“Dünyanın məşhur musiqiçilərilə söhbətlərimiz olub...”

Arif Babayev: "Hələ bu günə qədər heç bir dünya şöhrətli sənətçidən, incəsənət xadimindən eşitməmişəm desin ki, dövlət mənim sənətimə dəyərini ev hədiyyə edərək qiymətləndirib"

Azərbaycanda incəsənət sahəsində olan sənətkarlara, mədəniyyət xadimlərinə diqqət, qayğı və hörmətlə yanaşılıb. Azərbaycan dövləti sənətkarlarına qarşı istər mənəvi, istərsə də maddi dəstəyini əsirgəməyib. İncəsənət xadimlərinin yaradıcılıqlarını ruhlandırmaq, onların sosial qayğılarını rahatlaşdırmaq üçün sənət adamlarının ev problemləri həllini tapıb, onlara prezident təqaüdü ayrılır, fəxri ad və mükafatların verilməsi onlara stimul verir. Dövlət qayğısı ilə əhatə olunan sənət adamları ayrı-ayrı vaxtlarda dövlət başçımıza bu diqqətə görə təşəkkürlərini bildirməyə çalışır. Xalq artisti Arif Babayev də Azərbaycan dövlətinin incəsənət sahəsinə olan qayğısından ürəkdolusu söhbət açdı: «İncəsənət sahəsi bir dövlətin tanınmasında mühüm rol oynayır. Mən ömrümün yarısından çoxunu yaşamış insanam. Yaşımın elə dönəmidir ki, kimsədən çəkindiyim yoxdu.

Şükür Allaha ki, xalqımın sevgisini hər zaman hiss etmişəm. Elə bu sevgi də mənim dövlətimə, xalqıma vicdanla xidmət etmək üçün zəmin yaradıb. Sənətə gəldiyim gündən onlarla ölkədə qastrol səfərlərində olmuşam, dünyanı gəzmişəm. Bu gün əminliklə deyirəm ki, Azərbaycan dövlətinin sənət adamlarına olan qayğısını başqa heç bir millətdə görə bilməzsiniz. Dünyanın məşhur musiqiçiləri, sənət adamları ilə də söhbətlərimiz olub.

Hələ bu günə qədər heç bir dünya şöhrətli sənətçidən, incəsənət xadimindən eşitməmişəm desin ki, dövlət mənim sənətimə dəyərini ev hədiyyə edərək qiymətləndirib. Bu ənənənin də yaradıcısı Heydər Əliyev olub. Allah ona rəhmət eləsin. Heydər Əliyevin sənət adamlarına qayğısının şahidi olan insanam. Hər bir sənətkarla ayrı-ayrılıqda maraqlanan böyük şəxsiyyət olub. Bunun üçün o qədər mənəvi baxımdan zəngin mədəniyyət sahibi olmalısan ki, sənət aləminə belə isti sevgi ilə bağlanasan. Onunla şəxsən bir neçə dəfə görüşmüşəm.

Onun incəsənətə, mədəniyyətə, mədəniyyət sahəsində olan insanlara nə qədər həssaslıqla yanaşdığının şahidi olmuşam. Sovet vaxtında belə o, incəsənət sahəsində olan insanlara, xüsusilə də muğam sahəsinə diqqət göstərirdi.

O yüksək dahi mədəniyyət sahibi olan cənab İlham Əliyevin də münasibətində özünü göstərə bildi. İlham Əliyev də ulu öndərin qoyduğu ənənəni davam etdirməklə incəsənət sahəsinin inkişafı üçün lazım ola biləcək böyük addımlar atdı. Bu gün Azərbaycanda fəaliyyət göstərən bütün sənət adamları dövlətin qayğısından bəhrələnir.

Əsl sənətkarlara, mədəniyyət sahəsində çalışan şəxsiyyətlərə dövlətin qayğısı danılmazdır. Mən bu dövlətdən necə narazı ola bilərəm? Mənə qayğısını hiss etmişəm, istər şəxsiyyətimə, istər sənətimə olan dəyəri görmüşəm. Prezident tərəfindən dövlətin ən yüksək fəxri adlarına layiq görülmüşəm, evlə təmin olunmuşam, sosial həyatımın rahatlaşması üçün mənə hər bir şərait yaradılıb. Söhbət təkcə mənim sənətimə olan qayğıdan da getmir.

Azərbaycanın böyük sənətkar ordusu, incəsənət xadimlərindən ibarət sərkərdələri var ki, onlar bu gün məhz dövlət başçısı İlham Əliyevin, dövlətin qayğısı ilə əhatə olunublar. Mehriban Xanım Əliyeva hər il muğam sahəsində olan xanəndələrlə görüşür, bizim dolanışığımızla, çətinliklərimizlə maraqlanır.

Bu gün Azərbaycan muğamının bu qədər inkişaf etməsi, dünyanın ən mötəbər konsert salonlarında muğamlarımızın səslənməsi, xanəndələrimizin yaradıcılığında olan yeniliklər məhz bu qayğının nəticəsidir. Bu qayğıya, bu diqqətə görə mən şəxsən cənab prezidentimizə, Heydər Əliyev Fondunun rəhbəri, 1-ci vitse prezident Mehriban xanım Əliyevaya ailəmiz adından təşəkkür edirəm».

Tahirə Məmmədqızı

Şərq.- 2018.- 21 dekabr.- S. 12.