Allah, əhd eyləmişəm, məni
o yerlərə qaytar!
(Əvvəli ötən
sayımızda)
...Elə bilirəm mindiyim maşın yolla getmir, havada uçur. Çünki içimdə təbadüləd baş qaldırıb: sağın-solun, yolun-irzin fərqinə qala bilmirəm. İnsan qəribə məxluqdur. çox halda onun sevincinin, kədərinin həddi-hüdudu olmur. Qəzəbləndimi, nə ayaqlarının altını görər, nə də düşüncələrini tarazlaya, nizamlaya bilər...
Hava istidir. Maşının açıq pəncərələrindən içəri dolan yaz nəfəsi sərnişinlərin üz-gözünü yalayır. Qəfil yuxudan oyanıbmış kimi Zeynal kişi əyləşdiyi oturacaqdan qalxaraq deyir:
- Ə, bir maşını saxla görüm.
Maşın dayanır. Sərnişinlər heyrətlənir. Biri digərlərinin üzünə təəccüblə baxır. Handan-hana Zeynal kişi yaşına uyğun olmayan emosiya ilə danışmağa başlayır:
- Mən qaçqınlarımıza humanitar yardım göstərilməsinin qətiyyən əleyhinəyəm. Camaatımız ələbaxımlığa öyrəşir. Yaşlıları demirəm, on-on beş yaşında qızlarımız da hansısa bir ölkədən yardım gətirən maşının, əcnəbilərin qarşısına qaçırlar. Vallah, billah, belə olmaz.
Maşının arxa oturcağında əyləşən yaşlı bir qadın dilləndi:
- Camaat bəs necə dolansın? Hər şey od qiymətindədir... Deyəsən, ay aşıq, sənin ağzın isti yerdədir?! Məcburi didərgin düşən bir milyondan artıq əhalinin uzaq başı üç yüz-dörd yüz min nəfəri işləyir, bəs qalanları neyləsin?
Aşıq Zeynal yamanca coşdu. Elə nərə çəkdi, bəlkə də göydə ucan quşlar da bir anlığa qanad saxladılar. Var güçünü toplayıb danışmağa başladı:
- A bajı,
deyəsən, biz həmyaşıdıq. İkinçi
dünya mühabirəsi illərini xatırlayırsanmı?
Altı yüz min başıpapaqlımız, əli silah
tutanlarımız çəbhəyə getmişdilər. Bəs
onda biz nəyinən dolanırdıq? Soruşuram, o vaxtlar da bizlərə
yardım, nə bilim, humanitar pay gətirirdilər?.. Pencər
yeyərdik, amma gözümüz tox, başımız uca idi.
Başaq yığardıq, yerkökü əkərdik,
çıraq əvəzinə şam yandırardıq.
Çünki müharibənin qələbəmizlə
başa çatacağına inanırdıq. İndi bir ərəb,
bir zənci bir torba şəkər tozu, un gətirir,
uşaqdan-böyüyə hamı qaçır onun
qabağına...
Həmin o arxa oturacaqda əyləşən
qadın daha özünü saxlaya bilməyib, soruşdu:
- O dəhşətli
günlərdə sən harada yaşayırdın? Ata-baba
yurd yerinizdə?.. Qardaşım, doğma el-obanın
havası da elə qidanın bir növüdür. Sənin
qınadığın adamlar isə didərgindirlər. Onlar
acından ölməsin, övladlarının yanında başları
aşağı, gözləri kölgəli olmasınlar deyə
yardım gətirən maşınların
qarşısına qaçırlar.
Aşıq Zeynal, deyəsən,
qadınla danışdığını unudub bir az da ucadan
danışmağa başladı:
- Bəs vicdan?! Bəs əxlaq?!
Bəs qeyrət?! Çox keçməyəcək, bu gün
yardım gətirən maşınların qabağına
yüyürən qızlar sabah-birisi gün ev
xanımları, ana olacaqlar. Bəs onda bir kilo undan ötrü
canfəşanlıq etdikləri üçün
utanmayacaqlar?! Belə yaramaz! Gəlin unutmayaq, biz azərbaycanlıyıq.
Mentalitetimizə uyğun davranmalıyıq. Deyəsən,
sürücünün də hövsələsi tükənmişdi,
gileylənməyə başladı:
- Əşi, sən Allah, bəsdir.
Elə qeyrətlisənsə, qoyma yardım gətirən
maşınlar qaçqın şəhərciyinə girsin. Gəl
əyləş, gedək...
Zeynal kişi susdu.
Kirimişcə gəlib yerində əyləşdi.
Sürücü maşını yerindən elə sürətlə
tərpətdi ki, sərnişinlərin canına əməlli-başlı
qorxu düşdü. Eşitdiklərimi, gördüklərimi
unutmaq üçün yenidən əlimdəki qəzeti
oxuyuram:
Daş dibindən baş
qaldıran göy otdum,
İşıq gördüm
- bir balaca boy atdım.
