Alimlər dünyanın çırağı, axirətin nurudurlar

Xızı rayon Mərkəzi Xəstəxanasının işçiləri akademik Zərifə Əliyevanın 86 illik yubileyini qeyd etdilər

“O, yaxşı ana, vəfalı ömür-gün yoldaşı, intellektual keyfiyyətləri cəm halda özündə birləşdirən ziyalı, dünya tibb elminə əvəzolunmaz töhfələr verən həkim-oftalmoloq idi. Allahın öz bəndəsinə bəxş etdiyi bütün müsbət keyfiyyətləri özündə cəmləşdirən bir insan idi, Onu hamı belə tanıyırdı”.

Heydər Əliyev

Vaqif Abdullayev: “Zərifə xanım Əliyeva vətənini, millətini, hər şeydən əvvəl, dərin məhəbbətlə sevən bir Azərbaycan alim-qadını idi”

Dünən Azərbaycan oftalmologiyasını dünya səviyyəsində tanıdan akademik Zərifə xanım Əliyevanın 86 illik yubileyi münasibətilə Xızı rayonun Mərkəzi Xəstəxanasında səhiyyə işçilərinin iştirakı ilə tədbir keçirildi. Tədbirdə çıxış edən YAP Siyasi Şurasının üzvü, rayon icra hakimiyyətinin başçısı Vaqif Abdullayev dünyaşöhrətli alimin keçdiyi həyat yolundan danışdı. Bildirdi ki, Zərifə xanım Əliyeva oftalmologiyanın inkişafı üçün böyük işlər görülmüş, keçmiş SSRİ-nin Sülhü Müdafiə Komitəsinin üzvü, Azərbaycan Sülhü Müdafiə Komitəsinin sədr müavini, “Bilik” Cəmiyyəti idarə heyətinin, keçmiş ittifaqın Oftalmoloqları Elmi Cəmiyyəti idarə heyətinin, “Oftalmologiya xəbərləri” jurnalının redaksiya heyətinin üzvü olmuşdur. O, bir sıra orden və medallara layiq görülmüş, Azərbaycanın əməkdar elm xadimi fəxri adını almışdır.  

V.Abdullayev, Zərifə xanım Əliyeva Azərbaycanda ilk dəfə olaraq traxoma xəstəliklərinin müalicəsini göstərmiş, minlərlə insanın bu xəstəlikdən azad olunduğunu bildirdi: “O, sadə, təvazökar, yüksək səviyyəli, öz ixtisasını dərindən bilən və o cümlədən, biliyini tələbələrə öyrədən bir müəllim kimi də fəaliyyət göstərmişdir. Elimizin bu gözəl, mərd, humanist keyfiyyətlərə malik xanımı təkcə həkim deyildi, vətənini, millətini, hər şeydən əvvəl, dərin məhəbbətlə sevən bir Azərbaycan alim-qadını idi”.

Jalə Hüseynova: “Zərifə xanım işıqlı amalların, nəcib duyğuların təcəssüm tapdığı şərəfli ömür yaşayan böyük dövlət xadimi idi”

Görüşdə çıxış edən Xızı rayon Mərkəzi Xəstəxanasının həkimi Jalə Hüseynova görkəmli alim Zərifə Əliyevanın Azərbaycan  tibb elminə bəxş etdiyi töhfələrdən danışdı. O, işıqlı amalların, nəcib duyğuların təcəssüm tapdığı şərəfli ömür yaşayan Zərifə xanımın əziz xatirəsinin xalqımızın qəlbində əbədi yaşayacağını söylədi. Görkəmli oftalmoloq alimin gözün zədələnməsinin öyrənilməsi və profilaktikası sahəsindəki bir sıra orijinal kəşflərinə görə, SSRİ Tibb Elmləri Akademiyasının akademiki M.İ.Averbax adına mükafatla təltif edildiyini xatırladan natiq, Zərifə xanımın Sovet İttifaqı dövründə bu mükafata layiq görülən ilk qadın alim olduğunu nəzərə çatdırdı: “Şin istehsalında gözün potologiyası” monoqrafiyasına görə isə Zərifə xanım Tibb Elmləri Akademiyasının akademik Averbax adına mükafatına layiq görülmüşdür. Onun “Gözdə və görmə-əsəb yollarında yaş dəyişikliyi” monoqrafiyası da mütəxəssislərin diqqətini cəlb etmişdir. “Oftalmologiyanın aktual problemləri” monoqrafiyasında isə görmə orqanının müxtəlif potologiyası zəminində gözün müasir üsullarla tətbiqi və müalicəsi öz əksini tapıb.

Zərifə  xanımın çoxşaxəli istedadı müxtəlif ixtisas sahələrində də özünü büruzə verirdi. O, oftalmoloji cərrahiyyə əməliyyatlarındakı, gözün virus xəstəliyinin və görmə orqanının damar patalogiyasının müalicəsindəki elmi yeniliklərlə ciddi maraqlanırdı. Bütün bunlar Zərifə xanımın işıqlı xatirəsini xalqımızın yaddaşına əbədi həkk edib, onu ölməzlik zirvəsinə yüksəldib”. 

