"Turan" qrupunun səsi Avstraliyada eşidilib

5 nəfərdən ibarət musiqiçilərimizin çıxışı əcnəbiləri heyran edib

Azərbaycanlı musiqiçilərin səsi Avstraliyada keçirilən “Womad Delaibe” festivalından eşidilib. Hazırda səfərlərini davam etdirən 5 nəfərdən ibarət “Turan" adlı milli musiqi qrupunun üzvləri və YUNESKO-nun eksperti, musiqişünas Sənubər Bağırova ötən gün Yeni Zellandiyaya səfər etdiklərini bildirdilər. Qrupun solisti, xanəndə, ötən il Səmərqənddə keçirilən "Şərq təranələri” müsahibəsinin qalibi Qoçaq Əsgərov telefon açaraq çıxışlar barədə məlumat verib. O bildirib ki, festival martın 5-dən 8-nə kimi Avstraliyanın Adəlayb şəhərində keçirilib və dünyanın müxtəlif ölkələrindən bura 500-dən çox tanınmış musiqiçilər qatılıblar. Q.Əsgərovun məlumatına görə, festival iki günlük konsert, bir seminar və qala-konsertlə başa çatıb. Musiqiçilərimiz konsertlərdə geniş proqramla çıxış ediblər. Bura "Bayatı-şiraz" muğamı, "Zabul" segahı dəsgah şəklində, "Şüştar" muğamından şöbələr, Cahangir Cahangirovun bəstələri, Arif Məlikovun "Çıx yaşıl düzə" bəstəsi "İrəvanda xal qalmadı", "Sarı gəlin" xalq mahnısı və bəstəkar Kamalın və şair Baba Vəziroğlunun birgə yaradıcılıq məhsulu olan "Nigaranam" mahnısı səsləndirilib: "Ali star" qala-konsertində məhz bizə iki dəfə çıxış etmək imkanı verildi və proqrama bizim ifamızla yekun vuruldu. Bu, möhtəşəm bir festival idi. Bunu unudulmaz edən səbəblərdən biri dünya şöhrətli hindistanlı musiqiçi Ravi Şankar və avstriyalı kamança ifaçısı Ross Deli ilə bir səhnəni bölüşməyimiz oldu. Eyni zamanda Madonnanı müşayiət edən məşhur musiqiçilər də həmin festivalda idi və bizim qrupla onların musiqiçilərinin yaxın dostluq münasibəti yarandı. Onu da xatırladım ki, Ross Delini bizim kaman ifaçımız Habil Əliyevlə dostluq munasibəti bağlayır. Habil müəllimin müsahibələrində dəfələrlə vurguladığı Avstraliyada bağışlanan həmin kamançanı ona Ross Deli təqdim edib. O, dünyada 35 diski ilə məşhur olan musiqiçilərdəndir".

Qoçaq Əsgərovun əlavəsinə görə, haqqında danışdığı avstriyalı kamança ifaçısı “Turan" qrupunun səsləndirdiyi "Şüştər" rəngini öyrənərək, repertuarına daxil edib. Bu, onun İngiltərədə buraxılan diskinə də daxil ediləcək. Eyni zamanda o, qala-konsertdə "Şüştar" rəngini səsləndərib. Festival çərçivəsində kecirilən seminarda Azərbaycandan Sənubər Bağırovanın çıxış etdiyini bildirən Q.Əsgərov tədbir iştirakçılarının Azərbaycanın tarixi, musiqisi barədə geniş informasiya əldə etdiklərini bildirdi.

"Sənubər xanım bizim "Vağzalı" havamız barədə ayrıca çıxış edərək bunun toy mərasimlərində geniş yayıldığını bildirdi. Həmin musiqini istedadlı balaban ifaçısı Şirzad Fətəliyev əyani səkildə seminar iştirakçılarına dinlətdi"- deyə xanəndə bildirdi.

Hazırda Yeni Zellandiyada səfərdə olan musiqiçilərimiz sabah Taranaki şəhərində keçiriləcək "Womad New Zealand" festivalına qatılacaqlar. Söhbəti davam etdirən YUNESKO-nun eksperti Sənubər Bağırova bildirdi ki, onlar üçün xüsusi qarşılanma mərasimi keçirilib. New-Plymouth şəhərinə yol alan azərbaycanlı qonaqlar oranın qədim yerləri və adət-ənənələri ilə də tanış olublar. Festivaldan kənara çıxan qrup nümayəndələrinin xahişi ilə Qoçaq Əsgərovun canlı çıxışı dinlənilib. Sabah isə Taranakidə festivala start veriləcək. Həmyerlilərimizin musiqili çıxışı ilə yanaşı, onların seminarda da iştirakı nəzərdə tutulub.

Xatırladaq ki, “Turan" qrupunda Qoçaq Əsgərovla yanaşı, əməkdar artist, tarzən Malik Mansurov, kamança ifaçısı Elnur Mikayılov, nağara ifaçısı Şükür Quliyev və balaban ifaçısı Şirzad Fətəliyev çıxış edirlər,

"Womad" festivalına gəlincə, xatırladaq ki, bu, 27 il əvvəl İngiltərədə yaradılıb və hər il ənənəvi olaraq müxtəlif ölkələrdə lisenziya əldə etməklə keçirilir. Adı çəkilən musiqiçilərimiz həmin festivalda ötən ildən bəri təmsil olunurlar.

Şərq.- 2010.- 12 mart.- S. 14.