Cümhuriyyətin 100 illiyini möhtəşəm keçirməliyik

Qızıl pul nişanları da buraxmaq olar, amma mütləq hərbi parad olmalıdır

Azərbaycan Xalq Cümhuriyyətinin 100 illik yubileyi ilə bağlı Mərkəzi Bank qızıl pul nişanları buraxacaq. Mərkəzi Bankın İdarə Heyətinin sədri Elman Rüstəmovun açıqlamasına görə, qızıl sikkələr yubiley tədbirlərinə qədər ölkəyə gətirələcək. Mütəxəssislər xatirə pul nişanlarının ortalama qiymətinin 1600 ABŞ dolları civarında olacağını bildirir.Bunun isə əhali üçün əlçatan olmadığı vurğulanır və qeyd edilir ki, qızıl sikkələrlə yanaşı, nisbətən ucuz başa gələcək gümüş pullar da buraxıla bilərdi. Yubiley kağız əskinaslardan isə ümumiyyətlə, söhbət getmir. Halbuki, kağız əskinaslar bütövlükdə əhali üçün daha artıq əlçatan olardı və xatirə kimi saxlamaq da mümkün idi. Kağız əskinaslar çap etdirmək çətindirmi, yoxsa bu, əvvəlcədən planlaşırılmalıydı? "Cümhuriyyətimizin 100 illiyi münasibətilə hansı yaddaqalan tədbirlər keçirilə bilər” sualı ilə ziyalılara müraciət etdik.Yubiley poçt markaları daha sərfəlidir

"Xalq Cəbhəsi” qəzetinin baş redaktoru Elçin Mirzəbəyli "Şərq”ə bildirdi ki, 100 illik yubiley tədbirləri bir çox sahələri əhatə edə bilər:

- Yubiley pul nişanlarının - qızıl sikkələrin bu qədər baha olması, yaxşı hal deyil. Fikrimcə, qızıl pullar özünün nominal dəyərində satılsa, daha yaxşı olardı. Qızıl pulların hazırlanması neçəyə başa gəlibsə, o qiymətə də satılmalıdır. Qiymətdən asılı olmayaraq bu pul nişanlarının mənəvi dəyəri çox böyükdür. Hansı pul vahidi buraxılsa da, lap qızıl olsun, brilyant olsun, yenə də Cümhuriyyətin dəyərini ehtiva edə bilməz. Cümhuriyyətin Azərbaycan xalqına qazandırdığı dəyərlər hansısa pul vahidi ilə ölçülə bilməz. Amma mən düşünürəm ki, məsələn, poçt markaları dünyanı daha çox gəzir. Kağız əskinaslar da köhnəlir, kimsə qoruyub saxlayır, kimsə saxlamır, qızıl pullarsa, ümumiyyətlə, çox az qisim şəxsdə olacaq, amma poçt markalarını hamı əldə edə bilər, üstəlik, poçt markaları dünyanı gəzmək üstünlüyünə malikdir.

Hərbi parad mütləq olmalıdır

E.Mirzəbəyli AXC-nin 100 illik yubiley tədbirlərinin hər kəs üçün yaddaqalan olmasını arzuladı:

