Hərbi gücümüz artıb

Qarabağı işğalçılardan azad etməyə hazırıq

Yuxularımda gecələr Qarabağı viran görürəm,

Quruyub İsa bulağı, su yerinə qan görürəm.

Qartala bənzəyirdi xəritədə Azərbaycan,

Qartalın bir qanadı sınıb, yarımcan görürəm.

(Aqşin Fateh)

Bəli, yarımcandı bu gün Azərbaycan, qanadı sınan "qartal"dı. Gücü, potensialı, qüdrəti artsa da, yoxdu eşidən haqq səsini. Talanan yurdu "erməniləşdirilir", qədim məscidləri tövləyə çevrilir. Hələ bu azmış kimi, atəşkəs dövründə şəhid olmuş əsgərinin meyiti də geri verilmir.

70 milyard manatadək ziyan vurublar ölkəmə. Son hesablamaların statistikasıdı bu. Dəqiq rəqəm isə torpaqlar işğaldan azad olunandan sonra yenidən dəqiqləşdiriləcək. Elə milləti də bu sual düşündürür: "Görəsən, bu, nə zaman olacaq?"

Azərbaycan böyük sülh sazişi üzərində işə başlamağa hazırdır

Amma, deyəsən, olacaq. Çünki son zamanlar rəsmi açıqlamalar bunu deməyə əsas verir. Hələ indiyə qədər danışıqlar bu səviyyədə aparılmır və belə açıq fikir söylənilmirdi. İndi xarici işlər naziri Elmar Məmmədyarov aparılan danışıqların detallarını açıq şəkildə ictimaiyyətə bildirir. Ermənistan tərəfi referendumun keçirilməsinə tərəfdardır. Bu məsələdə Azərbaycanın mövqeyi ondan ibarətdir ki, səsvermədə ermənilərlə birgə Dağlıq Qarabağın azərbaycanlı icması da iştirak etməlidir. Tərəflər arasında müzakirə olunan prinsiplərə görə, referendumun bülletenlərindəki sualları tərtib etmək üçün həm Ermənistan və Azərbaycanın, həm də ATƏT-in Minsk qrupu həmsədr ölkələrinin nümayəndələrindən ibarət xüsusi komitə yaradılacaq. Lakin bu, yalnız məcburi köçkünlərin Dağlıq Qarabağa qayıtmasından sonra mümkündür. Azərbaycan yenilənmiş "Madrid prinsipləri" əsasında böyük sülh sazişi üzərində işə başlamağa hazırdır.

Kəlbəcər və Laçın 5 ilə qaytarılacaqmı?

Ermənistan tərəfi nə "hə", nə də "yox" deyir. "Madrid prinsipləri"nə görə, 5 il ərzində Kəlbəcər və Laçın boşaldılmalıdır. Ermənistan tərəfi yenə də bu məsələ ilə bağlı müzakirələri davam etdirmək istəyir. Kəlbəcər və Laçın tarixdə heç vaxt Dağlıq Qarabağın tərkibində olmayıb. Ona görə bu rayonlar da birmənalı olaraq digər 5 rayon kimi Azərbaycana qaytarılmalıdır. Ağdam, Füzuli, Zəngilan, Qubadlı, Cəbrayıl və Laçının cənub hissəsi birinci mərhələdə qaytarılmalıdır. Kəlbəcər və Laçına gəlincə, Ermənistanda Robert Köçəryan prezident olanda təklif edib ki, bu rayonlar 10 ilə qaytarılsın. Azərbaycan isə 1 il təklif edir. Sonra Serj Sərkisyan 7 il təklif edib. Azərbaycan isə 3 il müddətin üzərində dayanıb. Həmsədrlər isə 5 il təklif ediblər. Azərbaycan tərəfi buna razılıq verib. Hamı təklif verir. Amma bizdən başqa razılaşan yoxdur. Təktərəfli razılıqdı bu. Ümidliyik, bəlkə İrəvan da təkiddən sonra razılaşa.

"Allahın evi"ni tövləyə çeviriblər...

Danışıqlar getdiyi bir dönəmdə ermənilər daha bir vəhşiliyə əl atıblar. İşğal altında olan abidələrimizi dağıdan üzdəniraqlar indi də qədim məscidlərimizdən tövlə kimi istifadə edirlər. Məsələ ATƏT-in Osloda keçirilən XIX sessiyasının komitə iclaslarında müzakirəyə çıxarılıb. Dünən toplantıda Azərbaycan nümayəndə heyətinin hər bir üzvü Qarabağla bağlı məsələ qaldırıb. Nümayəndə heyətinin üzvü Eldar İbrahimov deyib ki, təmsil olunduğu İqtisadiyyat komitəsinin iclasında işğal olunmuş Azərbaycan ərazilərində ermənilərin tarixi məscidlərdən tövlə kimi istifadə etdiyini diqqətə çatdırıb.

