BELƏSİ OLMAMIŞDI...

Elnarə Abdullayeva sarayda 3 gün konsert verdi, doğmaları biletsiz qaldı

 Azərbaycanın Əməkdar artisti Elnarə Abdullayeva Heydər Əliyev adına Sarayın qapısını 3 gündür pərəstişkarlarının üzünə açıb. Əslində bir gün nəzərdə tutulan konsert tamaşaçıların tələbatının çoxluğu nəzərə alınaraq 3 gün təşkil edildi.

Adətən muğam sənətkarlarının konsertinə az sayda tamaşaçı axını olsa da, Elnarə Abdullayevanın 3 günlük konsertində zalda bir boş yer qalmayıb. Sənətçinin bir çox həmkarları, mətbuat nümayəndələri, efir insanları belə bilet əldə edə bilməyiblər. Hətta xanəndənin budəfəki konsertində övladları, qayınatası və yaxın qohumlarına bilet çatmadığı üçün onlar bu dəfə konserti izləyə bilməyiblər.

Sarayın direktoru Fərhad müəllim də bildirib ki, bu günə qədər muğam ifaçılarından heç biri xanəndənin konsertinə bu qədər tələbat olduğunun şahidi olmayıb.

Elnarə Abdullayevanın konsertinə İrandan, İsraildən, Türkiyədən, Rusiyanın ayrı-ayrı şəhərlərindən gələn qonaqların da sayı çox idi.

Əməkdar artist çiçək yağışına tutuldu. Eyni zamanda xanəndənin fanatları ona müxtəlif bahalı hədiyyələr gətirərək sevgilərini çatdırırdılar.

Əməkdar artistin konsertini izləyən tanınmışlar arasında Xalq artisti Ağaxan Abdullayev, Canəli Əkbərov, Şeyx Əbdül Mahmudbəyov, Zabit Nəbizadə, Flora Kərimova, Nazpəri Dostəliyeva, Könül Kərimova, digər muğam, qəzəl ustadları da iştirak edirdilər. Onlar da xanəndənin konsert repertuarından çox razılıq etdilər. Ağaxan Abdullayev çıxışında "Belə səs sahibləri Allahın bizə göndərdiyi sərvət sayılır. Elnarənin qeyri-adi fitri istedadı var. Bu gün ifa etdiyi muğamlar da çox ağır, qəliz muğamlardı. Hər xanəndə bu muğamları ifa etməyə cəsarət etmir. Bu xanıma halal olsunsöylədi.

Canəli Əkbərov isə "Şərq”ə açıqlamasında "bu gün Sarayda yaşanan izdiham bir daha sübut etdi ki, Elnarəni xalq sevir, ona milyonların sevgisi var. Bu xanım o qədər akademik tərzdə muğamları ifa etdi ki, bu ifaya söz tapmaq çətindi. Yalnız əhsən deyə bilərəm. Belə balaca bədəndə bu qədər güc, enerji var ki, ən çətin muğamlara müraciət etsə , zərrə qədər narahatlıq hiss etmədi. O qədər rahat şəkildə ifa təqdim etdi ki, sözün həqiqi mənasında bu gecədən feyziyab oldum. Xanəndə olaraq ona yalnız uğurlar arzulayıram. Halal olsun Elnarə xanıma!”

Heydər Əliyev Sarayında Elnarə 3 gündür sözün həqiqi mənasında izdihamın olduğunu göstərir. Xanəndənin pərəstişkarları, konsertə gələn tamaşaçıların yaratdığı izdiham yəqin ki, hələ uzun müddət danışılacaq.

Yeri gəlmişkən onu da qeyd edək ki, Elnarə Abdullayevanın 3 günlük konsertini tanınmış prodüser Asif Kərimov təşkil edib. Konsertin repertuarı da məhz onun seçimi ilə hazırlanıb.

Sarayın qarşısında olan izdihamı da xatırlatmaq lazımdır. Xanəndənin konsertinin biletləri kassada 20-80 manat civarında satılsa da, konsertin ikinci üçüncü günləri sarayın qarşısında Elnarənin konsert bileti əldə 100-150 manat arası satılırdı.

Xanəndə ifaları ilə yanaşı, konsert boyu tamaşaçıları ilə ünsiyyət qurmağa çalışdı: "Bizi yaşadan siz tamaşaçılarsız. Siz olmasaz, biz sənətkar kimi kiməsə lazım olarıq, konsert təşkil edə bilərik. Allah gələn ayaqlarınıza qüvvət versin. Cibinizi həmişə dolu etsin. İlin-günün bu vaxtı əgər məni deyib gəlmisizsə, cibinizin pulunu mənim konsert biletimə xərcləmisizsə, Allah sizdən razı olsun. Sizlər məni yaşadırsız. Allah hər birinizdən min dəfə razı olsun. Siz məni bir istəyirsinizsə, mən sizi yüz istəyirəm”. Əməktar artistin 3 günlük konserti tam anşlaqla keçdi.

 

Tahirə

Şərq.- 2016.- 29 mart.- S.5