YAP Yasamal rayon təşkilatında "Nəsimi İli" çərçivəsində tədbir keçirilib

Bu gün Yeni Azərbaycan Partiyası Yasamal rayon təşkilatında "Nəsimi İli" çərçivəsində tədbir keçirilib. İlk olaraq, tədbir iştirakçıları rayon təşkilatının foyesindəki Ulu Öndər Heydər Əliyevin büstünü ziyarət edib, önünə gül dəstələri düzərək, xatirəsini bir dəqiqəlik sükutla yad ediblər.

Tədbiri giriş sözü ilə açan YAP Yasamal rayon təşkilatının sədri Tağı Əhmədov 2019-cu ilin "Nəsimi İli" elan edilməsi haqqında Azərbaycan Respublikası Prezidentinin 2019-cu il 11 yanvar tarixli Sərəncamının tarixi əhəmiyyətindən danışaraq, "Nəsimi İli" çərçivəsində ölkəmizdə geniş səpkidə tədbirlərin reallaşdığını diqqətə çatdırıb. Təşkilat sədri qeyd edib ki, ictimai-fəlsəfi şeirləri ilə Azərbaycan ədəbiyyatında xüsusi yer tutan Nəsiminin ilk dəfə yubileyinin ölkəmizdə keçirməsinin təşəbbüskarı Ulu Öndər Heydər Əliyev olub. Ulu Öndər Heydər Əliyevin təşəbbüsü ilə Nəsiminin yubileyinin UNESCO səviyyəsində qeyd edilməsi Azərbaycan tarixində olduqca fövqəladə hadisəyə çevrilmişdi.

Tədbirdə filologiya elmləri doktoru, professor Vüqar Əhməd çıxış edərək, "Nəsimi İli"nin önəmindən, böyük mütəfəkkirin zəngin yaradıcılıq palitrasından danışıb. O. İmadəddin Nəsiminin 650 illik yubileyi münasibətilə 2019-cu ilin "Nəsimi ili" elan edilməsi haqqında Azərbaycan Prezidentinin məlum Sərəncamının ölkəmizin mədəni həyatında əlamətdar və təqdirəlayiq hadisə olduğunu vurğulayıb. Qeyd edib ki, Heydər Əliyev Fondunun vitse-prezidenti Leyla Əliyevanın təşəbbüsü ilə Şamaxıda Nəsimi günləri keçiriləcək: "Nəsimi yaradıcılığında bütün bəşəri dəyərləri nəzmə çəkib. Böyük söz ustadının əsərləri həm doğma ana dilində, bəziləri isə, bir sıra xarici dillərdə nəfis şəkildə nəşr olunub. Sovet dövründə Nəsimi ateist bir şair kimi təqdim olunsa da, onun yaradıcılığının böyük bir hissəsi "Qurani-Kərim"ə əsaslanır".

Tədbirdə çıxış edən filologiya üzrə fəlsəfə doktoru Qürbət Mirzəzadə altı yüz əlli il öncə, yaşayıb-yaratmasına baxmayaraq, şairin ana dilimizi və bədii sözü yeni-yeni zirvələrə qaldırdığını diqqətə çəkib. "Şair və mütəfəkkir İ.Nəsiminin 650-cı ildönümünün qeyd edilməsi üçün Azərbaycan Prezidenti İlham Əliyev tərəfindən müvafiq Sərəncamın verilməsi şairə verilən ən

yüksək dəyərin göstəricisidir" deyən Q.Mirzəzadə bu Sərəncamın onun yaradıcılıq irsinin daha dərindən öyrənilməsinə, yeni tədqiqatların aparılmasına imkanlar açdığını vurğulayıb.

Sonra Bakı Dövlət Universitetinin və Azərbaycan Memarlıq və İnşaat Universitetinin tələbələri Nəsiminin qəzələllərini ifa ediblər.

Tədbir Azərbaycan Milli Konservatoriyasının nəzdindəki İncəsənət Gimnaziyasının şagirdləri tərəfindən hazırlanmış Nəsimiyə həsr olunmuş səhnəciklə davam etdirilib.

Nəzakət ƏLƏDDİNQIZI

Səs.- 2019.- 26 sentyabr.- S.7