Qonaqpərvərlik və Turizm Sənayeləri üzrə yeni meyillər
Azərbaycanla Yunanıstan arasında bu sahədə
birgə əməkdaşlıq mövzusunda seminar
keçirilir
Dünən, Hyatt Regensy
otelinin "Quba" zalında Azərbaycanın Mədəniyyət
və Turizm Nazirliyi ilə Yunanıstanın Turizm Nazirliyi
arasında birgə əməkdaşlıq, həmçinin,
Yunanıstanın ölkəmizdəki səfirliyinin dəstəyi
ilə cari ilin 2-6 fevral tarixlərində "Qonaqpərvərlik
və Turizm Sənayeləri üzrə yeni meyillər"
mövzusunda keçiriləcək seminara start verilib. Qeyd edək
ki, beş gün davam edəcək seminar Yunanıstanın
Turizm Nazirliyinin 10 nəfər mütəxəssisi tərəfindən
aparılacaq.
Seminarda mehmanxana və
restoran menecerləri, turizm şirkətlərinin rəhbər
işçiləri, həmçinin, Azərbaycan Turizm
İnstitutunun müəllim və tələbələrindən
ibarət 120 nəfərlik nümayəndə iştirak edəcək.
Ölkəyə turizm sahəsində müəyyən mənada
yeniliklər gətirəcək seminarda, ölkəmizi mədəniyət
və turizm naziri Əbülfəs Qarayev və nazirliyin turizm
şöbəsinin müdiri Aydın İsmiyev,
Yunanıstanın turizm nazirliyinin turizm üzrə təhsil və
treninq təşkilatının beynəlxalq ictimai əlaqələr
ofisinin müdiri Spiros Qasparinatos, həmçinin,
Yunanısıtanın ölkəmizdəki fövqəladə
və səlahiyyətli səfiri İoannis Metaxas və səfirliyin
iqtisadi, ticarət üzrə birinci katibi Olqa Mezeridou Fauova təmsil
edəcək.
Bu cür seminarın
keçirilməsində əsas məqsəd yemək-içmək
və mehmanxana sahələrində çalışan
işçilərin peşəkarlıq səviyyəsinin
yüksəldilməsi, həmçinin, turizm şirkətlərində
işin düzgün qurulmasından ibarətdir. Tədbirdə
çıxış edən Ə.Qarayev ölkəmizdə
turizmin inkişafı üçün son illər
mühüm addımlar atıldığını
qonaqların nəzərinə çatdıraraq, bu sahənin
daha da əlverişli bir formada irəliləyişinə nail
olmaq naminə bundan sonra da zəruri işlərin
görülməsinin nəzərdə tutulduğunu
vurğulayıb. Onun sözlərinə görə, Azərbaycanın
yerləşdiyi əlverişli coğrafi mövqeyi imkan verir
ki, ölkədə çoxlu sayda turizm obyektələri
mövcud olsun. Eyni zamanda, turizm sahəsinin də dövlətimizin
qarşısında duran ən prioritet sahələrdən
biri olduğunu bildirən nazir, ölkəmizin hər bir
strukturunda olduğu kimi, turizm strukturunun da beynəlxalq
standartlara uyğunlaşmasının vacibliyini söyləyib.
Ə.Qarayev Azərbaycanda günü-gündən artan
imkanların müqabilində turizm sahəsində
mühüm irəliləyişlərə nail olmuş
dövlətlərin təcrübəsindən
yararlanmağın da vacib prinslərdən olduğunu qeyd edib.
Məhz bu məqsədlə də davamlı şəkildə
ölkəmizdə və onun hüdudlarından kənarda bu
sahənin Azərbaycanda inkişafını təmin etmək
üçün bir sıra işlərin
görüldüyünü seminar
iştirakçılarının diqqətinə
çatdıran Ə.Qarayev, hazırkı mərhələdə
bu sahənin dünya dövlətləri üçün ən
gəlirli bir sahə olduğunu bildirib.
Seminarda
çıxış edən digər qonaqlar da Azərbaycanın,
bütün sahələrdə olduğu kimi, turizm sahəsində
də etibarlı partnyor olduğunu bildirdilər. Onların
sözlərinə görə, inkişafda olan Azərbaycan
üçün turizm ən perspektivli bir sahədir. Bunun
üçün isə beynəlxalq təcrübədən
istifadə edərək ölkədə turizmin
inkişafına nail olmağın ən zəruri addım
olduğunu bildirən qonaqlar belə seminarların keçirilməsinin
böyük effekt verəcəyini vurğulayıblar.
Onu da qeyd edək ki,
seminarın sonunda iştirakçılara müvafiq
sertifikatlar təqdim olunacaq.
Səs.- 2009.- 3 fevral.- S. 9.