İslam mədəniyyəti kitab səhifələrində adlı beynəlxalq sərgi açılıb

 

M.F.Axundov adına Azərbaycan Milli Kitabxanasının sərgi salonunda İqtisadi Əməkdaşlıq Təşkilatına (İƏT) üzv olan ölkələrin Milli Kitabxanalarının Direktorları Şurasının II konfransı çərçivəsində İslam mədəniyyəti kitab səhifələrində adlı beynəlxalq sərgi açılıb.

Bakı - İslam mədəniyyətinin paytaxtı-2009 tədbirləri çərçivəsində keçirilən sərgidə İƏT-in 9 ölkəsinin milli kitabxana fondlarının hər birindən islam mədəniyyətinə və incəsənətinə həsr edilmiş 50-60, Azərbaycandan isə 500-dən çox kitab nümayiş olunur. Burada beynəlxalq müsabiqələr laureatı, tanınmış rəssam Yavər Əsədovun xəttatlıq, İçərişəhərin Xalq sənəti evinin XIX əsrə və XX əsrin əvvəllərinə aid Azərbaycan dekorativ tətbiqi sənət nümunələri böyük maraq doğurur.

Mədəniyyət və turizm naziri Əbülfəs Qarayev, İƏT-in üzvü olan ölkələrin Milli Kitabxanalarının Direktorları Şurasının prezidenti, İranın Milli Kitabxana və Arxivinin sədri, İran Prezidentinin mədəniyyət məsələləri üzrə müşaviri Əli Əkbər Əşəri və Azərbaycanın tanınmış ilahiyyatşünas alimi, akademik Vasim Məmmədəliyev sərginin açılışında islamda mədəniyyətə, elmə və kitaba verilən önəmdən ətraflı danışdı.

V.Məmmədəliyev Azərbaycanın elm və sənət adamlarının islam mədəniyyətinin inkişafına verdiyi əvəzsiz töhfələrdən söz açaraq vurğuladı ki, Məhəmməd Peyğəmbərin vəfatından sonrakı illərdə bununla bağlı kifayət qədər sübutlar vardır. Bu mənada, Bakının 2009-cu ildə islam mədəniyyətinin paytaxtı elan olunması təsadüfi deyildir.

 

 

ZÜMRÜD

 

Səs.- 2009.- 21 aprel.- S. 12.