Ölkəmizə gələn turistlərin sayı artıb

Azərbaycana daha çox qonşu ölkələrdən turist gəlib

2012-ci ildə Azərbaycana gələn turistlərin sayı artıb. Rəsmi statistikaya istinad etsək, Azərbaycana daha çox qonşu ölkələrdən turist gəlib. Turizm Nazirliyində əmin edirlər ki, rəqabət artdıqca, qiymətlər də enecək. Rəsmi orqanlar bu sahədə ən böyük problem kimi lisenziyası olmayan turizm obyektlərini görürlər.

Mədəniyyət və Turizm Nazirliyinin Turizm İdarəsinin rəis müavini Vüqar Şıxməmmədov bildirib ki, yay turizm mövsümünün yekunlarına nəzər salanda, bu ilin Azərbaycan üçün uğurlu olduğunu demək olar. Təkcə bu ilin ilk 6 ayı ərzində ölkəmizə 1 milyon 800 mindən çox əcnəbi vətəndaş gəlib ki, bunun da böyük bir qismini turistlər təşkil edib. Turizm obyektlərinin də sayı artıb. Hazırda ölkədə 506 mehmanxana və mehmanxana tipli obyekt var. Amma bununla yanaşı problemlər də qalmaqdadır.

“Problemlər də yox deyil, lisenziyası olmayan obyektlər var. Biz onlara qarşı mübarizə aparırıq. Mədəniyyət və Turizm Nazirliyi turistlərə bu obyektlərdə qalmamağı tövsiyə edir”, - deyə Vüqar Şıxməmmədov bildirib.

Yay turizm mövsümünün yekunlarına görə, Azərbaycana xarici turistlər qonşu Rusiya, İran, Türkiyə kimi ölkələrdən, həmçinin Avropa ölkələrindən gəlib. Daxili turizmə gəldikdə isə istirahət etmək istəyənlər əsasən şimal rayonlarına üz tutur. Amma vətəndaşları turizm obyektlərindəki qiymətlər razı salmır. Mədəniyyət və Turizm Nazirliyində isə deyirlər ki, bu sektor inkişaf etdikcə, qiymətlərin azalması baş verəcək.

Yay turizm mövsümü ərzində Azərbaycandan da xaricə kifayət qədər insan yollanıb. Təkcə ilin ilk 6 ayı ərzində 1 milyon 700 mindən çox insan xarici ölkələrə üz tutub. Azərbaycanlılar daha çox Türkiyə, Gürcüstan, Rusiya kimi qonşu ölkələrin turizm bölgələrinə getməyə üstünlük verirlər.

Şərq.- 2012.- 28 sentyabr.- S.13.