Elə billəm - gəldim,
gəzdim, qayıtdım -
Mənim o yerlərə
dönməyim gəlir...
Bizim Cəbrayıl
işğala məruz qalan bir neçə
rayonlarımızdan biridir. Doğma elim üçün necə
yanıramsa, eləcə də hazırda düşmən
tapdağı altında inildəyən bütün yurd yerlərimizin
həsrətini çəkirəm. Bu faktdır: ancaq doğma
obamdan ayrılıq dərdi belimi büküb, taqətimi kəsib,
başımı aşağı salıb. Cəbrayıllılar
torpağlarını, ərazilərini düşmənə
hədiyyə etməyiblər. Ermənilərin hələlik
sonuncu dəfə şüurlu olaraq yaratdıqları
qarşıdurmada beş nəfər həmyerlim Azərbaycanın
Milli Qəhrəmanı fəxri adına layiq
görülüb. 30 nəfərdən artıq
döyüşçü müxtəlif orden-medallarla təltif
olunublar. Torpaqlarımızın bütövlüyü,
qorunması uğrunda 200 nəfər bilavasitə səngərdə,
ön cəbhədə şəhid olub (qorxudan, səksəkədən
ürəkləri partlayanların sayı isə iki qat
artıqdır). Onlardan biri də doğmaca bacım oğlu
Cabbar Cabbarovdur. Quduz düşmən bir çoxları kimi
onun da 24 yaşında, Füzuli rayonu uğrunda gedən
döyüşlərdə arzularını ürəyində
qoydu. Bu barədə çox yazdığımdan daha söz
tapa bilmirəm. Ançaq ürəyimdən keçir ki,
kaş o yaşayaydı, əvəzində mən özüm
öləydim... ölümü arzulamaqla deyil, bu dəhşətli
façiə yaradanımızın alın
yazısıdır.
Nəhayət,
yumağından açılmış sap kimi yolu
çözələyən maşın son mənzilə
çatır. Elə səmimi etirafım da burada
başlayır. Dəfələrlə gəldiyim ünvanla
buranın arasında yerlə-göy qədər fərq var. Məcburi
didərginlərimizin 1992-93-cü illərdə
acınacaqlı gün-güzəranları, Allahım, necə
dözülməz, necə sarsıntılıydı?!
Yağan yağış, qar o zavallı insanların
başına tökülərdi. Doğma mühitdən,
iqlimdən zor qarşısında ayrılan insanlar
Milin-Muğanın düzlərində sərt iqlimlə
üz-üzə gəlmişdilər. Əslində onlar
üçün ölüm daha yaxşı idi. Niyə? Ona
görə ki, sevincləri çöhrələrində, təbəssümləri
dodaqlarında donmuşdu. Amma dünyada bir yaşamaq eşqi,
ömür sürmək həvəsi də varmış...
Şair demiş, yaşamaq yanmaqdır, yanasan gərək.
Dağlı-bağlı, kəhrizli-bulaqlı cəbrayıllılar
Milin-Muğanın sonsuzluğa qədər uzanan düzlərində
əzab-əziyyətlərini yaşamaq eşqindən
çox zəif gördülər. Əslində heç
başqa çarələri də yox idi. Axı neyləməliydilər?
Prezident Aparatı önündə dayanıb dərdlərini
səsgücləndirici vasitəsilə
danışaydılar? Kim onları eşidəcəkdi, dinləyib
qayğılarına qalacaqdı? Axı həmin vaxt respublika
rəhbərlərinin əksəriyyətinin başı vəzifə,
kreslo uğrunda amansız, aramsız qalmaqallara
qarışmışdı... Bəs nə etməli, necə
etməli? Axı insanların taleyi bir tükdən
asılı qalmışdı...
Həmin ərəfədə
respublikamızda baş verən qanlı-qadalı olayların
hamısını yenidən xatırlamaq istəməzdim.
Mövzumuzla əlaqədar bunu önəmə çəkirik
ki, cənab Heydər Əliyev yenidən hakimiyyətə
qayıtdıqdan sonra, obrazlı desəm, qaçqın və
köçkünlərin acınacaqlı talelərində,
qaranlıq güzəranlarda gur işıq yandırdı.
Onların hüquqlarının qorunması üçun sərəncamlar
imzaladı, fərmanlar verdi. Bakı və Sumqayıt şəhərlərində
məskunlaşan məcburi köçkünlərin hər
birinə atalıq qayğısı göstərdi. Onların
sığınacaq tapdıqları ünvanlarda təmənnasız,
ödənişsiz yaşamaları üçün aidiyyəti
olan orqanlara tapşırıqlar verdi.
