün fərəhindən sevinir ellər.

 

Dəniz şahə qalxır, təlatümlənib,

Ləpələr sahilə çəkir sığalın.

Al-əlvan geyinib qərənfillərim,

Coşaraq eşqilə bu istiqbalın.

 

Şəlalə istiqlal təranəsilə,

Oyadır yuxudan meşəni, dağı.

Günəş şəfəq səpir təntənəsilə,

Min bir rəngə çalır üçrəng bayrağım.

 

Geyib toy libasın anamız Vətən,

Gülür fərəhindən bu gün ürək, can.

Jalələr səpilir yerə göylərdən,

Gülür fərəhindən hər tərəf, hər yan,

Çiçək tək bərq vurur yurd - Azərbaycan!

 

Aydın İsmayılov,

Təqaüdçü-mühəndis,

Sumqayıt şəhəri

Səs.- 2016.- 28 may.- S.12