Ağdam rayonunun
işğalından 17 il ötdü
Ağdamlılar Ağdamı Ağdamdakı
yox, Bakıdakı Şəhidlər Xiyabanında
andılar
Aqil Abbas:
"Bizə Şuşasız,
Laçınsız, Kəlbəcərsiz
Ağdam lazım deyil..."
Düz 17 il əvvəl iyulun 23-də Ağdam erməni qəsbkarları tərəfindən işğal olunub. Hər il olduğu kimi, dünən də rayon ictimaiyyətinin nümayəndələri, Bakıda müvəqqəti məskunlaşan məcburi köçkünlər Ağdamın işğal gününü yad etmək üçün Şəhidlər Xiyabanına toplandılar.
Əvvəlcə ziyarətçilər şəhidlərin məzarları üzərinə tər qərənfillər düzdülər. Sonra rayonun İcra Hakimiyyəti adından şəhidlər məqbərəsinin önünə əklil qoyuldu. Ağdam və bütün Qarabağ torpaqları uğrunda gedən döyüşlərdə həyatını qurban verən insanların ruhuna dualar oxundu.
Rayonun icra
başçısı Nizami Sadıqov
Ağdamın işğal gününü
xatırladaraq ağdamlılara müraciət etdi:
"Əziz ağdamlılar, biz 17 ildir Ağdamsız yaşayırıq. Bu illər sanki bizi sınağa çəkdi, o məna da ki, öz
torpağımızın qədrini indi daha yaxşı bilirik.
Torpaqlarımıza qayıtmaq üçün
çox az müddət
qalıb. Hesab edirəm ki,
biz gələn bugünkü
günü bura
toplaşmayacağıq. Gələn ilin bu ərəfələrində rayonumuzun işğal ildönümünü deyil,
qələbəmizi qeyd edəcəyik. Mən
sizin hər birinizi Ağdama çağırıram. Bu gün dövlətimizin
gördüyü səmərəli
işlər sayəsində Agdamdan
köçənlərin Ağdama
qayıdışı başlayıb. Ağdamlılar rayonun işğal edilməmiş
ərazilərində ciddi quruculuq
işləri ilə məşğuldurlar. Siz
də gəlin Ağdama, birlikdə quraq, yaradaq".
Millət vəkili Aqil
Abbas rayon ziyalıları adından çıxış edərək
ağdamlıların tezliklə doğma yurdlarına dönəcəklərini
əminliklə vurğuladı: "Çox vaxt deyirik ki,
Ağdam işğal olunub. Ancaq Ağdam o vaxt işğal
olunacaq ki, beynimiz, təfəkkürümüz,
yaddaşımız, ruhumuz işğal olunacaq. Bax, dəhşət
budur. Ermənilər bizim Ağdam kimi şəhərimizi,
torpağımızı işğal ediblər, ancaq ruhumuzu
işğal edə bilməyiblər. Biz həmin ruhun sayəsində
geri qayıdacağıq. Necə ki, Qarabağda Azərbaycanın
ilk şəhidi ağdamlı Əli ilə Bəxtiyar oldu,
son şəhidi də biz verərək Ağdamımıza
qayıdacağıq, eləcə də Şuşamıza,
Laçınımıza və digər rayonlarımıza,
Ağdama qayıtmaq çox kiçik arzudur. Çünki
bizə Şuşasız, Laçınsız, Kəlbəcərsiz
Ağdam lazım deyil. Cənab prezident İlham Əliyev
Qarabağın işğaldan azad olunması uğrunda
çox ciddi iş aparır. Əgər ermənilər
torpaqlarımızdan xoşluqla çıxmasalar, çox
gözəl bir müharibə olacaq və son şəhidlərimizi
verib, Allahın köməkliyi ilə ev-eşiyimizə
qayıdacağıq".
Millət vəkilinin təklifi
ilə şəhidlərimiz ziyarətçilər tərəfindən
alqışlandı.
Millət vəkili Bəxtiyar
Əliyev şəhidlərin arzularının, istəklərinin
reallaşacağına dərin inam hissi ifadə etdi: "Bəzən
deyirlər ki, şəhidlərimizin axıtdığı
qan hədər gedib. Əslində belə deyil. Onlar Azərbaycanın
müstəqilliyi uğrunda mübarizədə şəhid
olublar, onlar torpağımızın bütövlüyü
uğrunda şəhid olublar. Bu gün ölkəmiz
inkişaf edir. Bu gün dövlət başçısı
elə bir siyasət yeridir ki, Azərbaycan dünya birliyində
özünün möhkəm yerini tutub. Bu gün Azərbaycan
qüdrətli orduya, iqtisadiyyata malikdir. Hesab edirəm ki, biz
işğal altında olan torpaqlarımızı sülh yolu
ilə azad edəcəyik. Amma bu sülhü möhkəmləndirən
qüdrətli ordu da öz sözünü deyəcək.
