Qarabağ komitəsi ideyası dəstəklənir

Nəsib Nəsibli: "Belə bir komitənin yaranması məsələsi gündəmdə olacaq"

Fəzail Ağamalı: "Mənim bu ideyaya mənfi yanaşmağım mümkün deyil

Fazil Mustafa: "Bu, çox müsbət bir addım olar"

Aynur Camalqızı: "Qarabağla bağlı parlamentin apardığı işi biz bacardığımız qədər genişləndirməliyik"

"Parlamentdə Qarabağ komitəsi yaradılsın". Belə bir təkliflə Milli Məclisin iki gün öncə keçirilən iclasında Bütöv Azərbaycan Xalq Cəbhəsi Partiyasının sədri, millət vəkili Qüdrət Həsənquliyev çıxış edib.

O bildirib ki, torpaqlarının 20 faizi işğal altında olan bir ölkənin parlamentində bu məsələni ayrıca diqqət mərkəzində saxlamaq üçün Qarabağ komitəsi olmalıdır. Lakin Q.Həsənquliyevin bu təklifi deputatlar tərəfindən birmənalı qarşılanmayıb.

Millət vəkili Nəsib Nəsibli "Şərq"in əməkdaşı ilə söhbətində bildirib ki, o həmkarının irəli sürdüyü təklifi dəstəkləyir. Onun sözlərinə görə, nə qədər ki, Qarabağ kimi həyati bir problemimiz qalır, belə bir komitənin yaranması məsələsi gündəmdə olacaq: "Son illərdə səsləndirdiyimiz tələblərimizdən biri də Qarabağ komitəsinin yaradılması ilə bağlıdır. Amma bu günə qədər təkliflərimizə müsbət cavab verilməyib. Parlamentin belə bir komitənin yaratmaqdan nə üçün imtina etməsinə məntiqli bir cavab tapmaq çox çətindir. Parlament rəhbəriliyi belə bir zərurətin hansı səbəbdən olmadığını əsaslandırmalıdır".

Millət vəkili Fəzail Ağamalı isə bildirib ki, bu məsələ zaman-zaman parlamentdə qaldırılsa da, öz aktuallığını reallaşdıra bilməyib. "Hər bir halda mənim bu ideyaya mənfi yanaşmağım mümkün deyil" - deyən deputat hesab edir ki, Qarabağla təkcə bir komitə deyil, bütün millət vəkilləri və onların təmsil olunduqları bütün komitələr məşğul olmalıdır: "Mən hesab edirəm ki, gələcəkdə belə bir komitənin yaradılması reallaşarsa, öz həllini tapa bilər. Ancaq düşünmürəm ki, ölkə prezidentinin bu gün apardığı danışıqlar çərçivəsindən o tərəfə yaradılacaq hər hansı bir komitə bu problemin həllinə ciddi təsir göstərə bilsin. Çünki məsələnin diplomatik yolla həlli dövlət başçısının rəhbərliyi altında həyata keçirilməkdədir. Biz də millət vəkili olaraq öz imkanlarımız çərçivəsində daxil olduğumuz parlamentlərarası işçi qruplarında fəaliyyətimizi geniş qurmalıyıq, getmiş olduğumuz səfərlərdə bu məsələni hər zaman gündəliyə gətirməliyik".

Deputat Fazil Mustafa da sözügedən təklifi dəstəkləyənlər sırasındadır: "Təxminən 3 ildir ki, bu məsələ mütəmadi olaraq gündəmə gətirilir. Biz də bu təklifi dəstəkləyir və dəfələrlə demişik. Hesab edirəm ki, parlamentdə Qarabağla bağlı komitə yaradılmalıdır. Əgər belə bir komitə yaradılarsa, bu, çox müsbət bir addım olar".

Millət vəkili Aynur Camalqızı parlamentdə Qarabağ komitəsinin yaradılmasını vacib hesab edir. Onun sözlərinə görə, hazırkı məqamda, Qarabağla bağlı çox həssas bir dönəmdə belə bir addımın atılması önəmlidir: "Mən konkret olaraq bölgədə baş verənlərə Türkiyənin münasibətini və onların Ermənistanla sərhədləri açmaq kimi mövzuların gündəmdə olduğunu yada salmaq istəyirəm. Deputat həmkarımın da əslində bu məsələni məhz indi müzakirəyə çıxarmasını sırf bununla bağlayıram. Düşünürəm ki, parlamentdə belə bir komitənin yaradılması və bu münaqişə çözülənədək onun fəaliyyət göstərməsi çox vacib və önəmlidir. Ona görə ki, Qarabağla bağlı parlamentin apardığı işi biz bacardığımız qədər genişləndirməliyik".

Seymur Qasımbəyli

Şərq.- 2009.- 16 aprel.- S. 4.