"Bu dərd gözlərimi
örtüb qan kimi..."
(Şair S.Şəkərlinin 50 illiyinə gecikmiş
dost sözü)
Şair kimi doğulmaq,
şair taleyilə əl-ələ verib, şair baxtıyla
barışıb da sonacan bu qədər-qismətlə
yollaşıb yola getməkdən zülmlü aqibət yoxdu.
Kimsə bu sözümü qəribliyə salmasın,
çünki ucdantutma şeir yazanları nəzərdə
tutmuram. Şeir yazmaq hələ şair olmaq demək deyil.
Şairlik isə könül işi, ruhun divanəliyidi,
adamın bu boyda dünyada başını qoymağa bir əlcə
yer tapa bilməməsidi, sürgündü, daş-qalaq olan
içinin ağrılarını gizləyə-gizləyə
ayrılıqların böyrünə düşüb
dualarını daşa-torpağa, göylərə, adamlara -
dünyanın qulağına pıçıldayaraq üzdə
heç nə olmamış kimi yaşamaqdı... Bir sözlə,
şair kimi doğulmaq zülümdü və ən
zülümlüsü isə odur ki, əslində Tanrı
lütfü olan bu qeyri-adi vergiylə doğulanlardan bir bəndi-bəşər
soruşmadı ki, bu bəxtlə doğulmağa
razısanmı, yoxsa yox?.. Seçim edən yəqin bilir ki,
böyük sözün altına kim çiyin verib də onu
daşıya, yaşada bilər, qədir-qiymətə kim
çatdıra, Tanrı dilindən qopan sözü urvatında,
hörmətində, sirri-sehrində, cazibəsində kim
saxlaya bilər...
Bu gün yuxarıda dediklərimin
beş qatını yaşayan bir şairlə üzbəüz,
dizbədizəm və bu şair Saday Şəkərlidir.
Saday Şəkərli bu
yaxınlarda 50 yaşının qapısını
açıb-örtdü və əslində bu yaş məsələsi
də şair ömründə şərti xarakter
daşıyır, şairin yaşını dediyi
sözün nə qədər yaşadığı və hələ
nə qədər yaşayacağı müəyyən edir,
elə-belə də isə şairlərin yaşı olmur...
Sadayın "ömrün
yorğun kölgəsi" adlı poetik toplusu hələlik
onun sonuncu sayılacaq kitabıdır. Bəziləri kimi, mən
bu kitabı Sadayın 50 illik şair ömrünün
hesabatı saymaq fikrində deyiləm. Bu kitaba sadəcə,
şair Saday Şəkərlinin oxuculara deməyə yetərincə
sözü olduğunu isbatlayan bir nümunə kimi baxır və
bəri başdan demək istəyirəm ki, "ömrün
yorğun kölgəsi" bütövlükdə bu gün
çağdaş Azərbaycan poeziyasını hər vəchlə
inkar edənlərə "şeir yazılmır, oxucunu
özündən çıxaracaq qədər söz deyə
bilən şair yoxdu" misallı fikri təkrar və təlqin
yolunu tutanlara tutarlı bir şair cavabıdır və
bütünlükdə "poeziya nədir" - sualına
tam şəkildə cavab verən bu kitabı ən azı
görməməzliyə vurmaq, sadəcə, mümkün
deyil. Bu qənaətimi mümkünləşdirən səbəbləri
isə deyəcək, izahını verməyə
çalışacağam.
"Belə
tapşırıblar mənə dünyanı..."
