"Amerikada görülən işlər nəticə verməkdədir"

Tomris Azəri: “Tarix boyu Azərbaycana qarşı edilən qətliamların, soyqırımların, işğalların bütün Amerika ictimaiyyətinə çatdırılmasına çalışırıq”

Amerika Azərbaycanlıları Cəmiyyətinin prezidenti Tomris Azərinin “Təzadlar”a müsahibəsi

- Tomris xanım, Nyu-Meksiko ştatının Xocalı qətliamının 21-ci ildönümü ilə bağlı qətnamə qəbul etməsini necə dəyərləndirirsiniz?

- Nyu-Meksikoda qəbul edilən qətnamə Amerikada yaşayan azərbaycanlıları çox məmnun etdi. Bu uğur orada yaşayan azərbaycanlıların, səfirliyimizin və baş konsulluğumuzun birgə uğurudur. Birgə görülən işlər öz effektini verir və verməkdədir. Bu işi davam etdirməliyik.

- Qarşıda hansısa tədbirlər gözlənilirmi?

- Bu il azərbaycanlıların cəmiyyəti, Amerika Azərbaycan Şurası və Türk-Amerika təşkilatları Xocalı qətliamının Amerikada tanınması üçün məktub kampaniyalarına start verib. Və bu məktub kampaniyası çox gözəl nəticələr verməkdədir. Bildiyiniz kimi, keçən ilin mart ayında Nyu-York ştatının senatı tarixdə və Azərbaycandan xaricdə ilk dəfə olaraq 31 mart azərbaycanlıların soyqırım gününü rəsmi şəkildə tanıdı. Keçən il məktub kampaniyalarımız və öz nümayəndələrimizlə aparılan danışıqlardan sonra Corciya ştatı nümayəndələr palatası ilk dəfə Xocalı soyqırımının baş verməsində Ermənistan rəhbərliyinin rolunu qeyd edən və cinayətlə bağlı Sarkisyanın adını hallandıran qətnaməni qəbul etdi.

- Ortada olan nəticə odur ki, görülən işlər öz effektini verməkdədir...

- Təbii ki, elədir. Onu da demək istəyirəm ki, biz bütün il boyu konqresmenlərimizlə, senatorlarımızla əlaqələrimiz olur və onlarla hər görüşdüyümüzdə problemlərimizi danışırıq və onları bilgiləndiririk. Amerika Azərbaycanlıları Cəmiyyətinin 55 illik təcrübəsinə böyük kömək olur.

Amerikada ilk qurulmuş bir cəmiyyət olaraq nümayəndələrimiz bizlərə inanır və dinləyirlər. Uğurlarımızın daha da irəli getməsini istəyirəm. Tarix boyu Azərbaycana qarşı edilən qətliamların, soyqırımların, işğalların bütün Amerika ictimaiyyətinə çatdırılmasına çalışırıq.

Elnur Eltürk

Təzadlar.- 2013.- 5 fevral.- S.11.