- Bunun üçün də çox çalışmalıyıq. Cümhuriyyətin 100 illiyi həm də ordumuzun 100 illiyidir, həm də daxili işlər orqanlarının 100 illiyidir. Yəni, bütövlükdə Azərbaycan Xalq Cümhuriyyəti, demək olar, bütün dövlət strukturlarının formalaşması, milliləşməsi tarixidir. Bura təhsil də aiddir, səhiyyə də, idman da - həyatın bütün sahələri. Məsələn, mən belə hesab edirəm ki, Azərbaycan xanımları 8 Mart Qadınlar bayramını deyil, AXC-nin müsəlman Şərqində ilk dəfə qadınlara səsvermə hüququnun tanınmasını bayram kimi qeyd etməlidirlər. Çünki bununla qadınların şəxsiyyəti, onların dövlət quruculuğunda müstəsna yerinin olması təsdiqini tapıb. Cümhuriyyətin 100 illiyini qadınlar xüsusilə bayram etməlidir. Təhsil müəssisələri məktəblilərin Azərbaycan bayrağı ilə yürüşünü təşkil etməlidir. Belə tədbirlər daim yaddaqalan olur və xoş xatirəyə çevrilir. Eyni zamanda uşaqlara vətənpərvərlik, milli-mənəvi dəyərlər, azərbaycançılıq, dövlətçilik hisslərinin aşılanmasında böyük əhəmiyyət daşıyır. Hesab edirəm ki, AXC-nin 100 illiyi ilə bağlı mütləq hərbi parad olmalıdır. Biz dünyaya Azərbaycanın necə güclü, tarixi köklərə, dövlətçilik ənənələrinə malik ölkə olduğunu nümayiş etdirməliyik. Xalqımız, əhali də bu tədbirlərdə fəal iştirak etməli, hər kəs özünü cümhuriyyətin bir parçası kimi görməlidir.

Dəmir pullar da buraxmaq olardı...

İqtisadçı Fuad İbrahimov hesab edir ki, yubiley pul nişanları daha çox suvenir, hədiyyə, ölkənin tanıdılması məqsədi daşıyır:

- Yubiley pul nişanlarının qızıl olması, əlbəttə, cümhuriyyətin dəyərini əks etdirir. Görünən budur ki, qızıl pullar dövriyyədə olmayacaq, daha çox suvenir kimi saxlanacaq. Bu pulların buraxılması hədiyyə etmək, ölkəni tanıtmaq məqsədi daşıyır. Yəqin, qızıl pullar müəyyən sayda olacaq və mötəbər qonaqlara, xüsusi şəxslərə hədiyyə ediləcək. Yubiley münasibətilə qızıl pul nişanları buraxmaqla, Cümhuriyyətin varlığı, daşıdığı mahiyyət qiymətləndirilir. Qızıl olması da bu mahiyyətin dəyərini göstərir. Tanıtım üçün bu, çox yaxşıdır. Qaldı ki, kağız əskinaslar və ya dəmir pulların buraxılmasına, yaxın keçmişə nəzər salsaq, sovet illərində belə təcrübə vardı. Məsələn, Böyük Vətən Müharibəsində qələbənin 50 illiyi münasibətilə dəmir 1 manatlıqlar - 1 rubl buraxılmışdı. Sonra, 1980-ci il Moskva Olimpiadası ilə bağlı da dəmir pullar buraxılmışdı. Moskva şəhərinin yubileyi ilə bağlı da 1,3, 5 rubl dəyərində dəmir pullar buraxılıb. Belə təcrübələr var və ölkələr tarixlərini tanıtmaq, əlamətdar günlərin, tarixlərin yadda qalması üçün bu vasitələrdən istifadə edirlər.F.İbrahimov qeyd etdi ki, onda olan məlumata görə, Cümhuriyyətin 100 illiyi münasibətilə cümhuriyyət atributlarının əks olunduğu suvenirlər istehsal ediləcək və onlar hər kəs üçün əlçatan olacaq:

- Biz ölkə olaraq Cümhuriyyətin 100 illik yubileyindən maksimum yararlanmalı və möhtəşəm tarixi yaddaqalan etmək üçün səy göstərməliyik. Bədnam qonşularımız belə hallardan çox məharətlə yararlanır. Olmayan, uydurma tarixlərini suvenirlərə, heykəllərə "çevirib” dünyada yayırlar. Cümhuriyyət hamımızın ümumi dəyəridir. Tariximizdəki bu əvəzsiz dövrü dünyada tanıtmaq üçün bacardığımızdan, imkanımızdan da artığını etməliyik.

Məlahət Rzayeva

Şərq.- 2018.- 13 aprel.- S.6