Hər şeydən əvvəl Saday Şəkərlinin yaradıcılığında diqqət çəkən ilkinlik, müstəvi rolunu oynayan məqam nədir? Bu sualın cavabını tapmaq üçün bütövlükdə Sadayın yazdığı bütün əsərləri oxumaq elə də vaciblik, zərurət əmsalı daşımır. Ona görə ki, onun yaratdığı irili-xırdalı hər bir əsər elə dərini hissiyyatla qələmə alınır ki, onların hər hansını götürüb onun barəsində yetərincə söz demək, fikir söyləmək mümkündür. Şair Saday Şəkərlinin poeziyasında ən əvvəl möcüzəvari bir harmoniya üstündə köklənən, aydın və sakit bir sükutun içindən keçərək adamın içini diksindirən, az qala özündən çıxaran, olmuşları, olacaqları aram-aram dilə gətirən, bu azmış kimi, səni özünə şərik etdirən bir ruhun harayı var. Bu harayın sətir-sətir dilə gətirdiyi hər şey, hər bir bədii predmet o qədər canlı təsvirlidirlər ki, sanki onlar oxunmur, gözlə görünür, müşahidə edilir. Sadayın şair dünyasında olmaq adamı yormur, bezdirmir və bu şeirlərin təbiiliyi, səmimiyyəti onu isbatlayır ki, Saday oxucu yanında yerini şirin salmaq, möhkəmləndirmək üçün yox, ürəyinə gələnin, dolanın onu rahat qoymadığı üzündən əlini qələmə uzadan, yazan şairdir.
O, heç bir əsərində diqtə və təlqin yolunu tutmur, zorən oxucunu dediklərinə inandırmağa çalışmır və birrəngli, bir-birindən yalnız mövzu sarıdan fərqlənən, amma kökündə eyni münasibət cəmlənən standart münasibətlərdən uzaq durmaqla yanaşı, dediyinə oxucunu inandırmağı bacaran şairdir.
Saday -
"Köksümdə
ağrılar alır dincini,
Ay susur, il dözür, fəsil
incimir.
Elə paylayıram öz
sevincimi,
Elə hey əlimdən qapan
özgədi" -
deyəndə,
"Kim deyir ki, baş
ağarmaz, yaş artmaz,
Yaxşı dünya yaman kəsi
yaşatmaz?
Yaxşı qonşu yad
toyuğa daş atmaz,
Yaman qonşu çəpər
çəkər bir ucdan". -
söyləyəndə də,
"Hər yetən
üstümdə ağlayır mənim,
İçimdən göyərən
qəbirəm indi.
Verib küləklərə
çiçəklərimi,
Dərdimi dən kimi səpirəm
indi"
pıçıldayanda da kiməsə
ağıl dərsi vermədən, öz-özüylə həmsöhbət
olduğu bu anlardakı halıyla, ovqatıyla, titrəyişiylə
hər birimizin içində haçansa
yaşatdığımız anların güzgüsünə
çevrilə bilir.
S.Şəkərlinin poetik
"məni" keçmişi lənətləməkdən,
ittihamedici tondan, hədsiz pərişanlıqdan,
canüzücü həddə yetən kədərdən, məftunluğa
yaxın eqoizmdən uzaq durmaqla yanaşı,
aydınlığa bürünmüş səlis dildə
oxucusuyla həmsöhbət olmağı xoşlayır.
"Oxucu ilə aydın dildə danışmaq yazarın
lütfkarlığıdır" - deyir Jül Renar. Bu mənada,
çağdaş poeziyamızın bugünkü mənzərəsinə
göz yetirmək kifayətdir ki, orada dilə qarşı olan
saymazlığın dözülməz həddə yetdiyinin
şahidi olasan. Şeir forma və üslubdan asılı
olmayaraq elə bir dildə qələmə alınmalıdır
ki, onun üstündə baş sındırmaqla müəllifin
nə demək istədiyini yüz yerə yozmadan anlayasan. Bu
gün guya yeni ...izmlər altında yazanlar oxucunu sanki
riyaziyyatçıya çevirmək yolunu tutublar. Amma bu o demək
deyil ki, poetik fikir birbaşa, bədiilikdən uzaq şəkildə
qələmə alınmalıdır.
