Musiqili Komediya Teatrı 100 illik yubiley ərəfəsində

Teatrda "İddialı qaraçı" tamaşası səhnələşdirilir

Azərbaycan Dövlət Musiqili Komediya Teatrı yüz illik yubileyi ərəfəsində daha bir əsərə səhnə həyatı verməyə hazırlaşır. Mədəniyyət və Turizim Nazirliyinin sifarişi olan bu yeni tamaşa İmre Kalmanın məşhur "İddialı qaraçı" əsəridir. Artıq tamaşanın məşqlərinə başlanılmışdır.

İmre Kalmanın adı Azərbaycan sənətsevərlərinə yaxşı tanışdır. Kollektiv hələ 1939-cu ildə bu məşhur müəllifin "Sirk kraliçası", "Silva" əsərlərinə müraciət etmişdi. "İddialı qaraçı" əsəri də on il əvvəl teatrın rus bölməsində tamaşaçılara təqdim olunmuşdur. Quruluşçu rejissor Faiq Zöhrabov bu dəfə dirijor Nazim Hacıəlibəyovla birgə "İddialı qaraçı"nın sənət iddiasını, istedadını, ifaçılıq məharətini, iradə və cəsarətini göz önündə sərgiləməyə çalışacaqlar. Tamaşanın səhnə tərtibatı əməkdar rəssam İsmayıl Məmmədova və istedadlı gənc rəssam, prezident təqaüdçüsü Əli Cəfərova həvalə olunmuşdur.

Xalq artisti Elxan Əhədzadə tamaşada Pali Raç rolunda tamaşaçıların görüşünə gələcəkdir. Obrazın ikinci ifaçısı isə teatrın səhnəsində bir sıra maraqlı obrazlar yaratmış istedadlı aktyor Ələkbər Əliyevdir.

Fərid Əliyevlə Ramil Qasımov skripka kralının oğlu Lari Racın obrazını yaradacaqlar. Ülviyyə Əliyeva ilə Gültac Həsənova isə Racın qızı Zarinin rolunu paylaşacaqlar. Tamaşaçılar digər rollarda əməkdar artist Ramiz Məmmədovu, Nərgiz Kərimovanı, Novruz Əliyevi, Elçin Həmidovu və başqa aktyorları görəcəklər.

Zümrüd

Səs.- 2009.- 20 fevral.- S. 12.