Böyük quruculuq işləri başlayıb

Heç bir bölgə diqqətdən kənarda qalmır

Harda zərurət varsa, harda əhali, vətəndaş maraqlarının təmini tələb olunursa, dövlət resursları ona yönləndirilir

Azərbaycanda ictimai maraqların təmini dövlət siyasətinin əsasını təşkil edir. Azərbaycan Respublikasının Prezidenti İlham Əliyevin bu günlərdə Qəbələ rayonuna səfəri, bölgədə həyata keçirilən vacib işlər və nəhəng layihələrin təqdimatı dövlət tərəfindən yürüdülən siyasətin vətəndaşların rifah halının yüksəlməsinə, həyat şəraitlərinin yaxşılaşmasına yönəldiyinin əyani sübutudur.

Cənab Prezident İlham Əliyev və birinci xanım Mehriban Əliyeva və qızları Leyla Əliyeva Qəbələ rayonunda bir neçə mühüm obyektin açılışında iştirak etdilər. Səfər zamanı Prezident eyni zamanda bölgə xalqının arzu və istəklərinə uyğun, həmçinin onlar üçün böyük əhəmiyyət kəsb edən bir sıra layihələrin həyata keçirilməsinə dair də göstərişlər verdi. Prezidentin Qəbələ səfərinə diqqətlə nəzər salmaq yetərlidir ki, həyata keçirilmiş və reallaşdırılması gözlənilən layihələrin vətəndaşların həyat şəraitinə necə müsbət təsir göstərəcəyi aydınlaşsın. Bu layihələrin hər biri – dəmir yolunun açılışı, çay üzərində körpünün tikintisi, yerli xalqlara məxsus dini ibadət ocaqlarının təmiri, məktəb binasının, məktəbin həyətində idman kompleksinin inşası ayrı-ayrılıqda vətəndaş maraqlarına, ictimaiyyətin istəkləri nəzərə alınaraq həyata keçirilən işlərdir.

Yerli sakinlər rahat və təhlükəsiz şəkildə hərəkət edəcək

Qəbələyə səfəri zamanı Prezident İlham Əliyev və birinci xanım Mehriban Əliyeva Qəbələ Dəmir Yolu Vağzalının və Ləki stansiyası-Qəbələ birxətli dəmir yolunun açılışında iştirak etdilər. Məlum məsələdir ki, dəmir yollarının müasirləşdirilməsi ölkəmizin iqtisadi potensialını nümayiş etdirməklə yanaşı, həm də sosial sahənin inkişafına yüksək diqqəti göstərir. Dövlətimizin başçısına və birinci xanıma məlumat verildi ki, hazır vəziyyətə gətirilən Ləki stansiyası–Qəbələ birxətli dəmir yolunun tikinti işlərinə 2018-ci ildə başlanılıb. Dəmir yolu xətti ox üzrə 42,3 kilometr, yan yollarla birlikdə isə 44,5 kilometrdir. Ümumilikdə, layihə üzrə 122 süni mühəndis qurğusunun, Ağdaş dəmir yolu dayanacağının, Qəbələ Dəmir Yolu Vağzalının və stansiyasının, Qəbələ dartı yarımstansiyasının tikintisi, həmçinin “Hacıalı” yarımstansiyasının təmiri işləri yerinə yetirilib. Bu müasir yol-nəqliyyat infrastrukturu, ilk növbədə, vətəndaşların rahatlığına xidmət edəcək. Bu layihənin reallaşması Qəbələdən paytaxta və digər yerlərə gedən sakinlərin rahat və təhlükəsiz şəkildə mənzil başına çatmasına hərtərəfli imkan yaradır.

Bum çayı üzərində körpünün tikintisi

Qəbələ rayonunda 20 min nəfər əhalinin yaşadığı 11 yaşayış məntəqəsini rayon mərkəzindən və digər yaşayış məntəqələrindən ayıran, Bum-Tikanlı-Abrıx avtomobil yolunun 2-ci kilometrliyində Bum çayı üzərində yeni körpü və Bum qəsəbəsinə gedən 2 kilometrlik avtomobil yolu bərpadan sonra istifadəyə verilib.

