Xocalı Günü

Günəşin çıxmasını,

Səhərin açmasını,

Qəlbimin sədasını-

Xocalıya saxlamışam.

Gözlərimi dağlamıram,

Ölənləri ağlamıram,

Yollarımı bağlamıram-

Xocalıya saxlamışam.

Mən donub orda ölmüşəm,

Dağa, daşa gömülmüşəm,

Yanıb, alova dönmüşəm-

Xocalıya saxlamışam.

Kor olmuşam nifrətimdən,

Yox olmuşam ibrətimdən,

Yoğrulmuşam hiddətimdən-

Xocalıya saxlamışam.

Anam ağlar, bacım ağlar,

Atamla qardaşım ağlar,

Gözlərimin yaşı ağlar-

Xocalıya saxlamışam.

Vuracağam qan badəmi,

Tutacağam ölüm dəmi,

Düşmən üçün cəhənnəmi-

Xocalıya saxlamışam.

Daşam, dəmirəm, ağacam,

"Sus" deyənləri boğacam,

Dönüb Əzrail olacam-

Xocalıya saxlamışam.

Dözərəm min zülm gəlsə,

Dönmərəm min dönüm gəlsə,

Ölmərəm min ölüm gəlsə-

Xocalıya saxlamışam.

Soyun, adın, canın varsa,

Öz qeyrətin, qanın varsa,

Məşhər imtahanın varsa,

Xocalıya saxlamışam.

Elim məni qınamasın,

Heç kim məni ağlamasın,

Nişanəmi axtarmasın-

Xocalıya saxlamışam.

Öpəcəyəm yelləri mən,

Çingiz çəkən çölləri mən,

Dərməmişəm gülləri mən-

Xocalıya saxlamışam.

Ən müfəssəl həqiqəti,

Ən mükəmməl sədaqəti,

Ən müqəddəs ziyarəti

Xocalıya saxlamışam.

Göstərəcəm mən, neyləmək,

Dost-düşmənə nə söyləmək,

Göstərəcəm türk nə demək-

Xocalıya saxlamışam.

Nifrətim var ağlayana,

Yada ümid bağlayana,

Od vuracam odlayana-

Xocalıya saxlamışam.

Fevral ayı mənim yaram,

Rövşən adı mənə haram,

Bədəndə can param-param

Xocalıya saxlamışam.

Rövşən Yanar

Təzadlar.- 2010.- 25 fevral.- S.15.