Qatilin atası Bakıya gətirildi
Terrorla bağlı şübhəli şəxs
saxlanıb
"Fərda Qədirov hadisədən qabaq deyirmiş
ki, bir-iki günə dünya ondan danışacaq"
Dövlət Neft Akademiyasında iki
gün öncə törədilən qanlı terror hadisəsinin
başvermə səbəbləri müəmma olaraq
qalmaqdadır. Hadisə ilə bağlı istintaq qrupu fəaliyyət
göstərsə də, hələlik elə bir ciddi nəticə
əldə olunmayıb. Xatırladaq ki, aprelin 30-da saat 9:30 radələrində
Azərbaycan Dövlət Neft Akademiyasının Bakı şəhəri
Dilarə Əliyeva küçəsi 227 saylı ünvanda
yerləşən "Qaz Neft Mədən" və "Neft
Mexanikası" fakültələrinin yerləşdiyi ikinci
korpusa daxil olan naməlum şəxsin inzibati binanın birinci
mərtəbəsindən altıncı mərtəbəsinədək
qarşısına çıxan hər bir kəsə
"Makarov" tipli tapançadan atəş açması nəticəsində
12 nəfər ölüb, 13 nəfər müxtəlif dərəcəli
bədən xəsarətləri alıb.
Daxil olmuş məlumat əsasında
hadisə yerinə dərhal polisin xüsusi təyinatlı
nizami hissəsinin, ərazi polis və prokurorluq
orqanlarının məsul əməkdaşları
çıxıblar. Polis tərəfindən zərərsizləşdiriləcəyini
görən silahlı cinayətkar özünü
öldürüb. Cinayətin törədildiyi yer və meyitlər
müayinə olunub, məhkəmə-tibbi, məhkəmə-trasoloji,
məhkəmə-ballistik və digər ekspertizalar təyin
edilib. Cinayəti törətmiş şəxsin üstündən
1980-ci il təvəllüdlü Gürcüstan vətəndaşı
Qədirov Fərda Əsəd oğluna məxsus şəxsiyyət
vəsiqəsi, habelə hər biri 40 güllə tutumlu və
içərisində 71 güllə olan xüsusi üsulla
hazırlanmış 3 ədəd patrondaş, 2 tapança
sandıqçası aşkarlanaraq
götürülüb.
Faktla əlaqədar Cinayət
Məcəlləsinin 120.2.2 (Xuliqanlıq niyyəti ilə adam
öldürmə), 120.2.4 (Xüsusi amansızlıqla adam
öldürmə), 120.2.7 (İki və ya daha çox şəxsi
öldürmə), 29, 120.2.7 (Adam öldürməyə cəhd)
və 228.1 (Qanunsuz olaraq odlu silah saxlama və gəzdirmə)
maddələri ilə cinayət işi başlanıb. Cinayətin
başvermə səbəblərinin, onu törədənin əlaqələrinin
müəyyən edilməsi və digər zəruri
araşdırmaların aparılması məqsədilə
peşəkar əməkdaşlardan ibarət istintaq-əməliyyat
qrupu yaradılıb, intensiv tədbirlər həyata
keçirilir.
İntensiv istintaq tədbirləri davam etdirilir
Dünən Baş
Prokurorluğun mətbuat xidmətinin rəhbəri Eldar
Sultanov "Şərq"ə açıqlamasında
bildirib ki, ADNA-da baş vermiş hadisəni araşdıran
istintaq qrupu istintaq hərəkətlərini davam etdirir. Onun
sözlərinə görə, intensiv istintaq hərəkətləri
Baş Prokurorluq və Daxili İşlər Nazirliyi rəhbərliyinin
ciddi nəzarəti altında Bakı Şəhər
Prokurorluğu və Bakı Şəhər Baş Polis
İdarəsinin peşəkar əməkdaşlarından ibarət
istintaq-əməliyyat qrupu tərəfindən cinayətin başvermə
səbəblərinin müəyyənləşdirilməsi və
digər zəruri araşdırmaların aparılması
istiqamətində müəyyən olunmuş istintaq fərziyyələri
ətrafında aparılır. E.Sultanov qeyd edib ki, cinayət nəticəsində
müxtəlif dərəcəli bədən xəsarətləri
almış 13 nəfərdən 3-ü elə aprelin 30-da
ilkin tibbi yardım aldıqdan sonra evə buraxılıb, qalan
10 nəfərin vəziyyəti isə stabil
ağırdır. O deyib ki, istintaqın gedişatı barədə
ictimaiyyətə əlavə məlumat veriləcək.
