Novruz bayramı M.H.Təhmasibin
araşdırmalarında
(Əvvəli ötən
sayda)
...Toy
və yas adətlərinin, eləcə də onlarla əlaqədar
olan məişət nəğmələrinin mərasim və
mövsüm nəğmələrinə nisbətən daha
sonrakı dövrlərə aid olduğunu göstərən
M.H.Təhmasib bunlarda animist baxışın və magik
münasibətin öz şəklini dəyişmiş, məişət
məsələləri ilə uyuşdurulmuş bir halda
qalıqları əlamət və izlərinin
yaşadığını qeyd edir. Bunu həmin bu su
üstünə getmək adətində və orada oxunan nəğmələrdə
də gördüyünü ehtimal edir. Yeni ilin ilk
günü səhər tezdən suyun kənarına getmək,
suyun kənarında xüsusi nəğmələr oxuyub
qardaşa cansağlığı arzulamaq, toy arzulamaq, uzunboy,
qarabirçək nişanlı arzulamaq, onun həsrətilə
gözlənən toyunun süni bir bənzərini yaratmaq,
çalıb-oynamaq, şənlik etmək və s. hadisəyə
füsunkar münasibətin özünəməxsus bir təzahürü
kimi qiymətləndirir. “Vəsfi-hal”ın məişət nəğməsi
olduğunu, bunun Novruzla əlaqələndirilməsinin təsadüfi
olmadığını söyləyir.
M.H.Təhmasib
mövsüm bayramlarının ikinci şəklinin hər bir
mövsüm qurtarıb yeni mövsümün
başlanmasını göstərən müəyyən bir
bitkinin, heyvanın və ya quşun xariqüləşməsi
və mövsümün özünə olan münasibətin
ona həsr edilməsi yolu ilə ifadəsindən ibarət
olduğunu ehtimal edir. Mövsüm nəğmələrinin
bu şəklini totemizmdən fərqləndirən müəllifə
görə, bunlar bir-birlərinə nə qədər
yaxın olsalar da aralarında müəyyən fərqlər
də vardır. Belə ki, birincilərdən fərqli olaraq
ikincilər sadəcə olaraq müəyyən bir
mövsümü təmsil edirlər.
Bu qəbildən
olan bayramlardan birinin “Səməni” bayramı olduğunu, bu mərasimin
öz əvvəlki şəklini və məzmununu çox dəyişmiş
bir halda olsa da, bu gün hələ də yaşamaqda
olduğunu göstərir və müxtəsər şəkildə
məzmununu qeyd edir: “Novruz bayramına az qalmış evlərdə
taxıl göyərdilir. Onun bir hissəsi öz
yaşıllığı ilə baharı təmsil etdiyi
üçün bahar bayramı olan Novruz bayramının
süfrəsinə qoyulur. Əsasən “Səməni”, yaxud
“Suman” halvası bişirilir...
Səməninin
istər əzilib şirəsinin
çıxarılmasında, istərsə də bişirilməsində
bütün el iştirak edir. Buna qatılan un da bir evdən
deyil, iştirak edən bütün evlərdən
yığılır. Səməninin içərisinə
sındırılmış badam, bu mümkün
olmadığı təqdirdə isə,
sındırılmış fındıq salırlar. Hər
evə verilən paya bundan da mütləq bir dənə
salınmalıdır. Lakin bir adət olaraq bunu yeməzlər,
gələn il səməni vaxtına qədər saxlayarlar.
Xalq buna xeyir-bərəkət gətirən bir amil kimi
baxır.
Artıq
qatılaşmağa üz qoyan səməni qaynamağa
başlayanda dəvəciklər atır ki, buna səməninin
fındıq atması deyirlər. Bu zaman səməni
bişirən qoca qarı ona fındıq, yaxud badam salır.
Mərasim də bu zaman başlanır. Qadınlar dəstə
ilə səməni qazanının başına dolanıb
yallı gedib və səs-səs verib oxuyurlar.
Səməni,
saxla məni, İldə göyərdərəm səni. Səməniyə
saldım badam, Qoymurlar bir barmaq dadam Səməni bezanə gəlmişəm,
Uzana-uzana gəlmişəm.
Müəllif
göstərir ki, hər şeydən qabaq burada gözəçarpan
xüsusiyyət bunun sehr və əfsun xasiyyəti
daşımasıdır. Taleyi və bütün gələcəyi
baharın vaxtında başlamasından, təbiətin
vaxtında oyanmasından, yerə səpdiyi taxılın
yaxşı göyərməsindən asılı olan qədim
əkinçi, torpağın oyanmağa
başladığı günlərdə evdə, süni surətdə
taxıl göyərdir. Bununla o, bənzər hadisələr
arasındakı daxili əlaqədən istifadə edərək,
təbiətə, onun tabe olmaq istəməyən əsrarəngiz
qüvvətlərinə təsir etməyə
çalışır. O, evdə süni surətdə səməni
göyərtməklə geniş əkin yerlərinə səpmiş
olduğu taxılın da beləcə göyərməsi
üçün sehr edir.