Bum çayı üzərində yeni körpü Prezident İlham Əliyevin “Qəbələ rayonunun yol-nəqliyyat infrastrukturunun yaxşılaşdırılmasına dair əlavə tədbirlər haqqında” Sərəncamına uyğun olaraq inşa edilib. Körpünün uzunluğu 310, eni 9 metrdir. Qəbələ Rayon İcra Hakimiyyətinin başçısı Səbuhi Abdullayev Prezident İlham Əliyevə məlumat verib ki, körpü olmadığı üçün 20 min əhalinin mərkəzlə əlaqəsi, ümumiyyətlə, kəsilibmiş. İnsanlar rayon mərkəzinə gəlməkdən ötrü 30-35 kilometr məsafə qət etməli olurdular. İndi isə artıq rahat körpü inşa edilib. Bu layihənin icrası əhalinin məşğulluğunun təmin edilməsində və rayon mərkəzi ilə əlaqəsində mühüm rol oynayır. İcra başçısı xatırladıb ki, 2011-ci ildə Olimpiya Kompleksinin açılışı zamanı Prezident İlham Əliyev şəhərsalma ilə bağlı önəmli tapşırıqlar verib. Ondan sonra körpünün digər tərəfində Peşə Təhsili Mərkəzi, 1 saylı uşaq bağçası, yanğınsöndürmə məntəqəsi inşa edilib. İndi isə prezidentin sərəncamı ilə 5 hektar ərazidə 160 çarpayılıq xəstəxana tikilir. Şəhərin genişlənməsi insanların işlə təmin olunmasına şərait yaradır. Yerli sakinlər indi 6-8 dəqiqəyə rayon mərkəzinə çatır.

Tolerantlığın əyani sübutu

Azərbaycanın tolerant ölkə olması, ölkəmizin ərazisində yaşayan, Azərbaycan vətəndaşı olan hər bir fərdin, kimliyindən, hansı irqə, hansı dinə mənsubluğundan asılı olmayaraq dövlət qayğısı ilə əhatə edildiyi məlum həqiqətdir. Bu reallıq artıq bütün dünya tərəfindən təsdiqlənir və qəbul edilir. Azərbaycanın bütün dini konvessiyalara, azsaylı etnik qruplara, xalqlara nəinki dözümlü, mehriban, bir ailənin üzvü kimi yanaşdığı və onlarla eyni taleyi paylaşdığı bir sıra ölkələr və dövlətlər, hətta özünü super-demokratik hesab edən dövlətlər üçün də qibtə olunacaq səviyyədədir. Azərbaycana mənsub bu reallıq hər zaman göz önündə olub. 44 günlük Vətən müharibəsində mənfur düşmən üzərində əzəmətli qələbə çalan Azərbaycan işğaldan azad edilmiş ərazilərdə eyni reallığı sərgiləməkdədir. İşğaldan azad edilmiş ərazilərdə məscidlərlə yanaşı kilsələrin qeyri-islam dini ibadət ocaqlarının təmiri, bərpası buna sübutdur. Eyni mənzərə Qəbələ rayonunda da yaşanır. Qəbələ rayonuna səfərləri zamanı Prezident İlham Əliyev və Heydər Əliyev Fondunun prezidenti, birinci xanım Mehriban Əliyeva Qəbələnin Nic qəsəbəsindəki Müqəddəs Yelisey adına Cotari kilsəsini ziyarət etdilər, vəziyyətlə yerində tanış oldular. Nic qəsəbəsindəki bu kilsə də Heydər Əliyev Fondu tərəfindən 2006-cı ildə əsaslı bərpa olunaraq Alban-Udi Xristian dini icmasının istifadəsinə verilib. Tolerantlığın kiçik modeli olan Nic qəsəbəsində hazırda 3 kilsə, 2 məscid var. Dünyadakı 10 minə yaxın udinin 4 minə yaxını Qəbələnin Nic qəsəbəsində yaşayır. Kilsənin ziyarəti zamanı Prezident İlham Əliyev din xadimləri ilə səmimi söhbət etdi və onlara müraciətlə “həmişə sizinlə birlikdə olacağam”, dedi. İşğaldan azad edilmiş ərazilərə səfər edib oradakı vəziyyətlə tanış olmuş din xadimləri isə “tez-tez gedəcəyik Qarabağ bölgəsinə. Biz də Allahın köməyi ilə bu mühiti saxlayacağıq” söyləməsi Azərbaycanda dövlət-xalq, dövlət-vətəndaş birliyinin möhkəmliyini göstərirdi. Prezident və birinci xanım həmçinin Müqəddəs Məryəm Ana Alban kilsəsində olublar. Müqəddəs Məryəm Ana kilsəsi 2019-cu ildə Heydər Əliyev Fondu tərəfindən bərpa olunmağa başlanmış və 2020-ci ilin noyabr ayında 44 günlük müharibə zamanı bərpa işləri başa çatdırılıb və kilsənin təmirdən sonra açılışı olub. Kilsənin təmirinə vacib edən səbəblərdən biri gümbəzin dağılması idi. Yenidənqurma zamanı isə tikilinin 50 faizə yaxın kərpicləri, daşları bərpa edilib. Həmçinin həyətyanı sahə abadlaşdırılıb, sahəsi hasarlanıb, bulaq və üç gölməçə yaradılıb. Kilsənin tavanı, döşəməsi dəyişdirilib. Din xadimi qeyd etdi ki, kilsənin təmiri Leyla Əliyevanın təşəbbüsü ilə gerçəkləşib. Pandemiyaya, 44 günlük müharibəyə baxmayaraq, burada bərpa işləri bir gün də dayanmayıb. Təmir işlərində doqquz xalqın nümayəndələri çalışıb. Bu da Azərbaycanda yaşayan xalqların mehribanlığına daha bir sübutdur. Prezident isə qeyd edib ki, udi xalqının çox böyük tarixi mirası var: “İndi həm Qəbələ rayonu ərazisində və eyni zamanda, azad edilmiş torpaqlarda siz gedib ibadət edirsiniz - həm Xudavəngdə, həm Ağoğlanda. Orada udi xalqına məxsus olan digər məbədlər də var. Onların böyük hissəsi dağılmış, ya da ki, yarıdağılmış vəziyyətdədir. Ona görə, onları da bərpa edəcəyik. Siz o kilsələrə də gedəcəksiniz. Siz Xudavəngdə bir neçə dəfə olmusunuz”. Prezidentin sözlərini din xadimi də təsdiqləyib. Laçında, Ağoğlan kilsəsində olduqlarını deyib. Ümumilikdə ora 7 dəfə səfər etdiklərini deyib. Prezident İlham Əliyev qeyd edib ki, qəsəbədə təmirə ehtiyacı olan 1 saylı və 4 saylı məktəblərin hər ikisi də təmir edilib, istifadəyə veriləcək.