Hadisə ilə bağlı bir nəfər
saxlanılıb
Dünən bir qədər
sonra isə məlum olub ki, aprelin 30-da baş verən cinayət
hadisəsi ilə bağlı bir nəfər
saxlanılıb. Həbs olunan şəxs Gürcüstan vətəndaşı,
Marneuli rayonu Daştəpə kənd sakini Nadir Şirxan
oğlu Əliyevdir. Bu barədə APA-nın Gürcüstan
bürosuna Nadir Əliyevin qardaşı Namiq Əliyev məlumat
verib. Nadirin ADNA yaxınlığında dönər
satdığını deyən N.Əliyev
qardaşının terror hadisəsini törətməkdə
təqsirləndirilən Fərda Qədirovla əlaqəsi
olmadığını söyləyib: "Nadirlə Fərda
bir-birini yalnız daştəpəli kimi tanıyıblar. Qardaşım
Fərdadan beş yaş kiçikdir. Fərda Rusiyada olanda
qardaşım Ukraynada idi. Nadir 2008-ci ilin sentyabrında Tiflisə
gəldi. Bu il martın 18-dən isə Bakıya gedib". N.Əliyev
deyib ki, qardaşı əvvəlcə Bakıdakı
şadlıq saraylarından birində çalışıb,
sonra isə ADNA yanında dönər
satıcılığı ilə məşğul olub:
"Ailəmizin məsələdən xəbəri var. Bu
gün ata-anam Bakıya yola düşüblər. Nadirin
tutulması barədə bibim və xalam uşaqları zəng
edib xəbər verdilər". N.Əliyev onu da deyib ki, Nadir
ADNA-da baş verən hadisədən sonra saxlanılıb,
izahatı alınandan sonra isə sərbəst
buraxılıb: "Amma sonra onu yenidən həbs ediblər.
Bu dəfə bibim və xalam uşaqları onu özləri
polisə aparıblar ki, günahsız olduğunu sübuta
yetirsinlər. Fərdanı Bakıya qardaşım
çağırmayıb. Bakıda hüquq-mühafizə
orqanlarının əməkdaşları xalamgilə də gəlib,
bəzi məsələlərlə bağlı onları
sorğu-sual ediblər". N.Əliyev ailədə iki
qardaş olduqlarını söyləyib. O, Nadirin subay və
dindar olduğunu, namaz qıldığını da
açıqlayıb. Qeyd edək ki, baş verən silahlı
hücumdan sonra ilkin olaraq hadisənin məhz Nadir Şirxan
oğlu tərəfindən törədildiyi barədə məlumat
yayılmışdı.
Nadir Əliyevin
saxlandığını ANS PRESS-in Bakı Şəhər
Prokurorluğundakı mənbəsi də təsdiqləyib.
Bildiriblər ki, adıçəkilən şəxs istintaqda
dindirilib. Saxlanılan şəxs ifadəsində Fərda Qədirovla
bir evdə kirayə yaşadığını və onunla həmyerli
olduğunu deyib. N. Əliyevin sözlərinə görə,
F.Qədirov hadisəni törətməmişdən əvvəl
bir-iki günə bütün dünyanın ondan
danışacağını deyib. F.Qədirovda silah
gördüyünü deyən N.Əliyev qeyd edib ki, o, həmin
silahla Gürcüstandakı həmyerlisi Hacıəhmədi
öldürəcəyini söyləyib. Faktla bağlı
akademiyada yaradılan qərargahda Bakı şəhər və
rayon prokurorluqlarının müstəntiqləri tərəfindən
tələbə və akademiyanın əməkdaşları
dindirilir.
Fərda Qədirovun kirayə qaldığı evdə
axtarış aparılıb
Həmçinin
bildirilir ki, Bakı Şəhər Baş Polis İdarəsi
və Daxili İşlər Nazirliyinin əməkdaşları
tərəfindən Qədirovun Nizami rayonu Çobanzadə
küçəsi 65 saylı binada məskunlaşdığı
mənzilində cümə axşamı gecə saatlarında
axtarış keçirilib. Bu barədə Trend News-a Nizami Rayon Polis İdarəsindəki
mənbələr məlumat
verib. Mənbə bildirib ki, axtarış
zamanı Qədirovun mənzilindən istintaq üçün xüsusi
əhəmiyyətli sübutlar
götürülüb.
Bakı Şəhər
Baş Polis İdarəsinin mətbuat xidmətinin rəhbəri
Qalib Arif Trend News-a bildirib ki, mətbuat xidmətində bu barədə
məlumat yoxdur. Baş Prokurorluğun mətbuat xidmətinin rəhbəri
Eldar Sultanov isə Trend News-a açıqlamasında bildirib
ki, istintaq sirri olduğundan, aparılmış istintaq-əməliyyat
tədbirlərinin təfərrüatları ilə
bağlı mətbuata məlumat verilmir.
