“MƏNİM GÜCÜM GÖZ ÖNÜNDƏDİR”

Amaliya Pənahova: “Zəif insanlar paxıl olurlar. Ona görə də özümdən zəiflərə cavab verməyə ehtiyacım olmayıb”

“Yaradıcı ruhlu insan qapılar döyüb, pul axtarmamalıdır”

Teatrda hər zaman diktə edən aktrisalar olub. Uzun illər Akademik Milli Dram Teatrının aktrisası olan Amaliya Pənahova da repertura diktə edən ən maraqlı, güclü aktrisa sayılıb. Zamanında teatrın repertuarı onun rolları üzərində daha çox qurulmuş olub. Sonralar aktrisa Bakı Bələdiyyə Teatrını yaradaraq teatra rəhbərlik etməyə başlayıb. Aktrisanın saysız rolları tamaşaçıların yaddaşında iz qoyub. Xalq artisti Amaliya Pənahova son illər mətbuatdan uzaq olsa da, "Şərq”ə danışdı.

- Teatrın repertuarına diktə edən aktrisa olmusuz. Bu gün belə aktrisaları niyə tamaşaçı görə bilmir?

- Xoş fikirlər üçün təşəkkür. Mən hər zaman işimi peşəkar şəkildə təqdim etməyə çalışmışam. Diktə etməmişəm, sadəcə rolumu oynamışam. Amma bütün rollarımın üzərində ciddi əmək olub. Elə-belə Amaliya Pənahova formalaşmayıb. Mən illərin zəhməti ilə xalq artisti olmuşam. Düzdü, bu adı da ucuzlaşdıranlar olur. Amma səhnə mənim üçün müqəddəs bir məkandı. Rejissorlar məndən tələb etdiyini aktrisa olaraq ala biliblər deyə bir çox böyük rolların ifaçısı kimi görüblər. Əgər bu, diktə sayılırsa, buna sevinirəm.

- Azərbaycan səhnəsində nə görmək istərdiz?

- İlk əvvəl inkişaf görmək istərdim. Keyfiyyətli tamaşalar görmək istər bir tamaşaçı kimi, istərsə də bir aktrisa olaraq teatrdan gözləntim ola bilər. Mən çox istərdim ki, bizim teatr tamaşaları da, çəkilən filmlər də dünyaca məşhur səhnələrdə, ekranlarda görünə bilsin.

- Sizə yəqin ki, zamanında paxıllıq edənlər olub...

- Bilirsiz, bu sahədə paxıllıq və rəqabət hər zaman olub. Təbii ki, çoxları Amaliya olmaq arzusunda olublar. Mən həmişə öz işimlə fərqlənməyə çalışmışam. Mənə paxıllıq edənlər demək ki, səhnədə məndən zəif olublar. Mən belə düşünürəm ki, özünə əmin aktrisanın paxıllıq etməyə ehtiyacı olmur. Yaxşı mənada həmkarına qibtə hissi ola bilər. Bu, yaradıcılıqda normaldı. Amma paxıllıq acizliyin əlamətidir. Həyatda zəif insanlar paxıl olurlar. Mənə elə gəlir ki, səhnə hər kəsin statusunu, istedadını, gücünü göstərə bilir. Mənim gücüm səhnədə göz önündə olub. Ona görə də özümdən zəiflərə cavab verməyə ehtiyacım olmayıb.

- Arzuladığınız obrazlar, çəkilmək istədiyiniz ekran əsərləri yəqin ki, bu gün də var...

- Sözsüz ki, arzular yoxdusa, demək ki, həyat bitir. Arzular da var, planlarımız da. Səhnədə tamaşaçıya təqdim etmək istədiyim rollar bu gün də var.

- Bəs nə mane olur?

- Ən böyük maneə maliyyə çətinliyidir. Mənə elə gəlir ki, yaradıcı ruhlu insan qapıları döyüb maliyyə axtarmamalıdır. Bizdə yaxşı iş görmək üçün gərək qapı-qapı gəzib maliyyə tapasan ki, iş ortaya çıxsın. Bunu da hər sənətçi, yaradıcı insan özünə sığışdırmır. Bu, ayrı bir istedaddı.

- Yaş sizi qorxudurmu?

- Təbii ki, gəncliyin verdiyi imkanlar daha fərqlidir. Hər yaşın öz gözəlliyi olsa da, gənc ikən yaradıcı insan daha böyük layihələrə, yaradıcılıq uğurlarına imza ata bilir. Qaldı yaş məsələsinə, şükür, mən yaşlanmışam ki? (Gülür) Mənə elə gəlir ki, sənətçinin ruhu qocalmayıbsa, onu yaşlı təqdim etmək günahdı. Elə gənclər var ki, ruhən bizdən daha qocalmış görünürlər. Mənə elə gəlir ki, ruh qocalmayıbsa, sənin iddiaların, istəklərin, arzuların da çoxalmış olur. Mənim ruhum çox cavandı. İnsan 90 yaşında özünü 20 yaşlı gənc olaraq hiss edə bilər.

- Keyfiyyət üçün istedad, ya maliyyə önəmlidir?

- Bilirsiz, burda əslində hər ikisi vacib amildi. Amma bir incə nüansı unutmaq lazım deyil. Təbii ki, sənət, istedad olmasa, maliyyə köməyə gələ bilməz. Amma istedad, yaradıcılıq varsa, maliyyə bunu bir az da mükəmməl şəkildə təqdim etməyə imkan yaradar.

Tahirə .
Şərq.- 2017.- 18 oktyabr.- S.13.