AY DƏDƏ dastanı

(Əziz dostum, görkəmli alim, gözəl memar Hüseyn Artıkoğlunun 60 illik yubileyinə ithaf edirəm.)

Mən sənin tək dağa saldım nəfəsi,

Sən də qaytar göylərə sal bu səsi.

Bayquşun da dar olmasın qəfəsi,

Burda bir şir darda qalıb bağırır,

Bu mürvətsiz insanları çağırır.

Şəhriyar

Qoyman qurdalanım məni, a dağlar,

Qoyman xırdalanım məni, a dağlar,

Qoyman murdarlanım məni, a dağlar,

Sinəmdə tər-təmiz havanız çağlar,

Könlümdə Koroğlu davanız çağlar.

Müəllif

Ömür zıq-zaqlıdır, kələ-kötürdü,

Kim gələndə özünnən nə gətirdi?

Kim köçəndə özünnən nə götürdü?

Bu da belə bir həyatdır, ay Dədə,

Sirr-soraqlı kainatdır, ay Dədə.

İqbal da var, tale də var, baxt da var

Qul bazarı, qul çiynində təxt də var,

Əqidəli mərd insandır baxtavar,

Səndən nişan yaxşı addı, ay Dədə,

Yamanlıqlar sənə yaddı, ay Dədə.

Əlinnən od, gözünnən qor götürdün,

Sağ ələ nə gəldi, solnan ötürdün,

Kimsəsizlər harayına yetirdin,

Mərd insanı yarı yolda qoymadın,

Yaman gündə, yaman halda qoymadın.

Təmənnasız arxasan çox insana,

Torpaq aldın, toy da etdin mərdana,

Bunlar nə xəyaldır, nə də əfsana,

Alnın tökdü pucur-pucur tər, Dədə,

İstəmədin xeyri yenə şər, Dədə.

Tələbələr sevir səni ata tək,

Elminlə, helminlə olmusan kömək,

Fəhlələrlə çox kəsmisən duz-çörək,

Xeyirxahsan, səmimisən, ay Dədə,

Rüşvətxorlar qənimisən, ay Dədə.

Nə qazansan halal olub qazancın,

Olmayıb qulbeçən, nə də dilmancın,

Millət qeyrətindi, vətən baş tacın,

Onlarsız bir anın yoxdu, ay Dədə,

Şükür qədd-qamətin şaxdı, ay Dədə.

Yox kimsədən, nə gileyin, qınağın,

Xalıdakı ərş-arxacdı sınağın,

Altmış yaşda dostlarındı qonağın,

Dost istəməz dostu düşə heç dara

Tanrım səni çox görməsin dostlara.

Of qocaldıq, niyə deyək bu vaxtda,

Görüləsi işlər nə çox qabaqda,

Qazan qaynar ağzı bağlı qapaqda,

Görək kimlər yol dəyişir, ay Dədə?

İmam Hüseyn yada düşür, ay Dədə.

Gəlib xəlifəmiz o olsun deyə,

Yüz minlər çağırdı onu Kufəyə,

Küfə beyət etdi Yezidə niyə?

Müxənnətdir candan qorxan, ay Dədə,

Beş-on qaşıq qandan qorxan, ay Dədə.

İmam Əli çox hikmətlər söyləmiş,

Bic Müaviyə gəlib-gedib neyləmiş?

Qarın xaşallayıb, peysər piyləmiş,

Uzun hekayətdir çoxdan, ay Dədə

Taxt-səltənət qorxur haxdan, ay Dədə.

Bir söz demir Əli, Vəli, Pirvəli,

Söz bir olsa, işlər olar görməli,

Tamahkar sərvətə zəlidir, zəli,

O zalımlar söz duymayır, ay Dədə,

Qarın doyur, göz doymayır, ay Dədə.

O zalımlar iblisdimi, divdimi?

Ya cin-şeytan, ya da qorxunc mifdimi?

Onlar çəkən təlaşdımı, kefdimi?

Onlar kimsə, deyil insan, ay Dədə

Yerə girsin yersiz ad-san, ay Dədə.

Hamı kamil insan olanmaz ki, eh

Kimsə nəsə satsa əvvəl alar beh,

Hərə əməlinə özü cavabdeh,

Quran öyrənmədi onlar, ay Dədə

Axirəti nədən anlar, ay Dədə?

Onlar məndə məni dağıtmaq istər,

Sözümü tərsinə oxutmaq istər,

Oxunu qəlbimə toxutmaq istər,

Allah girər aralığa, ay Dədə,

Qəlbim dözməz paralığa, ay Dədə.

