$a O məzar mütəxəssislərin iştirakı ilə açılmalı idi

"Qaradağda tapılan sümük qalıqları Mikayıl Müşfiqə aid deyilsə, o zaman onun kimə aid olduğu müəyyən edilməlidir"

"İP yığmaq, gündəmə gəlmək naminə onun adından istifadə etmək nankorluqdur"

Mədəniyyət və turizm naziri Əbülfəz Qarayev Azərbaycan şairi Mikayıl Müşfiqin məzarının tapılması ilə bağlı mətbuatda yayılan xəbərlərə münasibət bildirib. Mikayıl Müşfiq adının bizim üçün müqəddəs olduğunu vurğulayan nazir deyib ki, o müqəddəs insanın, şəxsiyyətin qalıqları haqqında danışmağa ehtiyac yoxdur.

Nazirin sözlərinə görə, bu məsələ ilə bağlı komissiya müəyyən ediləcək, sənədlər toplanılacaq. "Mikayıl Müşfiqin məzarı ilə bağlı iddialar dəfələrlə qaldırılıb və bu barədə müxtəlif mülahizələr var. Xahiş edirəm, bunu sensasiya etməyin. Lazım gəldikdə sizə məlumat verəcəyik".Qeyd edək ki, rusiyalı milyarder Fərhad Əhmədov Mikayıl Müşfiqin qalıqlarının Qaradağ rayonu, Puta qəsəbəsində tapdığını iddia edib.

Yazar Zahir Əzəmətin fikrincə, Mədəniyyət Nazirliyi bu mövzuda hər bir fakta daha ciddi yanaşmalıdır: "Tapılan qalıqların ekspertizasını təşkil etməli, daha konkret cavab verməlidir. Mikayıl Müşfiqin sevgisi hər nə qədər ürəyimizdə olsa da, onun nəşini də ortaya çıxarıb torpağa tapşırmalıyıq. Bu həm də dövlətin və mədəniyyət nazirinin mənəvi borcudur”.

Mikayıl Müşfiqin məzarı ətrafında gedən müzakirələrdən xəbərdar olduğunu vurğulayan yazar Mirmehdi Ağaoğlu məsələni böyük həyəcan və həssaslıqla izlədiyini deyib: "Azərbaycan xalqı üçün 3 həssas və ağrılı mövzu var: 20 Yanvar faciəsi, Xocalı soyqırımı və Mikayıl Müşfiqin nakam həyatı. Müşfiqin faciəvi həyatı, gənc yaşlarında məruz qaldığı təqib və repressiya istər-istəməz ona qarşı əlahiddə bir sevgi, bir rəğbət hissi oyadıb. Həm də bu səbəbdən Mikayıl Müşfiqin adı keçən hər cümlə bizim üçün həssas və əhəmiyyətlidir. KİV nümayəndələrindən, yazar dostlarımızdan da xahiş edirəm ki, onun məzarının tapılması ətrafında gedən müzakirələrdə daha diqqətli olaq. İP yığmaq, gündəmə gəlmək naminə onun adından istifadə etmək nankorluqdur”. Aşkar olunan yeni faktların əhəmiyyətini qeyd edən yazar hesab edir ki, məsələyə kompleks yanaşmaq lazımdır. Mikayıl Müşfiqlə yanaşı digər repressiya qurbanlarının məzarının aşkarlanması, arxivlərin araşdırılması üçün komissiya yaradılmalıdır. "Qaradağda tapılan sümük qalıqları Mikayıl Müşfiqə aid deyilsə, o zaman onun kimə aid olduğu müəyyən edilməlidir. Hər hansı bir açıqlamadan sonra həmin ərazidə kor-koranə qazıntı aparılmalı deyildi. O məzar mütəxəssislərin iştirakı ilə açılmalı idi”.Nazirin açıqlamasına gəldikdə isə M.Ağaoğlu bu yanaşmanın həddindən artıq soyuq və laqeyd olduğunu deyib: "Nazirlik özü bu məsələnin həllində maraqlı olmalıdır. Söhbət sadə bir vətəndaşın məzarından yox, Mikayıl Müşfiqin taleyindən gedir. Aidiyyəti şəxslər bu işi öz üzərinə götürməlidir ki, kimlərsə özünün çirkin əməlləri üçün Müşfiqin adından istifadə edə bilməsin. Lazımi araşdırmaları tezləşdirib, həmin qalıqların Müşfiqə aid olub-olmadığını ictimaiyyətə açıqlamaq lazımdır”.

Şair Aqşin Yenisey isə hesab edir ki, əgər ortada belə bir kəllə sümüyü və iddiaçı tərəf varsa, nazirliyin faktı quru sözlərlə rədd etməsi doğru deyil: "Müasir tibb DNT analizləri nəticəsində İsraildə tapılmış və yaşı, təxminən, 2000 il əvvələ gedib çıxan kəfən parçasında İsa peyğəmbərin izlərini axtarmağa cəsarət edir. Bu gün ən gizli cinayətləri kriminalistlər DNT testləri ilə açırlar. Ən azı, bu testləri tapılan kəllə sümüyü üzərində də aparmaq olar. Müşfiqin olmasa belə, bəlkə də, üstü açılmamış hansısa bir cinayətin izi aşkara çıxar. Hər halda, kəlləsində iki güllə yerinin olması o adamın gora salamat baş aparmadığından xəbər verir. İkincisi, fikir vermisinizsə, bizdə repressiya qurbanları daha çox ədəbiyyat mövzusu kimi təqdim olunur, onlar daha çox bekar adamların şeir gecələrində yad edilir”.

Bu mövzuda arxiv materialları, araşdırma faktları ilə danışan adamların görməzdən, eşitməzdən gəldiyini vurğulayan şair deyib ki, bu faktlar, arxiv yazıları açıq müzakirəyə çıxarılsa, bir çoxlarının ictimai nüfuzu o tapılan skeletin gününə düşəcək:

"Təkcə Mikayıl Müşfiq deyil ki, güllələnən, o qədər dəyərli insanlardan danoslar yazılıb ki. Bu, bir az da mənəvi məsələdir. Danosbazlıq ifşa edilmədikcə, insanlarımız ona qazanc yeri kimi baxır. Bu da insan alverinin bir növüdür. Xoşuna gəlməyən, paxıllıq etdiyin insanları satıb, arvad-uşaq saxlayırsan. Təəssüf ki, bu sovet ənənəsi bizdə bu gün də davam edir. Belə bir şəraitdə kiminsə Mikayıl Müşfiqin taleyi ilə maraqlanacağı inandırıcı görünmür. Qaldı ki, onun qəlblərdəki yerinə, xalq onu repressiyalardan sağ çıxmış bütün sovet şair və yazıçılarından çox sevir. Bu günlərdə bir sorğuda iştirak edən, demək olar ki, bütün gənc ədəbiyyatçılar onun adını yazmışdılar ən yaxşıların sırasına”.

Şəymən

Şərq.- 27 oktyabr.- S. 13