Taxılın qiyməti 12 qəpikdir

Növbəti ildə heç kim taxıl əkmək niyyətində olmayacaq

Müşfiq Həsənov: "Ayrı-ayrı adamların torpaq fondunda əkin işləri aparmaqla Azərbaycanda etibarlı ərzaq təminatını sual altında qoyuruq".

Ölkədə istehsal olunan taxılın qiyməti aşağı olduğundan əkinçilər böyük itki ilə üz-üzə dayanıblar. Hazırda bir kilo əla nov buğdanın qiyməti 12 qəpikdir. Bu da maya dəyərindən aşağıdır.

Məhz buna görə istehsalçılar istehsal etdikləri məhsulu satmaqdan imtina etmək məcburiyyətində qalıblar. Lakin bu da problemdən çıxış yolu deyil. Çünki yenidən əkinə hazırlaşmaq üçün əkinçiyə müəyyən qədər vəsait lazımdır. Sahibkarların qəzetimizə verdikləri məlumata görə, hazırda 12 qəpiyə satılan taxıl istehsalçıya qazanc gətirmir. Ona görə də onlar növbəti ildə taxıl əkmək niyyətində olmadıqlarını bildirirlər.

Ekspertlər isə yaranan problemlərin kompleks şəkildə həll olunmasının tərəfdarıdırlar. "Yeni Həyat-İqtisadi İnkişaf" İctimai Birliyinin sədri, iqtisadçı ekspert Müşfiq Həsənov məsələ ətrafında danışarkən bildirdi ki, aqrar-sənaye kompleksinin davamlı inkişafını təmin edən xüsusi dövlət proqramları hazırlanmalıdır. "Dövlət fondundan 60 min hektar əraziyə kimsə taxıl əkibsə, bu, davamlı inkişafın əsası deyil. Əsas kolxoz və sovxozların islahatı nəticəsində əmlak payı kimi bölünmüş torpaq sahələrində cəmləşmiş kənd təsərrüfatı məhsulları istehsalçılarının yeni strukturda idarəetmə formatının yaradılmasıdır. Yəni təsərrüfatçı formalarının təsdiqi. Bu da ərzaq məhsullarının istehsalı sahəsində, xüsusilə də kənd təsərrüfatı məhsulları istehsalı sahəsində, onun emalında, alqısında, satqısında, o sahəyə xidmətlərin göstərilməsində rəqabət mühiti yaradır". M.Həsənov söylədi ki, Arqanizm Səhmdar Cəmiyyəti kənd təsərrüfatı məhsulları istehsalçılarına aqroservis xidmətləri göstərsə də, əkinçilərə alternativ xidmətlər təklif edən, yəni rəqabət mühiti yarada biləcək obyektlər olmadığı üçün kəndlilərin istehsal etdikləri məhsulun maya dəyəri artır. Baxmayaraq ki, dövlət güzəşt tətbiq edir. Ölkədə kifayət qədər dəyirmanların olduğunu vurğulayan ekspertin fikrincə, bir çox dəyirman sahibləri öz aralarında sözləşərək məhsul bolluğu olan şəraitdə taxılı daha aşağı qiymətə almağa çalışırlar: "Buna görə də xaricdən idxal olunan taxıl məhsullarına gömrük vərgisinin tətbiqi ilə bağlı irəli sürülən təklif təqdirəlayiqdir. Lakin belə olan halda biz daxili bazarı qorumuş olsaq da, ortaya digər problem çıxa bilər. Yəni yerli və baha qiymətə alınan taxıl istər-istəməz un məmulatlarının qiymətində də özünü göstərəcək. Bu, dolayısı ilə həm də qiymət artımına şərait yarada bilər. Bütün bunların kompleks həll olunması üçün hesab edirəm ki, aqrar-sənaye kompleksinin struktur islahatı başa çatdırılmalıdır, bazar infrastrukturu formalaşdırılmalıdır. Bu olmadan, ayrı-ayrı adamların dövlətin torpaq fondunda əkin işləri aparmaqla Azərbaycanda etibarlı ərzaq təminatını sual altında qoyuruq".

Seymur

Şərq.- 2009.- 30 iyun.- S. 5.