Ölkəmizdə dünya standartlarına uyğun turizm formalaşıb

Bayram günlərində "Şahdağ" Qış-Yay Turizm Mərkəzini ziyarət edənlərin sayı 13 mindən artıq olub.

 

Dünyanın aparıcı və inkişafda olan ölkələri sırasında mövqeyi, eləcə də, mövcud potensialı ilə seçilən Azərbaycan qısa bir dövr ərzində milli maraqlarının zəminində formalaşıb. Dövlət tərəfindən həyata keçirilən milli strategiya, ictimai, siyasi və mədəni mövqe Azərbaycanın iqtisadiyyatına, sosial rifahının yüksəlməsinə səbəb olan amillərdir. Vurğulayaq ki, Azərbaycan iqtisadiyyatının əsasını təşkil edən neftbununla bağlı imzalanan beynəlxalq sazişlər, müqavilələr dövlətin maliyyə vəsaitinin yüksəlməsinə və bunun müqabilində ölkənin bütövlükdə sferasının dəyişməsinə səbəb olub. Məlum olduğu kimi, ölkə iqtisadiyyatına neft sektoru tərəfindən gələn gəlirin bərabərində, ondan daha artıq şəkildə turizm sektoru gəlir gətirmə gücünə malikdir. Ölkənin yeraltı və yerüstü sərvətləri, mövcud iqlimin olması Azərbaycan turizmi üçün lazımi şəraitin olduğunu göstərir. Turizmin inkişafı üçün Azərbaycanda kifayət qədər imkanlar mövcuddur və təbii-coğrafi potensialı var. Dünyada mövcud olan 11 iqlimin 9-nun Azərbaycanda olması bu ölkənin turizm  üçün  əlverişli bir məkan olması haqqında aydın təsəvvür yaradır. Elə bu faktın özü Azərbaycanın beynəlxalq turizm marşrutuna daxil olması üçün kifayət edir. Ölkəmizin dənizi, aranı, dağı, meşələri, çayları, bulaqları, gölləri, yaylaqları turistlərin ölkəmizə cəlb olunması üçün diqqətiçəkən  obyektlərdir. Məhz bu faktlar turizm ilə məşğulluğun  aktuallığını çox qabarıq şəkildə üzə çıxarır. Bu fakt, sözsüz ki, turizmin  infrastrukturuna təsirsiz ötüşmür. Ancaq bu hallara baxmayaraq, bu gün Azərbaycanın turizmi üçün əlverişli coğrafi şərait, müxtəlif iqlim  qurşaqları, zəngin heyvanat aləmi, dənizi və dənizsahili  qumluqları, qədim mədəni, tarixi irsi, milli  ənənələri, zəngin milli mətbəxinin olması diqqəti cəlb edən amillərdir. Sevindirici haldır ki, bu reallıqların və turizm sahəsinə ayrılan diqqətin nəticəsində son illərdə Azərbaycana gələn turistlərin sayında nəzərəçarpan artım müşahidə olunur. Ölkəmizin müxtəlif ərazilərində dünya standartlarına uyğun gələn otellər, əyləncə mərkəzləri, istirahət zonaları yaradılıb. Müxtəlif görkəmdə və xidmətdə olan otellərin inşası buraya gələn axının yüksək səviyyədə təminatına əsas verir. Azərbaycanın Xaçmaz, Qəbələ, İsmayıllı, Şamaxı, Quba, Masallı kimi istirahət zonalarında istirahət edənlərin sayının artması Azərbaycan turizminə olan diqqətin göstəricisidir.Azərbaycan tarixində ilk dağ-xizək turizm mərkəzi olan "Şahdağ" Qış-Yay Turizm Kompleksinin də istifadəyə verilməsi turizmin inkişafında mühüm addımdır. Əsrlər boyu Avropa və Yaxın Şərq arasında qapı funksiyasını yerinə yetirən Azərbaycanın şimal-şərq hissəsində möhtəşəm Qafqaz