Bunu dünən qatilin
yaşadığı mənzilə gedən Lent.az əməkdaşları
da təsdiqləyib. Onlar mənzilin qapısına plomb vurulduğunu müşahidə
ediblər. Plombun üzərində "Daxili
İşlər Nazirliyinin
Kriminalistik Təhqiqatlar
İdarəsi" yazılıb.
Lent.az-ın əməkdaşının
əldə etdiyi məlumata görə, sözügedən mənzil
Gürcüstan vətəndaşı,
azərbaycanlı Arif
Qabulova məxsusdur. Fərda Qədirovla qohum olduğu bildirilən Qabulov mənzili ona kirayə verib. Ancaq özü də hərdən evə gəlirmiş. Arif Qabulov Gürcüstan-Azərbaycan
xətti üzrə sərnişin avtobusunda sürücü köməkçisi
işləyir. O, hazırda
Azərbaycanda yoxdur. Qabulovun Gürcüstanda olduğu bildirilir.
Qonşuları Fərda
Qədirovu bir neçə dəfə gördüklərini
deyiblər: "Tək yaşayırdı, yanına gedib-gələn
yox idi. Sakit həyat sürürdü,
kimsə onu tanımırdı". Mənzil
35-in qapı qonşularından
isə jurnalistlərə
açıqlama verən
olmayıb. Belə ki, bir gün
əvvəl - aprelin
30-da F.Qədirovun yaşadığı
mənzilin qonşuluğunda
yaşayan şəxslər
prokurorluq orqanları tərəfindən sorğu-suala
çəkilib. Qədirovun
yaşadığı mənzildən
başqa, 1-ci mərtəbədə
daha iki ev var. Həmin evlərin sahibləri jurnalistlərə qapını
belə açmayıblar.
Nizami Rayon Polis İdarəsinin
rəisi İsmayıl Əsədov Lent.az-a bildirib ki, Fərda
Qədirovun üzərindən həmin mənzilin
açarı çıxıb. Onun həmin mənzildə yaşayıb-yaşamadığı
hələlik məlum
deyil. Mənzil Gürcüstan vətəndaşı
Arif Zahid oğlu Qabulovun adınadır. Ancaq Qabulov da orada
daimi yaşamır. Onun ailə üzvləri hazırda Marneulidə yaşayır.
Qatilin atası
Bakıya gətirilir
Qeyd edək ki, F.Qədirovun
atası da Bakıya gətirilir. "İstintaqa ifadə vermək və təhqiqat işinə yardım göstərmək üçün
Azərbaycan Daxili İşlər Nazirliyinin
nümayəndəsinin müşayiəti
ilə Bakıya uçacağam". Bu açıqlamanı
APA-nın Moskva müxbirinə Azərbaycan
Dövlət Neft Akademiyasında terror aktı
törətmiş Fərda
Qədirovun atası Əsəd Qədirov verib.
Oğlunun son zamanlar dini
ekstremist ədəbiyyata maraq göstərib-göstərmədiyi
barədə sualı cavablandıran Əsəd Qədirov
bildirib ki, bu barədə ümumiyyətlə heç bir məlumata
malik deyil: "Əgər bu mənada nə isə baş
veribsə, bu, apreldə onun Bakıya getməsindən sonra
baş verə bilər. Oğlumun Bakıya kimin yanına getdiyini dəqiq bilmirəm, amma hətta bu mənada
da nə isə baş veribsə, məhz aprel ayında olub. Əslində heç nəyi təsdiqləyə bilmirəm,
çünki məndə
heç bir məlumat yoxdur. Yalnız onu deyə bilərəm ki, ədəbiyyatla maraqlanmayıb, ümumiyyətlə
çox az mütaliə edirdi. Amma televizora həddən artıq çox baxırdı".
Əsəd Qədirov
Bakıda nə qədər qalacağını bilmədiyini
deyib: "Təhqiqat işi ilə bağlı istintaqla nə
qədər lazımdırsa, əməkdaşlıq etməyə
hazıram". Qeyd edək ki, 1949-cu il aprelin 1-də anadan
olmuş Əsəd Qədirov Rusiya vətəndaşıdır.