Sadayın şeirləri bu
baxımdan öz rəngarəngliyi ilə bərabər, bədii
çalarlarını qorumaq şərtilə hər vaxt və
hər zaman üçün çəkisini, rəngini,
işığını qoruya biləcək şeirlərdir.
Bu şeirləri bu gün də, sabah da, yüz illər ötəndən
sonra da çətinlik çəkmədən oxumaq, oxucuya təqdim
etmək mümkündür.
Rus tənqidçisi
A.Belnikov deyir: "Əsl söz adamı tarixin mərmər
divarlarını, bürünc qapılarını
sındıra bilməsə də, ən azı onun cırmaq
yerləri orada görünməlidir". S.Şəkərli
qeyd etdiyimiz kimi, hər vədə oxucusuyla həmsöhbət
olmağa hazır şairdir və o, bu mükamilədə
siyasətçilər kimi hələ olmayanlardan, baş
tutmayan, amma arzuedilənlərdən yox, ötənlərdə,
dünənlərdə baş verənlərdən
danışmağı xoşlayır. O, bir növ öz
iç dünyasını, ürəyindəki sirli anları
saxlaya bilməyən, bir növ özü-özünə
"düşmən", dili özünə "qənim"
kəsilən bir söz sahibidir.
"Yaralı dalğalar
dizinin üstə,
Gündə ağı deyən
yarımadayam.
Məndən nə istəsən,
yarsını istə,
Mən yarım adamam,
yarım adayam."
(Yarısı mənimdi, yarısı...)
"Hey çapdım
ömür köhləni,
Sözlə doldurdum dəhnəni...
Əlifbası çox
köhnədi,
Oxunmur yazı
alnımda."
(Oxunmur)
"Mən min dəfə
bölünmüşəm,
Cana yığıb
bölgü məni.
Kimi qopardır yaramı,
Kimi açır,
bükür məni."
(Məni)
Mənə elə gəlir
ki, dediklərimin təsdiqi sayılacaq bu nümunələrlə
əlavə şərhə ehtiyac yoxdur.
Saday Şəkərlinin
üz tutduğu, əsas hədəfi, üzünü tutub
dediyi sözün ünvanı - insandır. Şairin öz bədii
"mənində" ümumiləşdirdiyi həmin obraz
bir vasitə olaraq onun əsərlərindən boy verib
görsənir. Əslində isə həmin bədii "mənin"
- insanın prototipi elə hər birimizik. O, öz
ağrısından boylanaraq dünənin, bü günün
qapılarını döyərək səsinə verilən
bir səsin, ona qoşularaq qandan-qadadan, hər cür pislikdən
uzaq, ayrılıqların göynərtili təəssüfündən,
bir daha geri dönməyəsi sevdalardan, yad tapdağı
altında qalan yurd yerlərindən, ün yetməz tarixin
qatlarında gizlənən ərən səslərindən,
yaddaşlardan sallanıb gəzən xatirələrdən
söz açan bir insanın taleyinin sözlə şəklini
çəkir. Bir neçə nümunəyə diqqət
yetirək.
"Mən də bir zaman
daş idim,
Aydı, Günəşdi
yaşıdım.
Yadnan bir yerdə
yaşadım,
Yardan ayrı salan
baxtım."
(Baxtım)
"Bu dünyada bir adətdi,
-
Gedən gəldi, gələn
getdi.
Axı səni kim öyrətdi?
Getmə, getmə, nolar, getmə."
(Getmə)
"Poeziya özünəməxsus,
bənzərsiz və hər dəfə inkardan uzaq duyumla,
ağlın diqtə süzgəcindən yan keçərək
hissin, duyğunun əlinin yetdiyi yerdə dünyanı yenidən
kəşf etməkdir" - deyir şair Mişel Yelbek.
Sadayın kəşf etdiyi hər bir əsərindəki
söz dünyasında Dünyaya, İnsana böyük bir
sevgi, şəfqət hissi hakimi-mütləqdir. Bu dünyada
uduzan və udan tərəf, qınağa səbəb olan hədəf
bir nəfərdi - o da elə Saday Şəkərlinin
özüdür. Buradakı talelərin ümumi fonunda üz
tutub getdiyi məkanın sahibi də, qonağı da özüdür.