"Bu problemin beynəlxalq hüquq səviyyəsində həllinin vacibliyini vurğuladım. Ermənistan nümayəndəsi isə dedi ki, bu, Ermənistana aid məsələ deyil. Guya, Dağlıq Qarabağda yaşayan ermənilərə aid məsələdir. Mən bu məsələ ilə bağlı danışıqların Ermənistanla aparıldığını yada saldım və bildirdim ki, belə yanaşma doğru deyil. Çünki Qarabağın Ermənistan tərəfindən işğal olunması bütün dünyanın qəbul etdiyi məsələdir".

"Ermənilər bu torpaqlara qonaq kimi gəliblər və özlərini də elə aparmalıdırlar"

Azərbaycan prezidenti İlham Əliyevin bu il məcburi köçkünlər qarşısında çıxışı zamanı söylədiyi fikirlər isə rəsmi İrəvana güclü mesaj olub. Bu mesaj Azərbaycanın artıq mövqeyini dəyişməsi ilə bağlıdır. Dövlət başçısı vurğulayıb ki, ermənilər bu torpaqlara qonaq kimi gəliblər və özlərini də elə aparmalıdırlar. Bu fikir işğalçıları himayə edənləri də düşündürməyə vadar edib. İlham Əliyevin ortaya qoyduğu mövqe isə bunu deməyə əsas verir ki, bu ölkə öz torpaqlarını geri qaytarmaq üçün istənilən vasitəyə əl atacaq. Hələ "Bakı - İslam mədəniyyətinin paytaxtı-2009" Mədəniyyət İlinin açılışı mərasimindəki çıxışı zamanı prezident "Biz bütün tarixi abidələrimizi torpaqlarımız işğal altından çıxandan sonra bərpa edəcəyik. Bütün şəhərləri yenidən bərpa edəcəyik, binaları tikəcəyik. Ancaq bunu etmək üçün Dağlıq Qarabağ münaqişəsinə son qoyulmalıdır. Azərbaycanın ərazi bütövlüyü bərpa olunmalıdır və bizim vətəndaşlarımız öz doğma torpaqlarına qayıtmalıdırlar" söyləmişdi.

Ordu quruculuğu ən prioritet məsələdir

"Azərbaycan Ordusu gündən-günə güclənir. Azərbaycanda ordu quruculuğu prosesi çox uğurla gedir və bu, bizə imkan verir ki, hərbi gücümüzü artıraq. Ordu quruculuğu hər bir ölkə üçün çox önəmli məsələdir. Xüsusilə müharibə şəraitində yaşayan ölkə üçün bu, prioritet olmalıdır. Bu, belədir və Azərbaycanda ordu quruculuğu ən prioritet məsələdir". Bunu prezident İlham Əliyev Silahlı Qüvvələrin yaradılmasının 92-ci ildönümü münasibətilə Müdafiə Nazirliyinin, Dövlət Sərhəd Xidmətinin və Daxili İşlər Nazirliyinin Daxili Qoşunlarının birləşmə və hissələrinin irimiqyaslı birgə əməliyyat-taktiki təlimini izlədikdən sonra hərbçilər qarşısındakı çıxışında deyib. Onun sözlərinə görə, Azərbaycan uzun illərdir işğaldan əziyyət çəkir və biz doğma torpaqlarımızı işğalçılardan azad etməyə hər an hazır olmalıyıq. Dövlət başçısının fikrincə, bunu etmək üçün siyasi və diplomatik səylərlə bərabər, Azərbaycan güclü orduya malik olmalıdır və bu proses uğurla gedir.

