İmadəddin Nəsiminin 650 illik yubileyi ilə bağlı qiraət müsabiqəsi keçirilib

Prezident İlham Əliyevin 11 yanvar tarixli Sərəncamına əsasən, 2019-cu ilin “Nəsimi ili” elan edilməsi ilə bağlı Azərbaycan Dövlət Mədəniyyət və İncəsənət Universitetində tədbirlər planı hazırlanıb.

Open.az xəbər verir ki, tədbirlər planına uyğun olaraq, 2-17 aprel tarixlərində ADMİU-da Azərbaycan bədii və fəlsəfi fikrində dərin iz qoymuş mütəfəkkir şair İmadəddin Nəsimiyə ithaf olunan “Hüsnü-cəmal, əqli kamal” adlı ali məktəblərarası bədii qiraət müsabiqəsi keçiriləcək.

Təyin olunmuş şərtlərə əsasən, müsabiqəyə Nəsiminin şeirləri və Nəsimi irsinə həsr olunmuş əsərlər təqdim olunub. Müsabiqədə həmçinin Azərbaycanlı tələbələrin Nəsiminin şeirlərini əcnəbi dildə ifa etməsi də nəzərdə tutulub. Ədalətli rəqabət prinsipinə əməl etmək üçün müsabiqədə ADMİU-nun məzunları və tələbələri ilə digər ali məktəb tələbələri müxtəlif nominasiyalar üzrə yarışacaq.

18 - 27 yaşlı gəncləri əhatə edən müsabiqənin əsas məqsədlərindən biri Nəsimi irsinin müasir humanitar düşüncənin tələbləri kontekstində aktuallığının vurğulanması, milli mədəni-mənəvi dəyərlərin təbliğidir. Qaliblər seçilmiş şeirin məzmuna uyğun jest və mimikalardan, səs tonundan məqsədyönlü istifadə edilməsi, nitqin aydınlığı, səlisliyi və ifadəliliyi, təqdimetmə bacarığı, ifa üçün ayrılmış vaxta riayət edilməsi kimi meyarlara əsasən müəyyənləşdiriləcək. İki mərhələdən ibarət müsabiqənin yekununda – 20 aprel tarixində Beynəlxalq Muğam mərkəzində qaliblərin mükafatlandırılması mərasimi və qala konsert baş tutacaq. I, II, III yerlərin sahiblərinə diplom və pul mükafatı veriləcək.

R.Hüseynova

Səs.- 2019.- 19 iyun.- S.5