Müəllifin
fikrincə, xalqın səməniyə nə dərəcədə
müqəddəs bir amil kimi baxdığı nəğmənin
ilk misrasından da açıq-aydın görünür, belə
ki, “səməni saxla məni!” misrasında, xalqın
açıqdan-açığa
səməniyə qatıldığı, onun mərhəmətinə
sığındığı aydın olur.
M.H.Təhmasib
o məsələyə də diqqəti çəkir ki, bir fəslin
bitib, digər bir fəslin başlaması ilə əlaqədar
olan mərasimlər müxtəlif şəkillərdə
olmuşdur ki, bunlardan biri də fəslin gəlməsini, onun
başladığını müjdə verən bir əlamətin
- çiçəyin, quşun müqəddəsləşdirilməsindən
ibarətdir. Müəllifin fikrincə belə müqəddəsləşdirilmiş
çiçəklərdən biri qədim Azərbaycanda “həyat
və əbədiyyət çiçəyi” hesab edilmiş
səm (səmən) çiçəyidir. Bu çiçək
təbiətin başlandığını göstərdiyinə
və bir sıra təbii-müalicə xüsusiyyətlərinə
görə müqəddəs hesab edilmişdir. Müəllif
bu barədə belə yazır:
“...Qədim
azərbaycanlı səmi, yazın başlanması, təbiətin
“dirilməsi” simvolu olmaq mənasında “həyat və əbədiyyət”
çiçəyi adlandırmış, onun
özünün, çubuqlarının, şirəsinin və
ondan hazırlanmış xüsusi “xörəyin” ömür
uzatmaq qabiliyyətinə malik olduğuna etiqad etmişdir.
Bütün bu proses xüsusi bir mərasim şəklini
almışdır ki, istər bu mərasimin özü, istərsə
də buna məxsus nəğmənin qalıqları da son
zamanlara qədər yaşamışdır. Bu qalıq məzmun
və şəkilcə çox dəyişmişsə də,
hər halda öz qədim “səməni” bayramı
adını mühafizə edib saxlamışdır. Bu
çiçəyin, doğrudan da, insan ömrünü
uzatmaq qabiliyyətinə malik olması barədəki etiqad nəğmənin
bu misralarında yaşamaqdadır:
Səməni,
saxla məni,
İldə
göyərdərəm səni”.
M.H.Təhmasib
xalqımızın mənəvi mədəniyyətinin
mühüm hissəsi olan adət, ənənə, mərasim
və bayramlarımızın çoxçeşidli,
çoxşaxəli, həm də mürəkkəb
olduğunu, burada ən qədim dövrlərin ibtidai
görüşləri ilə bağlı adətlər, ənənələr
olduğu kimi, orta əsrlərin siyasi, ictimai, fəlsəfi,
dini görüşləri ilə əlaqədar, habelə
bugünki həyatımızın yaratdığı adət,
ənənə və mərasimlərin də olduğunu qeyd
edir. Bunlardan bəzilərinin unudulduğunu, bəzilərinin
hələ yaşamaqda olduğunu, bəzilərindən isə
müəyyən izlər, əlamətlər
qaldığını yada salır, bir çox nümunələrin,
o cümlədən bayatıların bunları özündə
saxlamaqda olduğunu göstərir. Müxtəlif folklor
nümunələrində, o cümlədən idiomatik ifadələrdə,
atalar sözü və məsəllərdə, tapmacalarda da
belə inam, etiqad, adət, ənənə izlərinin
qalldığını, bir xatırladan müəllif bu
baxımdan “Kitabi - Dədə Qorqud”un çox gözəl
material verdiyini diqqətə çəkir. “Kitabi - Dədə
Qorqud” boyunda əks olunmuş iki mərasimi-evin
yağmalanması və nəsil artırmaqla bağlı
keçirilən mərasimləri xatırladan müəllif
bunların öz dövrü üçün çox gərəkli
olduğunu, vacib tədbirlərlə bağlı olduğunu,
lakin əsaslarını itirdiklərindən, ya tamamilə unudulub
yaddaşlardan silindiyini, ya da məzmun və şəkilcə
yeniləri ilə əvəz edildiklərini ehtimal edir.
Görkəmli
folklorşünasın mərasim və mövsüm nəğmələri
ilə bağlı ilk sistemli əsəri - namizədlik
monoqrafiyası və çoxsaylı məqalələri mərasim
folkloru sahəsində sonralar tədqiqatların
aparılmasına yol açmışdır. Mərasim
folkloru mövzusu f.e.d., prof. B.Abdullanın, f.e.n. A.Xürrəmqızının
araşdırmaları ilə davam etdirilmişdir.
Xəyalə Orucqızı,
filologiya üzrə fəlsəfə
doktoru,
AMEA Folklor İnstitutu “Folklor və
yazılı ədəbiyyat” şöbəsinin
böyük elmi işçisi
Təzadlar.- 2013.- 16 mart.- S.11.