"Bu il Azərbaycanın hərbi xərcləri 2 milyard 150 milyon dollara bərabərdir"

Prezident deyib ki, bu gün Azərbaycan Ordusunun səviyyəsi çox yüksək zirvədədir: "Orduda peşəkarlıq, döyüş qabiliyyəti artır, ruh yüksəkliyi vardır. Eyni zamanda, ordumuzun maddi-texniki bazası möhkəmlənir və son illərdə bu işlərdə çox böyük addımlar atılıb. Ordumuzun bütün tələbatını ödəmək üçün dövlət tərəfindən kifayət qədər vəsait ayrılır. Sadəcə, bir rəqəmi demək kifayətdir ki, son bir neçə il ərzində, daha doğrusu, 7 il ərzində hərbi xərclərimiz 13 dəfədən çox artıb. Bu gün 2010-cu ilin bütün hərbi xərcləri Azərbaycanda 2 milyard 150 milyon dollara bərabərdir ki, bu da Ermənistanın bütün dövlət büdcəsindən çoxdur. Yəni bir neçə il bundan əvvəl qarşıya məqsəd qoyulub ki, Azərbaycanın hərbi xərcləri Ermənistanın bütün xərclərindən çox olmalıdır. Artıq bu məqsəd reallaşıb. Biz bundan sonra da hərbi gücümüzü artıracağıq, ordumuz üçün lazım olan bütün silah-sursatı və texnikanı alacağıq".

Dünya erməniləri tanımağa başlayıb

Azərbaycan hakimiyyətinin apardığı məqsədyönlü siyasət ölkə ictimaiyyətində böyük inam hissi yaradır ki, gec-tez biz öz tarixi torpaqlarımıza dönəcəyik, tarixi abidələrimizi bərpa edəcəyik.

Azərbaycan prezidenti İlham Əliyevin, eləcə də ölkəmizin birinci xanımı, "YUNESKO-nun xoşməramlı səfiri, Heydər Əliyev Fondunun prezidenti Mehriban Əliyevanın keçirdiyi bütün görüşlərdə bu məsələ xüsusilə önə çəkilir.

Mehriban Əliyevanın YUNESKO xətti ilə keçirilən tədbirlər çərçivəsində Azərbaycanın Ermənistan tərəfindən işğal olunmuş ərazilərində Azərbaycan xalqına məxsus tarixi, mədəni və dini abidələrin dağıdılmasını qeyd etmədiyi bir çıxışını belə xatırlamaq çətindir. O, təkcə çıxışlarında deyil, rəhbərlik etdiyi təşkilatların fəaliyyətində də Azərbaycan həqiqətlərinin dünyaya çatdırılması istiqamətində böyük işlər görür. Dünyanın demək olar ki, bir çox dillərində Azərbaycan həqiqətləri adlı kitablar nəşr olunub ki, burada Qarabağın tarixi, Ermənistanın Azərbaycan ərazilərini işğal etməsi, Xocalıda törətdikləri soyqırım, erməni terror təşkilatlarının dinc azərbaycanlılara, türk insanına qarşı vəhşilikləri barədə geniş məlumatlar öz əksini tapır.

Böyük qayıdış planımız da var

Münaqişə həllini tapdıqdan sonra məcburi köçkün və qaçqınların öz doğma yerlərinə qayıtması üçün plan da hazırlanıb. Qaçqın və Məcburi Köçkünlərlə İş üzrə Dövlət Komitəsinin rəhbəri, baş nazirin müavini Əli Həsənov bildirib ki, proqramın ilkin variantı beynəlxalq təşkilatlarla birgə hazırlanaraq bütün nazirlik və səfirliklərə onların da fikirlərini öyrənmək üçün paylanılıb. "Müxtəlif rəyləri və fikirləri aldıqdan sonra biz onu yenidən müzakirə edəcəyik. Əgər sabah torpaqlarımız azad edilsə, bizim məcburi köçkün və qaçqınların öz yerlərinə qayıtması prosesinə dair hazır planımız olacaq".

Baş nazirin müavini proqramın detallarına da qismən aydınlıq gətirərək bildirib ki, sənəddə münaqişə zamanı Azərbaycana dəymiş ziyanın həcminin müəyyənləşdirilməsi kimi çox vacib məsələ də əksini tapıb.

Həm aparılan danışıqlar, həm də Azərbaycan prezidentinin apardığı siyasət bunu deməyə əsas verir ki, əvvəllər Azərbaycanın haqq səsini eşitmək belə istəməyən dünya dövlətləri bu həqiqətləri həzm etməyə başlayıblar. Dövlətimizin başçısının qətiyyətli çıxışları tarixi torpaqlarımızın geri qaytarılması uğrunda aparılan məqsədyönlü siyasətin, mübarizənin hansı formada həyata keçirildiyini bir daha sübut edir.

Rəşad Baxşəliyev,

Yazı Sosial Rifah Partiyasının

elan etdiyi müsabiqəyə təqdim olunur

Şərq.- 2010.- 15 iyul.- S. 8.