Dünən günün
ikinci yarısında həqiqətən də qətlin F.Qədirov tərəfindən törədilməsi
ilə bağlı rəsmi açıqlama verilib. Baş Prokurorluğun mətbuat xidmətinin rəhbəri
Eldar Sultanov deyib ki, "İstintaq Dövlət Neft Akademiyasında qətli törədən
şəxsin kimliyini müəyyənləşdirib. Tanınma zamanı qatilin üzərindən tapılan sənədin həqiqətən də ona aid olduğu təsdiqlənib. Qatil
1980-ci il təvəllüdlü,
Gürcüstanın Marneuli
rayonunun Daştəpə
kənd sakini Fərda Qədirovdur"
ADNA-nın rektoru
danışdı
Nazirlər Kabinetinin
sözçüsü Akif Əli "Media forum"
saytına bildirib ki, hökumət aprelin 30-da Neft
Akademiyasında qətlə yetirilənlərin ailələrinə
və yaralananlara yardım göstərəcək:
"Dünən dövlət başçısı
başsağlığı verdi. Eyni zamanda bu qanlı olayın
istintaqının öz
nəzarəti altında
olduğunun dedi. Bütün Azərbaycan ictimaiyyəti bu hadisədən sarsılıb.
Yaxın-uzaq ölkələrdən
başsağlığı daxil olur, bizimlə
həmrəy olduqlarını
bildirirlər". A.Əli
hesab edir ki, bu hadisə
ölkədə sabitliyi
pozmağa çalışan
qüvvələrin işidir:
"İstintaq öz
işini görür,
hadisənin necə və nə səbəbə baş verdiyini aydınlaşdıracaq.
Bu, sıradan bir hadisə deyil". Gənclər və İdman Nazirliyi isə hadisənin şahidi olan gənclərin psixoloji durumunun qaydasına gətirilməsi üçün
faliyyət göstərmək
niyyətindədir. Nazirin
müavini İntiqam Babayev törədilən cinayətin təkcə Azərbaycan gənclərinə
yox, həm də Azərbaycan millətinə, Azərbaycan
dövlətinə qarşı
olduğunu vurğulayıb.
O, hadisənin şahidlərinə
psixoloji yardım göstərilməsinin vacib
olduğunu da deyib: "Çox böyük hadisədir, hadisənin şahidləri
dərin sarsıntı
keçiriblər. Buna görə
onlara psixoloji yardım göstərilməlidir.
Artıq mütəxəssislərlə
bu istiqamətdə iş aparılır. Şahidlərə psixoloji
yardım göstəriləcək".
Azərbaycan Dövlət
Neft Akademiyasının rektoru Siyavuş Qarayev də baş verən
qanlı olayla bağlı danışıb. Rektor "Azadlıq"
radiosunun əməkdaşı
ilə söhbətdə
gələcəkdə tədris
binasında təhlükəsizliyin
artırılacağını da bildirib: "Əlbəttə, mühafizə
güclənəcək. Amma
söhbət axı mühafizədən getmir.
Əgər sizin üstünüzə silahla
gəlirlərsə, sizin
də silahınız
yoxdursa, neyləyə
bilərsiz?" Rektor
binanın girişində
silahlı mühafizəçilərin
yerləşdirilə biləcəyini
istisna etməyib:
"Yəqin ki, belə bir addım
atılacaq".
Yaralılardan 5-nin vəziyyəti ağırdır
Dünən Səhiyyə
Nazirliyinin mətbuat xidməti yaralıların
vəziyyəti ilə
bağlı məlumat
açıqlayıb. Məlumatda
bildirilir ki, Azərbaycan Dövlət Neft Akademiyasında baş verən silahlı basqın nəticəsində yaralanan
10 nəfərdən 5-nin vəziyyəti
ağırdır. Həkimlər
digər 4 nəfərin
vəziyyətini orta ağır, 1 nəfərin
vəziyyətini isə
kafi kimi qiymətləndirirlər. Qeyd
edək ki, yaralıların 8-i Kliniki
Tibbi Mərkəzə,
1-i 4 saylı Şəhər
Klinik Xəstəxanasına,
1- i 1 saylı Dəmiryol Xəstəxanasına
yerləşdirilib.
Onların 6-sı baş
və sifət nahiyəsindən, 2-si sinə,
1-i bilək, 1 isə
bud nahiyəsindən yaralanıb.
Bütün xəstələrdə
birincili cərrahiyyə
işlənməsi aparılıb,
5-də təcili əməliyyat
keçirilib, 3-də isə
əməliyyat keçiriləcək.
Səhiyyə Nazirliyi
yaralılara qan vermək üçün
adıçəkilən xəstəxanalara
üz tutan vətəndaşlara da müraciət edərək,
onlara öz minnətdarlığını bildirib. Nazirlikdən bildirilib ki, Qan Bankında bütün qan rezuslarına dair kifayət qədər qan ehtiyatı var.
Nəsimi Cəfərli
Şərq.-2009.- 2 may.- S. 8.