dağlarının kölgəsində görülməmiş gözəlliklər gizlənir. Qədim buzlaqlar, dərin dərələr, heyrətamiz dağ gölləri, bitkiheyvan aləminin ekoloji  xəzinəsi buradadır. İl boyu idman və istirahətə çox əlverişli iqlimi olan Şahdağın -20°C soyuq qışı +20°C isti yay axşamları ilə əvəzlənir. Bura, regionun ən böyük xizək kurortunun yerləşdiyi, dünyanın ən böyük milli parklarından biri üçün müqayisəolunmaz bir məkandır.Qış-Yay Turizm Kompleksi qapılarını qonaqların üzünə açdığı elə ilk günlərdən turistlərin böyük marağına səbəb olub. "Şahdağ" Qış-Yay Turizm Kompleksində xizəksürmə, kanat yolu və digər xidmətlər, ticarət mərkəzi, restoran, kafe, oyun zalı və s. turistlərin ixtiyarındadır. Qusar rayonu ərazisində dəniz səviyyəsindən 2500 metr yüksəklikdə yerləşən kompleksə bayram günlərində turist axını daha da artmışdır. "Şahdağ" Turizm Mərkəzində möhtəşəm Yeni İl gecəsi möhtəşəm keçirilib."Şahdağ" Turizm Mərkəzində "Şahdağ", "Zirvə", "Pik Palace" və "Park Chalet" hotellərində təşkil olunan Yeni İl şənlikləri hələ uzun müddət yaddaşlardan silinməyəcək. Burada - əzəmətli Şahdağ dağlarının əhatəsində əsl qış nağılı yaşamaq istəyənlər üçün unudulmaz ab-hava yaradılmış, xüsusilə, sehrli və əsrarəngiz Şahdağ gecələri qonaqlara özünəməxsus nağıl qəhrəmanı kimi hiss etmək şansı vermişdir.Turistlərin məmnunluğu və rahatlığını təmin etmək məqsədi ilə zövqlü və ən yüksək standartlara cavab verən istirahət təmin edilib. Təntənəli Yeni İl şənlikləri və füsunkar Şahdağ səmasında möhtəşəm atəşfəşanlıq, ardınca sübhün erkən çağlarınadək davam edən musiqi ziyafəti qonaqların zövqünü oxşamış, ağappaq qarla örtülmüş Şahdağ yamacları istər yerli, istərsə də əcnəbi turistlərdə ancaq müsbət təəssüratlar yaratmışdır.Məlumat üçün bildirək ki, keçən illə müqayisədə turistlərin sayında kifayət qədər artım müşahidə olunmuşdur və cəmi bir neçə gün davam edən bayram günlərində turizm mərkəzini ziyarət edənlərin sayı 13 mindən artıq olmuşdur. Kəskin və şaxtalı hava şəraiti Yeni İldə Şahdağda istirahət etmək və göz oxşayan qardan zövq almaq istəyənlərə mane olmamışdır.Xatırladaq ki, devalvasiyaya baxmayaraq, hotel qiymətlərində heç bir dəyişiklik olmamışdır və yaxın gələcəkdə istər hotel, istərsə də digər əyləncə xidmətləri ilə bağlı hər hansı qiymət artımının olması gözlənilmir.Azərbaycanda ilk qış turizm mərkəzi olaraq ilbəil xidmətlərin keyfiyyətinin artırılması və müştəri məmnunluğunun təmin edilməsi əsas şüara çevrilib. Qeyd edək ki, burada xizək mövsümü davam edir. Turistlər istirahət mərkəzindəki xizək və snoubord sürmə, qarda gəzinti, kanatla dağa dırmanma, aeroxizək sürmə, tübinq, qar təmizləmə maşınlarında səyahət kimi çoxsaylı qış əyləncələrindən istifadə edə, eləcə də 20 restoran, kafebar, SPA və sağlamlıq mərkəzinin xidmətlərindən yararlana bilərlər.

 

Səs.- 2016.- 5 dekabr.- S.- 12