Yüz yaşda da səni belə şux görüm,

Alnı açıq, gözü, könlü tox görüm,

Hər işini, hər sözünü hax görüm,

Haqq sevəni sevən haxdı, ay Dədə,

Şair təbim coşsun, vaxtdı, ay Dədə.

Bir Allahdı insanları sınadan,

Heç kimsə yox, sən özünsən binadan,

Mərd yarandın mərd atadan, anadan,

Mərdlikdən də həzz alırsan, ay Dədə

Ərş-əlaya ucalırsan, ay Dədə.

Götürməzsən bən-Adəmdən hədə sən,

Allah saxlar, sınmazsan heç vədə sən,

Tək mənə yox, türk dünyama Dədəsən,

Dədə Qorqud timsalısan, ay Dədə,

Həsrətimin vüsalısan, ay Dədə.

Hər binanın düzsə hımı, təməli,

Deməli, qızıldır memarın əli,

Bina da, şeir də tanrı gözəli,

Ölçüsü, biçisi yerli yerində,

Məna görkəmində, hikmət dərində.

Mən riyaziyyata qoşsam başımı,

Korşalmış görərəm öz yaddaşımı,

Dərdli vətənimi, türk sirdaşımı,

Bu Allahdan agah sənə, ay Dədə

Vəsf etsəm bəsimdir mənə, ay Dədə.

Of yenə də ruhum yandı, alışdı,

Hər tərəf mafyadı, qatma-qarışdı,

Bu nə düşmənçilik, bu nə barışdı?

Bir sümük-dəriyəm niyə demirsiz?

Vətən qan ağlayır səssiz-səmirsiz.

Bu nə gəldi-getdi, çıxış-girişdi,

Vətən çöldən, içdən alış-verişdi

ATƏT-çilər yenə gəldi, görüşdü,

Nefti Qarabağdan üstün saydılar,

Cağbacağ bir bəyanat da yaydılar.

BMT-də də işlər düşüb kələfə,

BMT-də sözün deyib dörd dəfə,

Amma oxu toxunmayıb hədəfə,

Sən Hayka yox, İvana bax, İvana,

BMT çəkənmir onu divana.

Belə BMT-yə haqdı deyəsən-

Sən nə üzlə bu dünyaya yiyəsən?

De, ABŞ-a çoxmu boyun əyəsən?

O söz ki, söz deyil əməl olunmur,

Bir milyardlıq türkmü saya alınmır?

"Məni məndə demə" - demiş Əmrəmiz,

Əmrə hazır durmalıyıq yenə biz,

Haqq dünyası qurmalıyıq yenə biz,

Türkün heç kimsəylə yoxdur qərəzi,

Türkdür insanlığa mizan-tərəzi.

Türk bəşərin ağ günü, ağ üzüdür,

Fəsillər içində yaz gündüzüdür,

Zülmət gecəninsə dan ulduzudur,

Türk bəşərdən bəşər türkdən yarışın,

Dünyanı türklərə verin qorusun

Bəd nəzərdən olar uzaq,

Türkün nüvəsi, nüvəsi

Göyçə, Amasya, Qarabağ

Türkün nüvəsi, nüvəsi

Tur dağıdır təpələnməz,

Dağa, daşa səpələnməz,

Quma dönməz, gilə dönməz,

Türkün nüvəsi, nüvəsi

Türkün olmaz türk düşməni,

Türkün məni Tanrı məni,

Toxunulmaz türk məskəni,

Türkün nüvəsi, nüvəsi

Ta qədimdən, ta bu günə

Türk sadiqdir öz kökünə,

Çox qol-budaq atar yenə,

Türkün nüvəsi, nüvəsi

Yaralanıb soluxsunmaz,

Kədərlənib doluxsunmaz,

Məşhər günündə də sınmaz,

Türkün nüvəsi, nüvəsi

Türk bəşərin heyrətidir,

Namusudur, qeyrətidir,

Son Atatürk, ilk Metedir

Türkün nüvəsi, nüvəsi

Osman Qazı yaz mehidir,

Yunis Əmrə dan şehidir,

Dünyanın ki, Fatehidir,

Türkün nüvəsi, nüvəsi

Xaşıl yanığı olanlar,

Türklüyü çətin anlar,

Götürə bilməz yalanlar,

Türkün nüvəsi, nüvəsi

Aman, aman döndü zaman,

Son əsrlər keçdi yaman,

Deyər sözünü din-iman,

Türkün nüvəsi, nüvəsi

Fəzail İsmayıl Böyükkişi

Təzadlar.- 2010.- 9 oktyabr.- S.15.