Ümummilli liderimizin
Mil-Muğan, Aran bölgələrində məskunlaşan
adamlarımıza da qayğısı, diqqəti
unudulmazdı. 2000-ci ildə bu zonalara səfər edən cənab
Heydər Əliyev iki qaçqın övladının toy
şənliklərinə şərik çıxdı. Dedi,
güldü, hətta qol götürüb xoş musiqi sədaları
altında oynadı da. Ancaq onun eyni açılmırdı.
çox düşüncəli, fikirliydi. Ona görə ki, ərazidə
müvəqqəti məskunlaşan insanların
yaşayış şəraiti qətiyyən cənab
prezidentin ürəyincə deyildi. Bakıya qayıdan
günün səhəri humanist, alicənab fərman
imzaladı ki, dövlət büdcəsindən vəsait
ayrılsın və yeni tipli qəsəbə salınsın.
Böyük şəxsiyyətin qətiyyətli
tapşırığı çox qısa müddətdə
yerinə yetirildi. İndi bizi aparan maşın həmin qəsəbəyə
daxil oldu
Zeynal kişi mürgüləyir.
Arxada əyləşən qadının səsini eşidirəm:
"Rəhmətlik Heydər Əliyev vaxtında
imdadımıza çatmasaydı, vallah,
batıb-qırılmışdıq. Allahımız o illəri,
günləri ömrümüzə yazmasın.
Başımızı gizlətməyə kölgəlik
tapmırdıq. Yağış-qar hamısı
üstümüzə yağırdı. İlahi, ya rəbbim,
sənə yalvarıram, hər bir məçburi
köçkünü, azərbaycanlını öz
varlığı qədər istəyən unudulmaz rəhbərimizin
ruhunu şad elə!"
Yaz günəşinin
qürub çağında Biləsuvar rayonu ərazisindəki
"qaçqın şəhərciyi"nə
çatırıq. Bu sətirləri yazarkən ağlıma
gəlir ki, Zeynal kişiyə və bütün söhbətlərimizin
şahidi olmuş, salon güzküsündən bizlərə
heyrət və nifrətlə baxan (onu ancaq gündəlik gəlir,
qazanc maraqlandırır) sürücüyə "sağ
ol" demədim. Bacımın yenicə
köçdüyü mənzilə doğru tələsirəm.
Daha doğrusu, qaça-qaça gedirəm. Qapını onun
özü üzümə açır. Rəbbim, ta
uşaqlığımdan bu çağıma kimi mənə
bacıdan əlavə həm də ana, qardaş, ata
qayğısı göstərən Zöhrə bacım son
günlər necə yaşlanıb, üzünü
qırışlar necə bürüyüb?!
- Salam, a bacı, necəsən?
- Ay qardaş,
sağ-salamatam. Ayağım hələlik yer tutur. Doğma
torpağlarımıza qayıtmayıncaya qədər
canım çıxmayacaq. A qağa, el-obamız
üçün bərk darıxıram. Gecə-gündüz
tanrıya dua edirəm ki, qəbrim ata-anamın,
qardaşımın yanında qazılsın...
-
Dolanışığın necədir?
- Qürbətdə
yaşamaq yaşayış deyil, qardaş! Sürünürsən,
inildəyirsən, yanırsan-yaxılırsan. Dünyadır
də, neyləməli?
- Maşallah, indi vəziyyətiniz
ötən vaxtlara nisbətən daha yaxşıdır.
İşıqlı, yaraşıqlı mənzillərə
köçmüsünüz. Evinizin önündə torpaq
sahəsi də var...
- Yox, qağa, bütun
bunlardan yaramıza məlhəm olmaz... Dərdimizin dərmanı
ancaq doğma torpaqlarımızdır.
- A bacı, axşam səni
yuxumda görmüşdüm. Gördüm ki, əlində
ağ dəsmal tutub, məni yanına
çağırırsan..
- Qağa, su görmək
aydınlıqdır, ağ rəng isə arzularının
çin olmasıdır.
- Demək, tezliklə
el-obamıza qayıdacağıq?
- Qardaş, mən buna
inanıram. Televiziya ekranlarında dəfələrlə
prezidentimizin danışığını eşitmişəm
ki, torpaqlarımızın bir qarışını da
işğal altında qoymayacağıq. Qağa,
dünyanın çox naz-nemətindən pay olar, bircə vətən
torpağından başqa...
Bacım ardımca su
atıb, məni yola saldı. Maşın gəldiyim ünvana
doğru irəlilədikcə, düşüncələrimin,
intizarımın qədəri də artırdı. Bu misralar
isə varlığıma hakim kəsilmişdi:
Daha səbr etməyə
halım qalmayıb,
Daha yol getməyə yolum
qalmayıb.
Bəsdir, çox demişəm:
qalım-qalmayım?
Mənim o yerlərə
dönməyim gəlir...
Doğma torpaqlarımız
bizləri çağırır, mütləq
qayıtmalıyıq!
Telman MEHDİXANLI
Təzadlar.- 2010.- 30 sentyabr.- S.14.