Bu dünyada hökmü-fərman olan Tanrılar deyil və həmin
dünyada cəza verən, cəza çəkən də,
günahı olan da, olmayan da, qınayan da, qınanan da,
haqlı da, haqsız da elə şairin özüdür. Amma
bu poetik dünyanın içində bir darlıq,
sıxlıq, boğucu əhvali-ruhiyyə yoxdur, əksinə,
buradakı misralardan, bəndlərdən adamı bir
azadlıq havası vurur. S.Şəkərlinin azad şair ruhu
əlbəttə ki, çərçivələrə
sığan halda deyil, heç onun bütlərə də
baş əyməyə, kimisə boş-boşuna öyməyə
nə vaxtı, nə də fikri yoxdu. S.Şəkərlinin həmin
dünyada ən böyük "günahı" isə
olsa-olsa, özünün "boynuna aldığı"
aşağıdakı etirafıdır.
"Şeir yazdım, ilahi,
Keç günahımdan.
Şeir yazanda görürəm,
Səni yaxından.
Səndən ayrıldım,
Yenə
Sənə
qarışdım, Allah.
Şeir yazdım...
Bağışla,
Sirrini açdım,
allah."
(Şeir yazdım, ilahi)
Sadayın
poeziyasındakı intonasiyalarda sözün bədii yük
altında ifadə edilən fikri çatdırmaq
üçün çətinliklər çəkdiyi hiss
olunmur, eyni zamanda o, hər bir əsərinin sonluğundakı
nəticələrində də hökmlü səsini
qaldırmır. Unutmaq olmaz ki, hər bir şairin müəyyənləşdirdiyi
ideyanın, fikrin daşıyıcısı olan şeirlərində
ideya və fikir məsələsi ierarxik xarakter
daşıyır. Yəni bir poetik əsərin hər bəndi,
hətta hər misrası müəyyən motivlərin üzə
çıxmasına rəvac verir, ancaq bütövlükdə
onlar ayrılmaz şəkildə bir vahidə - mətnə
xidmət edrlər.
Şairin hökmü əsərin
sonluğunda elə şəkildə olmalıdır ki, o
bütün bəndlərin yükünü daşımaq
gücündə olsun. Bu prinsiplə yanaşsaq, S.Şəkərlinin
hər bir əsərindəki sonuncu bəndlər
ayrı-ayrılıqda bir şeir qədər təqdim
olunmağa layiqdir.
S.Şəkərli kütlə
üçün yazan "tribun şair"
olmadığı kimi, yalnız "elita" - tək-tək
"seçilmişlər" üçün də qələmə
əl uzadan şair deyil.
özünü,
dünyanı, həqiqəti, haqqı-ədaləti,
pisi-yaxşını, sevinci-kədəri,
vüsalı-ayrılığı, mərdliyi-namərdliyi,
faniliyi-əbədiyyəti qəbul edən və hər
şeydən əvvəl özünü dərk edən
insanlardır S.Şəkərlinin oxucuları.
S.Şəkərlinin
şeirlərində daha çox göz qırpımında
axan vaxtın və zamanın ahəngini hiss etmək,
üzünü görmək mümkündür. Bu axarda isə
oxucu ilə şair arasındakı münasibətlərin
yaranmasında kimsə lazım deyil, çünki orada təsvir
edilənlərin, hadisə və təsvirlərin hər
hansının nə izaha, nə də isbata ehtiyacı yoxdur.