Prezident özü şəxsən işlərə nəzarət edir

Bələdiyyələrin Fəaliyyətinin Təbliği Birliyinin sədri Vüqar Tofiqli “Şərq”ə açıqlamasında qeyd etdi ki, Prezidentin Qəbələ rayonuna səfəri zamanı yaşanan hadisələr heç bir bölgənin diqqətdən kənarda qalmadığını göstərir:

- Kimsə düşünə bilərdi ki, Qarabağ işğaldan azad olundu, indi bütün resurslar ora yönləndiriləcək. Digər ərazilər kölgədə qalacaq. Amma xeyr, belə olmadı. Hamımız görürük ki, Prezident İlham Əliyev məqsədyönlü dövlət siyasətini necə davam etdirir. İşğaldan azad edilmiş ərazilərimizdə nəhəng quruculuq, abadlıq işləri aparılır. Bir gün də olsun işlər dayanmır. Cənab Prezident özü şəxsən işlərə nəzarət edir. Bu, əlbəttə hamımızı sevindirir, çünki görülən hər bir iş, hər bir layihə günbəgün, saatbasaat bizi doğma yurd yerlərinə yaxınlaşdırır. Amma baxın, Qarabağda aparılan nəhəng işlərlə yanaşı digər bölgələrdə də işlər dayanmır. Harda zərurət varsa, harda əhali, vətəndaş maraqlarının təmini tələb olunursa, dövlət resursları ona yönləndirilir. Qəbələdə son zamanlar görülən işlər də bu qəbildəndir. Yol infrastrukturu yenilənib, körpü salınıb, xəstəxana tikilir. Yerli xalqın ehtiyaclarının təmini üçün nə lazımdırsa, dövlət tərəfindən edilir. Yolun tikintisi, körpü salınması yerli əhalinin mərkəzlə əlaqəsini artıq təmin edir. Bu o deməkdir ki, əhali işə gedib-gələ biləcək, işlə təmin olunacaq. Deməli, əhalinin maddi vəziyyəti yaxşılaşacaq, həyat şəraiti də yaxşılaşacaq. Təkcə yol, körpü salınmır. İbadət yerləri də təmir edilir. Bu işlər yerli xalqların mənəvi həyatlarında böyük əhəmiyyətə malikdir. Qəbələnin Nic qəsəbəsində qədim alban-udi monastrı təmir olunur. Prezident Qəbələdə olarkən dedi ki, bu, böyük bir tarixi irsdir, bizim mirasımızdır. Şuşada “Xarıbülbül” festivalında udi xalqının nümayəndələri də çıxış etdilər. Eləcə də Azərbaycanda yaşayan bütün xalqların nümayəndələri. Bu, bir daha onu göstərir ki, Azərbaycanda bütün xalqlar bir ailə kimi yaşayır. Cənab Prezident, Ağdam məscidinin önündəki çıxışı zamanı demişdi ki, işğaldan azad olunmuş torpaqlarda bütün kilsələr, məscidlər, monastrlar bərpa ediləcək, udi xalqının nümayəndələri buraya gələcəklər. Gördük ki, udilər Xocavəndə, Tuğa səfər etdilər. Bütün bunlar tarixi ədalətin bərpasıdır.

Məlahət Rzayeva

Şərq 2021.- 17 may.- S.7.