Düşünürəm ki, qısa bir zamanda bu söz deyiləcək,
torpaqlarımız işğaldan azad olunacaq. Və
böyük Ağdam yenidən qurulacaq. Əslində bu
gün də Ağdam qurulmaqdadır".
B.Əliyev
ağdamlıların tezliklə doğma yurd-yuvalarına
dönəcəklərini söylədi: "Bu gün
Ağdama böyük qayıdış var. Bu
qayıdış böyük Ağdama, Şuşaya,
Laçına doğru gedən bir yoldur. Hamımız o yerlərə
qayıtmalıyıq. Hər kəs bacardığı
işdən yapışıb öz köməyini göstərməlidir.
Düşmən də görməlidir ki, ağdamlılar
geriyə qayıdır, şuşalılar geriyə
qayıdır və onlar çəkilib getməlidir. Bu yolda hər
birimizə uğurlar arzulayıram və prezidentimizin siyasətini
dəstəkləyirik. Şəhidlərimizin ruhu
qarşısında bir daha baş əyərək, deyirik:
sizin qanınız hədər axmayıb, torpağımız
işğaldan azad olunacaq".
Digər
çıxışlarda da prezident İlham Əliyevin
Qarabağın işğaldan azad olunması uğrunda
apardığı davamlı danışıqlar təqdir
olundu. Bütün çıxış edənlər
üzümüzə gələn il işğal
gününün məhz Ağdamda keçiriləcəyinə
ümidlərini ifadə etdilər.
Sonra mərasim
iştirakçıları Ağdam uğrunda gedən
döyüşlər zamanı həlak olan şəhidlərin
məzarlarını və Türk Şəhidliyini ziyarət
etdilər.
Ağdamda itirdiklərimiz
İşğal
altında qalmış Ağdam rayonunun təbii sərvətləri
17 ildir ki, talan edilir. Ekologiya və Təbii Sərvətlər
Nazirliyinin mətbuat xidmətindən verilən məlumata
görə, 23 iyul 1993-cü ildə rayonun 88395 hektar ərazisi,
1 şəhəri, 119 kənd və qəsəbəsi Ermənistan
Respublikası tərəfindən işğal olunub.
Ağdam rayonunun
işğaldan əvvəl 1736 hektar dövlət meşəsi,
710 hektar kolxoz meşəsi, 560 hektar yol, su və kanal kənarı,
şəhərətrafı meşə sahəsi mövcud
idi.
Rayonun ümumi
ehtiyatları 64863 min m3 olan mişar daşı, 140464 min ton
çobandağ əhəngdaşı, 44708 min ton Boyəhmədli
və 25197 min ton Şorbulaq gil yataqları işğal
olunmuş ərazilərdə qalıb.
Rayon ərazisindən
keçən ən iri çay olan
Xaçınçayın uzunluğu 104 km, su toplayıcı
sahəsi isə 657 km2-dir.
Ağdam şəhərində
yaşı 150-250 ilədək olan 14 ədəd, Boyəhmədli
kəndi ətrafında isə
yaşı 400 ilə çatan 71 ədəd Şərq
çinarı təbiət abidəsi kimi qorunurdu.
Azərbaycan Respublikası Ekologiya və Təbii Sərvətlər Nazirliyinin "İşğal olmuş Azərbaycan ərazilərində ətraf mühitə və təbii sərvətlərə dağıdıcı təsiri müəyyənləşdirən (izləyən) operativ mərkəz"i işğaldan sonrakı dövrlərdə rayon ərazisində təbii sərvətlərin ermənilər tərəfindən dağıdılmasına dair aşağıdakı faktları aşkar edib:
İşğal olunmuş ərazilərdən yaşı 400-ə çatan şərq çinarı növündən olan ağacların doğranaraq Ermənistan istiqamətində aparılması və iri gövdəli ağacların qırılaraq yığıldığı müşahidə edilib.
Rayonun işğal altında olan Novruzlu, Yusifcanlı, Kəngərli, Çəlik, Qaradağlı-Kəngərlisi, Göytəpə, Gülçülük kəndlərində 6330 hektar otlaq sahəsi erməni hərbçiləri tərəfindən yandırılıb. Yanğın zamanı "Qırmızı kitab"a və Beynəlxalq Təbiəti Mühafizə İttifaqının "Qırmızı siyahısına" düşmüş müxtəlif sayda turac, qırqovul və gürzə məhv olunub.
Elbar ŞİRİNOV
Təzadlar.- 2010.- 24 iyul.- S.9.