Hər bir şair bir az da
filosofdur, amma bu "filosofluq" bilərəkdən hər
misranın üstünə yüklənərsə, nəticə
etibarilə yaradılan boş hay-küy təsirli,
yalançı təəccüb donuna bürünmüş,
dəlilər qədər ağıllı olduğunu fikirləşmək
kimi bir söz yığını olacaq. Saday daha çox
bundan uzaq qaçmağa çalışsa da, istər-istəməz
bədii sual şəkilli izahlarında bu məqamla üzbəüz
qalır. Amma Sadayın ustalığı ondadır ki, o, bu
tip şeirlərində fəlsəfi
baxışlarını özü izah edir və eyni zamanda
ağlabatmaz, cod mühakimələrdən uzaq durmağı
bacarır.
Bəzən şeirin cəlbediciliyi,
diqqətçəkiciliyi təkcə onun gözəl deyimlərlə
ifadə edilməsində olmur, həm da haradasa sözlərin
harmonik düzümündən doğaraq gerçəkliyin
çılpaq şəkildə təzahürü ilə
bağlı olur. Şairin "Hara qaçım bilmirəm",
"Torpağa oğul sözü", "Atamdan qalan
payız", "Minini unutmuşam", "Kasıblıq təki",
"Bu ağaca toxunma" və digərləri bu qəbildən
olan əsərlərdir.
S.Şəkərli
üçün forma və üslub, vəzn
ayrı-seçkiliyi yoxdur. O, heca vəznində də, sərbəst
vəzndə də eyni dərəcədə və
özünəməxsus şirin bir təhkiyyə ilə,
ustalıqla oxucusu ilə həmsöhbət ola bilir. Sən
demə, Saday bu gün az saylı qələm əhlinin
müraciət etdiyi əruz vəznində də qəzəllər
yazırmış. Əsasən rəməl bəhrində
yazdığı qəzəllər klassik irsi yaşatmaq
sarıdan, eləcə də sırf azəri türkcəsində
yetərincə dilə və ürəyə yatımlı qəzəl
yazmağın bir daha mümkünlüyü baxımından
alqışlanmağa layiq şair cürəti və qüdrətidir.
Bir nüansı da qeyd edim
ki, "ömrün yorğun kölgəsi" kitabında
Saday Şəkərlinin daha çox 80-ci illərdə qələmə
aldığı əsərlər üstünlük təşkil
edir. Bunu oxucuya "meydan oxumaq" kimi qəbul etmək fikrində
deyiləm, o fikirdəyəm ki, bu şeirlər doğrudan da
çap olunmağa, oxucunun diqqətinə
çatdırılmağa layiq əsərlərdir.
Bu yazıda Saday Şəkərli
yaradıcılığı haqqında müəyyən
fikirlərimi nəzərə çatdırdım, amma
bütövlükdə, onun
yaradıcılığının məziyyətləri
haqqında danışmaq, söz demək bir qəzet səhifəsinə
sığacaq iş deyil.
Belə bir fikir var ki, bir
şeirlər kitabında 5-10 yaxşı şeir tapa bildinsə,
deməli, oxuduğun kitaba sərf etdiyin vaxta heyfin gəlməməlidir.
üstəlik, belə bir çətinlik var ki, həmin 5-10
şeiri tapmaq üçün hansı səhifəni
açmalısan ki, sənin oxucu bəxtin gətirsin, bəlkə
sona yaxın... bəlkə orta səhifələrdən... bəlkə
lap başdan? Saday Şəkərlinin "ömrün
yorğun kölgəsi" şeirlər kitabını
haradan açırsan aç, yüzdəyüz ürəyincə
istəyən şeirlərlə üzbəüz qalacaqsan -
elə mənim kimi. İnanmırsan? Onda tap, oxu və Saday
Şəkərlinin əsl şair olduğunu bir daha
özün üçün kəşf et - yenə elə mənim
kimi...
P.S. ömrün uzun olsun,
Saday qardaşım, 50 yaşdan o yana yaşadığın
bütün illərdə Tanrının kölgəsi
üstündə olsun.
Alim Məhərrəmli
Təzadlar .-2010.- 13 mart.- S.14.