Vüqar Rəhimzadə: “Azərbaycan oftalmologiya elmini bütün dünyada tanıdan yüksək intellekt sahibi akademik Zərifə xanım Əliyevanın elmdə açdığı yol zirvəyə gedən yoldur”

Tədbirdə çıxış edən YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə  xalqına şərəflə xidmət edən akademik Zərifə xanım Əliyevanın unudulmaz xatirəsinin hər zaman yaddaşlarda yaşayacağını bildirdi. V.Rəhimzadə qeyd etdi ki, böyük şəxsiyyətlər, həqiqi elm fədailəri yaşadıqları mühitin hüdudlarına sığmırlar. Çünki belə şəxsiyyətlər ucaldıqları zirvəni qeyri-adi əməksevərlikləri, intəhasız ürək genişliyi, təmənnasız xeyirxahlıqları, səmimi hiss və duyğuları, fitri istedad, nadir bilik və qabiliyyətləri bahasına fəth edirlər: “Bu baxımdan, Azərbaycan oftalmologiya elmini bütün dünyada tanıdan yüksək intellekt sahibi akademik Zərifə xanım Əliyevanın elmdə açdığı yol ildən-ilə inkişaf edir, onun monumental əsərləri, elmi nailiyyətləri, pedaqoji səriştəsi, yüksək səviyyəli mədəni irsi daim araşdırılır, öyrənilir, neçə-neçə tədqiqat əsərinin mövzusuna çevrilir. Akademik Zərifə xanım Əliyevanın həyat və tale kitabını vərəqlədikcə, onun həm nəcib bir insan, görkəmli alim, həm də xalqını, elini, yurdunu, vətənini dərin məhəbbətlə sevən böyük bir vətəndaş olduğunu görürük”.

Bəhruz Quliyev: “Zərifə xanım təkcə alim, istedadlı  pedaqoq, tərbiyəçi deyildi, O, həm də kövrək qəlbli insan, qayğıkeş və sevimli qadın, ana və nənə idi”

Görüşdə “Səs” qəzetinin baş redaktoru və “Səs” İnformasiya Agentliyinin (SİA) baş direktoru Bəhruz Quliyev çıxış edərək Azərbaycan qadınının sədaqəti, mübarizliyi, özünəməxsus ictimai baxışları ilə dünya qadınlarına örnək olduğunu bildirərək, onu da vurğuladı ki, Zərifə xanım Əliyevanın Azərbaycanda oftalmologiya elminin inkişafında müstəsna xidmətləri olması ilə yanaşı sədaqətli həyat yoldaşı, gözəl ailə başçısı, qayğıkeş ana olub: “Bu gün hansı həkimdən, tibb işçisindən soruşsan, görkəmli oftalmoloq, akademik Zərifə xanım Əliyeva haqqında həvəslə, qəlb açıqlığı ilə söhbət açır və deyirlər: “O, hamıya ana, bacı və səmimi yoldaş idi”.

B.Quliyev onu da vurğuladı ki, Zərifə xanım Azərbaycanın tarixində əvəzsiz xidmətləri olan iki böyük şəxsiyyətin, dünya şöhrətli iki nüfuzlu liderin birinin ömür-gün yoldaşı, birinin anasıdır: “ Zərifə xanım təkcə alim, istedadlı  pedaqoq, tərbiyəçi deyildi, O, həm də kövrək qəlbli insan, qayğıkeş və sevimli qadın, ana və nənə idi. Zərifə xanım həssas qadın ürəyi ilə bu ocağı isindirir, ailəsini əsən mehdən belə qoruyurdu. Başa düşürdü ki, Heydər Əliyevin ailəsi beş-on nəfərin deyil, bütövlükdə cəmiyyətin diqqət mərkəzindədir. Odur ki, övladlarını mənəvi cəhətdən zəngin, yetkin insanlar kimi böyüdür, soyköklərinin adına layiq tərbiyə edirdi”.

Hikmət Babaoğlu: “ Minlərlə insanı günəşə, işığa qovuşdurmaq, tor gözlər qarşısında təbiət, səma füsunkarlığını açmaq böyük ürək sahibi olan insanın vətənpərvərliyi, xeyirxahlığı deyilmi?”

Tədbirdə çıxış edən “Yeni Azərbaycan” qəzetinin baş redaktoru Hikmət Babaoğlu Zərifə xanım Əliyevanın timsalında gözəllik, humanistlik, xeyirxahlıq və sadəlik bir vəhdət təşkil etdiyini bildirdi. Onu da qeyd etdi ki, böyük alim, istedadlı pedaqoq, tibb elminə əvəzolunmaz töhfələr verən həkim - oftalmoloq Zərifə xanım Əliyeva tibb elminin inkişafına verdiyi töhfələr dünya səhiyyəsində xüsusilə seçilir: “Onun böyük amalı insanları zülmət pəncərəsindən qorumaq olub. Minlərlə insanı günəşə, işığa qovuşdurmaq, tor gözlər qarşısında təbiət, səma füsunkarlığını açmaq, böyük ürək sahibi olan insanın vətənpərvərliyi, xeyirxahlığı deyilmi? O, daim xeyirxah əməlləri ilə imkansızlara analıq etmişdir. Həmin humanist addımlar bu gün Əliyevlər ailəsinin üzvü Mehriban xanım Əliyeva tərəfindən davam etdirilir. Onun xatirəsi Azərbaycanda insanların qəlbində həmişə ulduz kimi parlayacaqdır. Onun miras qoyub getdiyi irs bugünkü gənc nəslin yolunu daim işaqlandıracaqdır”.

Tədbir iştirakçıları çıxışlarında bir daha vurğuladılar ki, qədirbilən xalqımız insanlara məhəbbətlə dolu olan, mənalı bir ömür yolu keçmiş, Zərifə xanım Əliyevanın xatirəsini əziz tutub, hər zaman onu yad edəcəklər.

Rəfiqə Kamalqızı

Səs.- 2009.- 25 aprel.- S. 5.